१. विभङ्गवारो

आरम्मणपच्चयो

१७६. नहेतु सहेतुको धम्मो नहेतुसहेतुकस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति; झानं…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति; पहीने किलेसे…पे… विक्खम्भिते किलेसे…पे… पुब्बे…पे… नहेतू सहेतुके खन्धे अनिच्चतो…पे… दोमनस्सं उप्पज्जति; कुसलाकुसले निरुद्धे नहेतु सहेतुको विपाको तदारम्मणता उप्पज्जति; चेतोपरियञाणेन नहेतुसहेतुकचित्तसमङ्गिस्स चित्तं जानाति, आकासानञ्चायतनं…पे… आकिञ्चञ्ञायतनं…पे… नहेतू सहेतुका खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आरम्मणपच्चयेन पच्चयो; नहेतू सहेतुके खन्धे आरब्भ नहेतू सहेतुका खन्धा उप्पज्जन्ति. (१)

नहेतु सहेतुको धम्मो नहेतुअहेतुकस्स धम्मस्स आरम्मणपच्चयेन पच्चयो – नहेतू सहेतुके खन्धे अनिच्चतो…पे… दोमनस्सं उप्पज्जति, कुसलाकुसले निरुद्धे नहेतु अहेतुको विपाको तदारम्मणता उप्पज्जति, नहेतू सहेतुके खन्धे आरब्भ नहेतू अहेतुका खन्धा उप्पज्जन्ति. (२)

१७७. नहेतु अहेतुको धम्मो नहेतुअहेतुकस्स धम्मस्स आरम्मणपच्चयेन पच्चयो – निब्बानं आवज्जनाय आरम्मणपच्चयेन पच्चयो; चक्खुं…पे… वत्थुं… नहेतू अहेतुके खन्धे अनिच्चतो…पे… दोमनस्सं उप्पज्जति; कुसलाकुसले निरुद्धे नहेतु अहेतुको विपाको तदारम्मणता उप्पज्जति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… नहेतू अहेतुके खन्धे आरब्भ नहेतू अहेतुका खन्धा उप्पज्जन्ति. (१)

नहेतु अहेतुको धम्मो नहेतुसहेतुकस्स धम्मस्स आरम्मणपच्चयेन पच्चयो – अरिया निब्बानं पच्चवेक्खन्ति; निब्बानं गोत्रभुस्स, वोदानस्स, मग्गस्स, फलस्स आरम्मणपच्चयेन पच्चयो; चक्खुं…पे… वत्थुं… नहेतू अहेतुके खन्धे अनिच्चतो …पे… दोमनस्सं उप्पज्जति; कुसलाकुसले निरुद्धे नहेतु सहेतुको विपाको तदारम्मणता उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन नहेतुअहेतुकचित्तसमङ्गिस्स चित्तं जानाति. नहेतू अहेतुका खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आरम्मणपच्चयेन पच्चयो; नहेतू अहेतुके खन्धे आरब्भ नहेतू सहेतुका खन्धा उप्पज्जन्ति. (२)

अधिपतिपच्चयो

१७८. नहेतु सहेतुको धम्मो नहेतुसहेतुकस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं समादियित्वा उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि गरुं कत्वा पच्चवेक्खति, झानं…पे… अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं गरुं कत्वा पच्चवेक्खन्ति. नहेतू सहेतुके खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नहेतुसहेतुकाधिपति सम्पयुत्तकानं खन्धानं अधिपतिपच्चयेन पच्चयो. (१)

नहेतु सहेतुको धम्मो नहेतुअहेतुकस्स धम्मस्स अधिपतिपच्चयेन पच्चयो. सहजाताधिपति – नहेतु सहेतुकाधिपति चित्तसमुट्ठानानं रूपानं अधिपतिपच्चयेन पच्चयो. (२)

नहेतु सहेतुको धम्मो नहेतुसहेतुकस्स च नहेतुअहेतुकस्स च धम्मस्स अधिपतिपच्चयेन पच्चयो. सहजाताधिपति – नहेतु सहेतुकाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

नहेतु अहेतुको धम्मो नहेतुसहेतुकस्स धम्मस्स अधिपतिपच्चयेन पच्चयो. आरम्मणाधिपति – अरिया निब्बानं गरुं कत्वा पच्चवेक्खन्ति; निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो; चक्खुं…पे… वत्थुं… नहेतू अहेतुके खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (१)

अनन्तरपच्चयो

१७९. नहेतु सहेतुको धम्मो नहेतुसहेतुकस्स धम्मस्स अनन्तरपच्चयेन पच्चयो – पुरिमा पुरिमा नहेतू सहेतुका खन्धा पच्छिमानं पच्छिमानं नहेतुसहेतुकानं खन्धानं अनन्तरपच्चयेन पच्चयो; अनुलोमं गोत्रभुस्स…पे… नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. (१)

