१. विभङ्गवारो

हेतुपच्चयो

१. हेतुं धम्मं पटिच्च हेतु धम्मो उप्पज्जति हेतुपच्चया – अलोभं पटिच्च अदोसो अमोहो, अदोसं पटिच्च अलोभो अमोहो, अमोहं पटिच्च अलोभो अदोसो, लोभं पटिच्च मोहो, मोहं पटिच्च लोभो, दोसं पटिच्च मोहो, मोहं पटिच्च दोसो; पटिसन्धिक्खणे…पे…. (१)

हेतुं धम्मं पटिच्च नहेतु धम्मो उप्पज्जति हेतुपच्चया – हेतुं धम्मं पटिच्च सम्पयुत्तका खन्धा चित्तसमुट्ठानञ्च रूपं; पटिसन्धिक्खणे…पे…. (२)

हेतुं धम्मं पटिच्च हेतु च नहेतु च धम्मा उप्पज्जन्ति हेतुपच्चया – अलोभं पटिच्च अदोसो अमोहो सम्पयुत्तका च खन्धा चित्तसमुट्ठानञ्च रूपं (चक्कं). लोभं पटिच्च मोहो सम्पयुत्तका च खन्धा चित्तसमुट्ठानञ्च रूपं…पे… पटिसन्धिक्खणे…पे…. (३)

२. नहेतुं धम्मं पटिच्च नहेतु धम्मो उप्पज्जति हेतुपच्चया – नहेतुं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं; पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा; एकं महाभूतं…पे…. (१)

नहेतुं धम्मं पटिच्च हेतु धम्मो उप्पज्जति हेतुपच्चया – नहेतू खन्धे पटिच्च हेतू; पटिसन्धिक्खणे…पे… वत्थुं पटिच्च हेतू. (२)

नहेतुं धम्मं पटिच्च हेतु च नहेतु च धम्मा उप्पज्जन्ति हेतुपच्चया – नहेतुं एकं खन्धं पटिच्च तयो खन्धा हेतु च चित्तसमुट्ठानञ्च रूपं…पे… द्वे खन्धे पटिच्च द्वे खन्धा हेतु च चित्तसमुट्ठानञ्च रूपं; पटिसन्धिक्खणे…पे… पटिसन्धिक्खणे वत्थुं पटिच्च हेतू सम्पयुत्तका च खन्धा. (३)

३. हेतुञ्च नहेतुञ्च धम्मं पटिच्च हेतु धम्मो उप्पज्जति हेतुपच्चया – अलोभञ्च सम्पयुत्तके च खन्धे पटिच्च अदोसो अमोहो (चक्कं). लोभञ्च सम्पयुत्तके च खन्धे पटिच्च मोहो, दोसञ्च सम्पयुत्तके च खन्धे पटिच्च मोहो…पे… पटिसन्धिक्खणे…पे… अलोभञ्च वत्थुञ्च पटिच्च अदोसो अमोहो…पे…. (१)

हेतुञ्च नहेतुञ्च धम्मं पटिच्च नहेतु धम्मो उप्पज्जति हेतुपच्चया – नहेतुं एकं खन्धञ्च हेतुञ्च पटिच्च तयो खन्धा चित्तसमुट्ठानञ्च रूपं…पे… द्वे खन्धे च हेतुञ्च पटिच्च द्वे खन्धा चित्तसमुट्ठानञ्च रूपं; पटिसन्धिक्खणे…पे… पटिसन्धिक्खणे वत्थुञ्च हेतुञ्च पटिच्च सम्पयुत्तका खन्धा. (२)

हेतुञ्च नहेतुञ्च धम्मं पटिच्च हेतु च नहेतु च धम्मा उप्पज्जन्ति हेतुपच्चया – नहेतुं एकं खन्धञ्च अलोभञ्च पटिच्च तयो खन्धा अदोसो अमोहो च चित्तसमुट्ठानञ्च रूपं…पे… द्वे खन्धे च अलोभञ्च पटिच्च द्वे खन्धा अदोसो अमोहो च चित्तसमुट्ठानञ्च रूपं (चक्कं). नहेतुं एकं खन्धञ्च लोभञ्च पटिच्च तयो खन्धा मोहो च चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… वत्थुञ्च अलोभञ्च पटिच्च अदोसो अमोहो सम्पयुत्तका च खन्धा. (३)

आरम्मणपच्चयादि

४. हेतुं धम्मं पटिच्च हेतु धम्मो उप्पज्जति आरम्मणपच्चया (रूपं छड्डेत्वा अरूपेयेव नव पञ्हा)… अधिपतिपच्चया (पटिसन्धि नत्थि, परिपुण्णं) एकं महाभूतं पटिच्च…पे… महाभूते पटिच्च चित्तसमुट्ठानं रूपं उपादारूपं… (इमं नानं) अनन्तरपच्चया… समनन्तरपच्चया… सहजातपच्चया (सब्बे महाभूता याव असञ्ञसत्ता)… अञ्ञमञ्ञपच्चया… निस्सयपच्चया… उपनिस्सयपच्चया… पुरेजातपच्चया… आसेवनपच्चया (द्वीसुपि पटिसन्धि नत्थि)… कम्मपच्चया… विपाकपच्चया (संखित्तं)… अविगतपच्चया.