१. विभङ्गवारो

नहेतुपच्चयो

६२. सहेतुकं धम्मं पटिच्च अहेतुको धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

अहेतुकं धम्मं पटिच्च अहेतुको धम्मो उप्पज्जति नहेतुपच्चया – अहेतुकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (१) (सब्बं याव असञ्ञसत्ता ताव कातब्बं.)

नआरम्मणपच्चयादि

६३. सहेतुकं धम्मं पटिच्च अहेतुको धम्मो उप्पज्जति नआरम्मणपच्चया – सहेतुके खन्धे पटिच्च चित्तसमुट्ठानं रूपं; पटिसन्धिक्खणे…पे…. (१)

अहेतुकं धम्मं पटिच्च अहेतुको धम्मो उप्पज्जति नआरम्मणपच्चया – अहेतुके खन्धे पटिच्च चित्तसमुट्ठानं रूपं, विचिकिच्छासहगतं उद्धच्चसहगतं मोहं पटिच्च चित्तसमुट्ठानं रूपं; पटिसन्धिक्खणे…पे… खन्धे पटिच्च वत्थु; एकं महाभूतं…पे… असञ्ञसत्तानं एकं…पे…. (१)

सहेतुकञ्च अहेतुकञ्च धम्मं पटिच्च अहेतुको धम्मो उप्पज्जति नआरम्मणपच्चया – सहेतुके खन्धे च महाभूते च पटिच्च चित्तसमुट्ठानं रूपं, विचिकिच्छासहगते उद्धच्चसहगते खन्धे च मोहञ्च पटिच्च चित्तसमुट्ठानं रूपं; पटिसन्धिक्खणे…पे…. (१)

सहेतुकं धम्मं पटिच्च सहेतुको धम्मो उप्पज्जति नअधिपतिपच्चया… (अनुलोमसहजातसदिसा) नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया… नपुरेजातपच्चया – अरूपे सहेतुकं एकं खन्धं…पे… पटिसन्धिक्खणे…पे…. (१)

६४. सहेतुकं धम्मं पटिच्च अहेतुको धम्मो उप्पज्जति नपुरेजातपच्चया – अरूपे विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो, सहेतुके खन्धे पटिच्च चित्तसमुट्ठानं रूपं; पटिसन्धिक्खणे…पे…. (२)

सहेतुकं धम्मं पटिच्च सहेतुको च अहेतुको च धम्मा उप्पज्जन्ति नपुरेजातपच्चया – अरूपे विचिकिच्छासहगतं उद्धच्चसहगतं एकं खन्धं पटिच्च तयो खन्धा मोहो च…पे… द्वे खन्धे…पे… पटिसन्धिक्खणे…पे…. (३)

अहेतुकं धम्मं पटिच्च अहेतुको धम्मो उप्पज्जति नपुरेजातपच्चया – अरूपे अहेतुकं एकं खन्धं…पे… द्वे खन्धे…पे… अहेतुके खन्धे पटिच्च चित्तसमुट्ठानं रूपं, विचिकिच्छासहगतं उद्धच्चसहगतं मोहं पटिच्च चित्तसमुट्ठानं रूपं; पटिसन्धिक्खणे…पे… (याव असञ्ञसत्ता ताव वित्थारो). (१)

अहेतुकं धम्मं पटिच्च सहेतुको धम्मो उप्पज्जति नपुरेजातपच्चया – अरूपे विचिकिच्छासहगतं उद्धच्चसहगतं मोहं पटिच्च सम्पयुत्तका खन्धा; पटिसन्धिक्खणे वत्थुं पटिच्च सहेतुका खन्धा. (२)

अहेतुकं धम्मं पटिच्च सहेतुको च अहेतुको च धम्मा उप्पज्जन्ति नपुरेजातपच्चया – पटिसन्धिक्खणे वत्थुं पटिच्च सहेतुका खन्धा, महाभूते पटिच्च कटत्तारूपं. (३)

६५. सहेतुकञ्च अहेतुकञ्च धम्मं पटिच्च सहेतुको धम्मो उप्पज्जति नपुरेजातपच्चया – अरूपे विचिकिच्छासहगतं उद्धच्चसहगतं एकं खन्धञ्च मोहञ्च पटिच्च तयो खन्धा…पे… द्वे खन्धे…पे… पटिसन्धिक्खणे सहेतुकं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे…. (१)