नहेतु सहेतुको धम्मो नहेतुअहेतुकस्स धम्मस्स अनन्तरपच्चयेन पच्चयो – नहेतु सहेतुकं चुतिचित्तं नहेतुअहेतुकस्स उपपत्तिचित्तस्स अनन्तरपच्चयेन पच्चयो; नहेतु सहेतुकं भवङ्गं आवज्जनाय, नहेतु सहेतुकं भवङ्गं नहेतुअहेतुकस्स भवङ्गस्स, नहेतू सहेतुका खन्धा नहेतुअहेतुकस्स वुट्ठानस्स अनन्तरपच्चयेन पच्चयो. (२)

नहेतु अहेतुको धम्मो नहेतुअहेतुकस्स धम्मस्स अनन्तरपच्चयेन पच्चयो – पुरिमा पुरिमा नहेतू अहेतुका खन्धा पच्छिमानं पच्छिमानं नहेतुअहेतुकानं खन्धानं अनन्तरपच्चयेन पच्चयो; आवज्जना पञ्चन्नं विञ्ञाणानं अनन्तरपच्चयेन पच्चयो. (१)

नहेतु अहेतुको धम्मो नहेतुसहेतुकस्स धम्मस्स अनन्तरपच्चयेन पच्चयो – नहेतु अहेतुकं चुतिचित्तं नहेतुसहेतुकस्स उपपत्तिचित्तस्स अनन्तरपच्चयेन पच्चयो; आवज्जना नहेतुसहेतुकानं खन्धानं अनन्तरपच्चयेन पच्चयो; नहेतू अहेतुका खन्धा नहेतुसहेतुकस्स वुट्ठानस्स अनन्तरपच्चयेन पच्चयो. (२)

समनन्तरपच्चयादि

१८०. नहेतु सहेतुको धम्मो नहेतुसहेतुकस्स धम्मस्स समनन्तरपच्चयेन पच्चयो… सहजातपच्चयेन पच्चयो (इह घटना नत्थि, सत्त पञ्हा)… अञ्ञमञ्ञपच्चयेन पच्चयो (छ पञ्हा)… निस्सयपच्चयेन पच्चयो (पवत्तिपटिसन्धि सत्त पञ्हा, इह घटना नत्थि).

उपनिस्सयपच्चयो

१८१. नहेतु सहेतुको धम्मो नहेतुसहेतुकस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… मानं जप्पेति, दिट्ठिं गण्हाति; सीलं…पे… पत्थनं उपनिस्साय दानं देति…पे… सङ्घं भिन्दति; सद्धा…पे… पत्थना सद्धाय…पे… पत्थनाय मग्गस्स फलसमापत्तिया उपनिस्सयपच्चयेन पच्चयो. (१)

नहेतु सहेतुको धम्मो नहेतुअहेतुकस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धा कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो; सीलं…पे… पत्थना कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो; सद्धा…पे… पत्थना कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो. (२)

१८२. नहेतु अहेतुको धम्मो नहेतुअहेतुकस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – कायिकं सुखं कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो; कायिकं दुक्खं… उतु… भोजनं… सेनासनं कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो; कायिकं सुखं… कायिकं दुक्खं… उतु… भोजनं… सेनासनं कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो. (१)

नहेतु अहेतुको धम्मो नहेतुसहेतुकस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – कायिकं सुखं उपनिस्साय दानं देति…पे… सङ्घं भिन्दति; कायिकं दुक्खं… उतुं… भोजनं… सेनासनं उपनिस्साय दानं देति…पे… सङ्घं भिन्दति; कायिकं सुखं …पे… सेनासनं सद्धाय…पे… पत्थनाय मग्गस्स फलसमापत्तिया उपनिस्सयपच्चयेन पच्चयो. (२)

पुरेजातपच्चयो

१८३. नहेतु अहेतुको धम्मो नहेतुअहेतुकस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; कुसलाकुसले निरुद्धे नहेतु अहेतुको विपाको तदारम्मणता उप्पज्जति; रूपायतनं चक्खुविञ्ञाणस्स पुरेजातपच्चयेन पच्चयो…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स… वत्थु नहेतुअहेतुकानं खन्धानं पुरेजातपच्चयेन पच्चयो. (१)

नहेतु अहेतुको धम्मो नहेतुसहेतुकस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति, कुसलाकुसले निरुद्धे नहेतु सहेतुको विपाको तदारम्मणता उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. वत्थुपुरेजातं – वत्थु नहेतुसहेतुकानं खन्धानं पुरेजातपच्चयेन पच्चयो. (२)

