१. विभङ्गवारो

हेतुपच्चयो

५५. परित्तो धम्मो परित्तस्स धम्मस्स हेतुपच्चयेन पच्चयो – परित्ता हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. पटिसन्धिक्खणे…पे…. (१)

महग्गतो धम्मो महग्गतस्स धम्मस्स हेतुपच्चयेन पच्चयो… तीणि (पवत्तिपटिसन्धि कातब्बा).

अप्पमाणो धम्मो अप्पमाणस्स धम्मस्स हेतुपच्चयेन पच्चयो… तीणि.

आरम्मणपच्चयो

५६. परित्तो धम्मो परित्तस्स धम्मस्स आरम्मणपच्चयेन पच्चयो – दानं दत्वा सीलं समादियित्वा उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति, अरिया गोत्रभुं पच्चवेक्खन्ति, वोदानं पच्चवेक्खन्ति, पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति. चक्खुं…पे… वत्थुं… परित्ते खन्धे अनिच्चतो…पे… विपस्सन्ति अस्सादेन्ति अभिनन्दन्ति, तं आरब्भ रागो उप्पज्जति …पे… दोमनस्सं उप्पज्जति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स आरम्मणपच्चयेन पच्चयो. (१)

परित्तो धम्मो महग्गतस्स धम्मस्स आरम्मणपच्चयेन पच्चयो – दिब्बेन चक्खुना रूपं पस्सति, दिब्बाय सोतधातुया सद्दं सुणाति, चेतोपरियञाणेन परित्तचित्तसमङ्गिस्स चित्तं जानाति. परित्ता खन्धा इद्धिविधञाणस्स, चेतोपरियञाणस्स पुब्बेनिवासानुस्सतिञाणस्स यथाकम्मूपगञाणस्स अनागतंसञाणस्स आरम्मणपच्चयेन पच्चयो. (२)

५७. महग्गतो धम्मो महग्गतस्स धम्मस्स आरम्मणपच्चयेन पच्चयो – चेतोपरियञाणेन महग्गतचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स… आकिञ्चञ्ञायतनं नेवसञ्ञानासञ्ञायतनस्स आरम्मणपच्चयेन पच्चयो. महग्गता खन्धा इद्धिविधञाणस्स, चेतोपरियञाणस्स पुब्बेनिवासानुस्सतिञाणस्स यथाकम्मूपगञाणस्स अनागतंसञाणस्स आरम्मणपच्चयेन पच्चयो. (१)

महग्गतो धम्मो परित्तस्स धम्मस्स आरम्मणपच्चयेन पच्चयो – पठमं झानं पच्चवेक्खति…पे… नेवसञ्ञानासञ्ञायतनं पच्चवेक्खति, दिब्बं चक्खुं पच्चवेक्खति, दिब्बं सोतधातुं पच्चवेक्खति, इद्धिविधञाणं पच्चवेक्खति, चेतोपरियञाणं पच्चवेक्खति, पुब्बेनिवासानुस्सतिञाणं पच्चवेक्खति, यथाकम्मूपगञाणं पच्चवेक्खति, अनागतंसञाणं पच्चवेक्खति. महग्गते खन्धे अनिच्चतो…पे… विप्पस्सति अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति. (२)

५८. अप्पमाणो धम्मो अप्पमाणस्स धम्मस्स आरम्मणपच्चयेन पच्चयो – निब्बानं मग्गस्स, फलस्स आरम्मणपच्चयेन पच्चयो. (१)

अप्पमाणो धम्मो परित्तस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति, निब्बानं गोत्रभुस्स, वोदानस्स, आवज्जनाय आरम्मणपच्चयेन पच्चयो. (२)

अप्पमाणो धम्मो महग्गतस्स धम्मस्स आरम्मणपच्चयेन पच्चयो – अरिया चेतोपरियञाणेन अप्पमाणचित्तसमङ्गिस्स चित्तं जानन्ति, अप्पमाणा खन्धा चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स आरम्मणपच्चयेन पच्चयो. (३)

अधिपतिपच्चयो

५९. परित्तो धम्मो परित्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं समादियित्वा उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि गरुं कत्वा पच्चवेक्खति. सेक्खा गोत्रभुं गरुं कत्वा पच्चवेक्खन्ति, वोदानं गरुं कत्वा पच्चवेक्खन्ति. चक्खुं…पे… वत्थुं… परित्ते खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – परित्ताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

महग्गतो धम्मो महग्गतस्स धम्मस्स अधिपतिपच्चयेन पच्चयो. सहजाताधिपति – महग्गताधिपति सम्पयुत्तकानं खन्धानं अधिपतिपच्चयेन पच्चयो. (१)