सहेतुकञ्च अहेतुकञ्च धम्मं पटिच्च अहेतुको धम्मो उप्पज्जति नपुरेजातपच्चया – सहेतुके खन्धे च महाभूते च पटिच्च चित्तसमुट्ठानं रूपं, विचिकिच्छासहगते उद्धच्चसहगते खन्धे च मोहञ्च पटिच्च चित्तसमुट्ठानं रूपं; पटिसन्धिक्खणे…पे…. (२)

सहेतुकञ्च अहेतुकञ्च धम्मं पटिच्च सहेतुको च अहेतुको च धम्मा उप्पज्जन्ति नपुरेजातपच्चया – पटिसन्धिक्खणे सहेतुकं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे… सहेतुके खन्धे च महाभूते च पटिच्च कटत्तारूपं. (३)

नपच्छाजातपच्चयादि

६६. सहेतुकं धम्मं पटिच्च सहेतुको धम्मो उप्पज्जति नपच्छाजातपच्चया… नआसेवनपच्चया… नकम्मपच्चया – सहेतुके खन्धे पटिच्च सहेतुका चेतना. (१)

अहेतुकं धम्मं पटिच्च अहेतुको धम्मो उप्पज्जति नकम्मपच्चया – अहेतुके खन्धे पटिच्च अहेतुका चेतना… बाहिरं… आहारसमुट्ठानं… उतुसमुट्ठानं…पे…. (१)

अहेतुकं धम्मं पटिच्च सहेतुको धम्मो उप्पज्जति नकम्मपच्चया – विचिकिच्छासहगतं उद्धच्चसहगतं मोहं पटिच्च सम्पयुत्तका चेतना. (२)

सहेतुकञ्च अहेतुकञ्च धम्मं पटिच्च सहेतुको धम्मो उप्पज्जति नकम्मपच्चया – विचिकिच्छासहगते उद्धच्चसहगते खन्धे च मोहञ्च पटिच्च सम्पयुत्तका चेतना… नविपाकपच्चया (पटिसन्धि नत्थि).

नआहारपच्चयादि

६७. अहेतुकं धम्मं पटिच्च अहेतुको धम्मो उप्पज्जति नआहारपच्चया… नइन्द्रियपच्चया… नझानपच्चया… नमग्गपच्चया… नसम्पयुत्तपच्चया.

नविप्पयुत्तपच्चयादि

६८. सहेतुकं धम्मं पटिच्च सहेतुको धम्मो उप्पज्जति नविप्पयुत्तपच्चया – अरूपे सहेतुकं एकं खन्धं…पे…. (१)

सहेतुकं धम्मं पटिच्च अहेतुको धम्मो उप्पज्जति नविप्पयुत्तपच्चया – अरूपे विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (२)

सहेतुकं धम्मं पटिच्च सहेतुको च अहेतुको च धम्मा उप्पज्जन्ति नविप्पयुत्तपच्चया – अरूपे विचिकिच्छासहगतं उद्धच्चसहगतं एकं खन्धं पटिच्च तयो खन्धा मोहो च…पे… द्वे खन्धे…पे…. (३)

अहेतुकं धम्मं पटिच्च अहेतुको धम्मो उप्पज्जति नविप्पयुत्तपच्चया – अरूपे अहेतुकं एकं खन्धं पटिच्च तयो खन्धा, द्वे खन्धे…पे…. (१)

अहेतुकं धम्मं पटिच्च सहेतुको धम्मो उप्पज्जति नविप्पयुत्तपच्चया – अरूपे विचिकिच्छासहगतं उद्धच्चसहगतं मोहं पटिच्च सम्पयुत्तका खन्धा. (२)

सहेतुकञ्च अहेतुकञ्च धम्मं पटिच्च सहेतुको धम्मो उप्पज्जति नविप्पयुत्तपच्चया – अरूपे विचिकिच्छासहगतं उद्धच्चसहगतं एकं खन्धञ्च मोहञ्च पटिच्च तयो खन्धा…पे… द्वे खन्धे…पे… नोनत्थिपच्चया… नोविगतपच्चया. (१)