पच्छाजातपच्चयो

१८४. नहेतु सहेतुको धम्मो नहेतुअहेतुकस्स धम्मस्स पच्छाजातपच्चयेन पच्चयो – पच्छाजाता नहेतू सहेतुका खन्धा पुरेजातस्स इमस्स कायस्स पच्छाजातपच्चयेन पच्चयो. (१)

नहेतु अहेतुको धम्मो नहेतुअहेतुकस्स धम्मस्स पच्छाजातपच्चयेन पच्चयो – पच्छाजाता नहेतू अहेतुका खन्धा पुरेजातस्स इमस्स कायस्स पच्छाजातपच्चयेन पच्चयो. (१)

आसेवनपच्चयो

१८५. नहेतु सहेतुको धम्मो नहेतुसहेतुकस्स धम्मस्स आसेवनपच्चयेन पच्चयो – पुरिमा पुरिमा नहेतू सहेतुका खन्धा पच्छिमानं पच्छिमानं नहेतुसहेतुकानं खन्धानं आसेवनपच्चयेन पच्चयो… अनुलोमं गोत्रभुस्स… अनुलोमं वोदानस्स… गोत्रभु मग्गस्स… वोदानं मग्गस्स आसेवनपच्चयेन पच्चयो. (१)

नहेतु अहेतुको धम्मो नहेतुअहेतुकस्स धम्मस्स आसेवनपच्चयेन पच्चयो – पुरिमा पुरिमा नहेतू अहेतुका खन्धा पच्छिमानं पच्छिमानं नहेतुअहेतुकानं खन्धानं आसेवनपच्चयेन पच्चयो. (१)

कम्मपच्चयो

१८६. नहेतु सहेतुको धम्मो नहेतुसहेतुकस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नहेतु सहेतुका चेतना सम्पयुत्तकानं खन्धानं कम्मपच्चयेन पच्चयो; पटिसन्धिक्खणे…पे…. नानाक्खणिका – नहेतु सहेतुका चेतना विपाकानं नहेतुसहेतुकानं खन्धानं कम्मपच्चयेन पच्चयो. (१)

नहेतु सहेतुको धम्मो नहेतुअहेतुकस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नहेतु सहेतुका चेतना चित्तसमुट्ठानानं रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नहेतु सहेतुका चेतना विपाकानं नहेतुअहेतुकानं खन्धानं कटत्ता च रूपानं कम्मपच्चयेन पच्चयो. (१)

नहेतु सहेतुको धम्मो नहेतुसहेतुकस्स च नहेतुअहेतुकस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – नहेतु सहेतुका चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नहेतु सहेतुका चेतना विपाकानं नहेतुसहेतुकानं खन्धानं कटत्ता च रूपानं कम्मपच्चयेन पच्चयो. (१)

नहेतु अहेतुको धम्मो नहेतुअहेतुकस्स धम्मस्स कम्मपच्चयेन पच्चयो. सहजाता – नहेतु अहेतुका चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे नहेतु अहेतुका चेतना सम्पयुत्तकानं खन्धानं कटत्ता च रूपानं कम्मपच्चयेन पच्चयो. (१)

विपाकपच्चयो

१८७. नहेतु सहेतुको धम्मो नहेतुसहेतुकस्स धम्मस्स विपाकपच्चयेन पच्चयो… तीणि.

नहेतु अहेतुको धम्मो नहेतुअहेतुकस्स धम्मस्स विपाकपच्चयेन पच्चयो… एकं.

आहारपच्चयो

१८८. नहेतु सहेतुको धम्मो नहेतुसहेतुकस्स धम्मस्स आहारपच्चयेन पच्चयो… तीणि.

नहेतु अहेतुको धम्मो नहेतुअहेतुकस्स धम्मस्स आहारपच्चयेन पच्चयो – नहेतु अहेतुका आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो; पटिसन्धिक्खणे…पे… कबळीकारो आहारो इमस्स कायस्स आहारपच्चयेन पच्चयो. (१)

इन्द्रियपच्चयो

१८९. नहेतु सहेतुको धम्मो नहेतुसहेतुकस्स धम्मस्स इन्द्रियपच्चयेन पच्चयो… तीणि.

नहेतु अहेतुको धम्मो नहेतुअहेतुकस्स धम्मस्स इन्द्रियपच्चयेन पच्चयो – नहेतु अहेतुका इन्द्रिया सम्पयुत्तकानं खन्धानं चित्तसमुट्ठानानञ्च रूपानं इन्द्रियपच्चयेन पच्चयो; पटिसन्धिक्खणे…पे… रूपजीवितिन्द्रियं कटत्तारूपानं इन्द्रियपच्चयेन पच्चयो.

झानपच्चयादि

१९०. नहेतु सहेतुको धम्मो नहेतुसहेतुकस्स धम्मस्स झानपच्चयेन पच्चयो…पे… (चत्तारिपि कातब्बानि), मग्गपच्चयेन पच्चयो… तीणि.

सम्पयुत्तपच्चयो

१९१. नहेतु सहेतुको धम्मो नहेतुसहेतुकस्स धम्मस्स सम्पयुत्तपच्चयेन पच्चयो – नहेतु सहेतुको एको खन्धो तिण्णन्नं खन्धानं…पे… पटिसन्धिक्खणे…पे…. (१)

नहेतु अहेतुको धम्मो नहेतुअहेतुकस्स धम्मस्स सम्पयुत्तपच्चयेन पच्चयो – नहेतु अहेतुको एको खन्धो तिण्णन्नं खन्धानं…पे… पटिसन्धिक्खणे…पे…. (२)

विप्पयुत्तपच्चयो

१९२. नहेतु सहेतुको धम्मो नहेतुअहेतुकस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – नहेतू सहेतुका खन्धा चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे…. पच्छाजाता – नहेतू सहेतुका खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

नहेतु अहेतुको धम्मो नहेतुअहेतुकस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – नहेतू अहेतुका खन्धा चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे… खन्धा वत्थुस्स विप्पयुत्तपच्चयेन पच्चयो; वत्थु खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु नहेतुसहेतुकानं खन्धानं विप्पयुत्तपच्चयेन पच्चयो. पच्छाजाता – नहेतू अहेतुका खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

नहेतु अहेतुको धम्मो नहेतुसहेतुकस्स धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु नहेतुसहेतुकानं खन्धानं विप्पयुत्तपच्चयेन पच्चयो. पुरेजातं – वत्थु नहेतुसहेतुकानं खन्धानं विप्पयुत्तपच्चयेन पच्चयो. (२)

अत्थिपच्चयो

१९३. नहेतु सहेतुको धम्मो नहेतुसहेतुकस्स धम्मस्स अत्थिपच्चयेन पच्चयो – नहेतु सहेतुको एको खन्धो तिण्णन्नं खन्धानं…पे… पटिसन्धिक्खणे…पे…. (१)

नहेतु सहेतुको धम्मो नहेतुअहेतुकस्स धम्मस्स अत्थिपच्चयेन पच्चयो – सहजातं, पच्छाजातं…पे…. (२)

नहेतु सहेतुको धम्मो नहेतुसहेतुकस्स च नहेतुअहेतुकस्स च धम्मस्स अत्थिपच्चयेन पच्चयो – नहेतु सहेतुको एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… पटिसन्धिक्खणे…पे…. (३)

नहेतु अहेतुको धम्मो नहेतुअहेतुकस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – नहेतु अहेतुको एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… (याव असञ्ञसत्ता). पुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; कुसलाकुसले निरुद्धे नहेतु अहेतुको विपाको तदारम्मणता उप्पज्जति; रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… चक्खायतनं…पे… कायायतनं…पे… वत्थु नहेतुअहेतुकानं खन्धानं अत्थिपच्चयेन पच्चयो. पच्छाजाता – नहेतू अहेतुका खन्धा पुरेजातस्स…पे… कबळीकारो आहारो इमस्स कायस्स…पे… रूपजीवितिन्द्रियं कटत्तारूपानं अत्थिपच्चयेन पच्चयो. (१)

नहेतु अहेतुको धम्मो नहेतुसहेतुकस्स धम्मस्स अत्थिपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु नहेतुसहेतुकानं खन्धानं अत्थिपच्चयेन पच्चयो. पुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति, कुसलाकुसले निरुद्धे नहेतु सहेतुको विपाको तदारम्मणता उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. वत्थुपुरेजातं – वत्थु नहेतुसहेतुकानं खन्धानं अत्थिपच्चयेन पच्चयो. (२)

१९४. नहेतु सहेतुको च नहेतु अहेतुको च धम्मा नहेतुसहेतुकस्स धम्मस्स अत्थिपच्चयेन पच्चयो – सहजातं, पुरेजातं. सहजातो – नहेतु सहेतुको एको खन्धो च वत्थु च तिण्णन्नं खन्धानं…पे… पटिसन्धिक्खणे…पे… नहेतु सहेतुको एको खन्धो च वत्थु च तिण्णन्नं खन्धानं…पे…. (१)

नहेतु सहेतुको च नहेतु अहेतुको च धम्मा नहेतुअहेतुकस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – नहेतू सहेतुका खन्धा च महाभूता च चित्तसमुट्ठानानं रूपानं अत्थिपच्चयेन पच्चयो; पटिसन्धिक्खणे…पे…. पच्छाजाता – नहेतू सहेतुका खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – नहेतू सहेतुका खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो…पे…. (२)