महग्गतो धम्मो परित्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – पठमं झानं गरुं कत्वा…पे… नेवसञ्ञानासञ्ञायतनं…पे… दिब्बं चक्खुं…पे… अनागतंसञाणं गरुं कत्वा पच्चवेक्खति. महग्गते खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति… दिट्ठि उप्पज्जति. सहजाताधिपति – महग्गताधिपति चित्तसमुट्ठानानं रूपानं अधिपतिपच्चयेन पच्चयो. (२)

महग्गतो धम्मो परित्तस्स च महग्गतस्स च धम्मस्स अधिपतिपच्चयेन पच्चयो. सहजाताधिपति – महग्गताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

६०. अप्पमाणो धम्मो अप्पमाणस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – निब्बानं मग्गस्स… फलस्स अधिपतिपच्चयेन पच्चयो. सहजाताधिपति – अप्पमाणाधिपति सम्पयुत्तकानं खन्धानं अधिपतिपच्चयेन पच्चयो. (१)

अप्पमाणो धम्मो परित्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं गरुं कत्वा पच्चवेक्खन्ति, निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स अधिपतिपच्चयेन पच्चयो. सहजाताधिपति – अप्पमाणाधिपति चित्तसमुट्ठानानं रूपानं अधिपतिपच्चयेन पच्चयो. (२)

अप्पमाणो धम्मो परित्तस्स च अप्पमाणस्स च धम्मस्स अधिपतिपच्चयेन पच्चयो. सहजाताधिपति – अप्पमाणाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

अनन्तरपच्चयो

६१. परित्तो धम्मो परित्तस्स धम्मस्स अनन्तरपच्चयेन पच्चयो – पुरिमा पुरिमा परित्ता खन्धा पच्छिमानं पच्छिमानं परित्तानं खन्धानं अनन्तरपच्चयेन पच्चयो. अनुलोमं गोत्रभुस्स… अनुलोमं वोदानस्स… आवज्जना परित्तानं खन्धानं अनन्तरपच्चयेन पच्चयो. (१)

परित्तो धम्मो महग्गतस्स धम्मस्स अनन्तरपच्चयेन पच्चयो – परित्तं चुतिचित्तं महग्गतस्स उपपत्तिचित्तस्स अनन्तरपच्चयेन पच्चयो. परित्ता खन्धा महग्गतस्स वुट्ठानस्स अनन्तरपच्चयेन पच्चयो. पठमस्स झानस्स परिकम्मं…पे… नेवसञ्ञानासञ्ञायतनस्स परिकम्मं…पे… दिब्बस्स चक्खुस्स परिकम्मं…पे… अनागतंसञाणस्स परिकम्मं अनागतंसञाणस्स अनन्तरपच्चयेन पच्चयो. (२)

परित्तो धम्मो अप्पमाणस्स धम्मस्स अनन्तरपच्चयेन पच्चयो – गोत्रभु मग्गस्स… वोदानं मग्गस्स… अनुलोमं फलसमापत्तिया अनन्तरपच्चयेन पच्चयो. (३)

६२. महग्गतो धम्मो महग्गतस्स धम्मस्स अनन्तरपच्चयेन पच्चयो – पुरिमा पुरिमा महग्गता खन्धा पच्छिमानं पच्छिमानं महग्गतानं खन्धानं अनन्तरपच्चयेन पच्चयो. (१)

महग्गतो धम्मो परित्तस्स धम्मस्स अनन्तरपच्चयेन पच्चयो – महग्गतं चुतिचित्तं परित्तस्स उपपत्तिचित्तस्स अनन्तरपच्चयेन पच्चयो. महग्गतं भवङ्गं आवज्जनाय अनन्तरपच्चयेन पच्चयो. महग्गता खन्धा परित्तस्स वुट्ठानस्स अनन्तरपच्चयेन पच्चयो. (२)

महग्गतो धम्मो अप्पमाणस्स धम्मस्स अनन्तरपच्चयेन पच्चयो – नेवसञ्ञानासञ्ञायतनं निरोधा वुट्ठहन्तस्स फलसमापत्तिया अनन्तरपच्चयेन पच्चयो. (३)

६३. अप्पमाणो धम्मो अप्पमाणस्स धम्मस्स अनन्तरपच्चयेन पच्चयो – पुरिमा पुरिमा अप्पमाणा खन्धा पच्छिमानं पच्छिमानं अप्पमाणानं खन्धानं अनन्तरपच्चयेन पच्चयो. मग्गो फलस्स… फलं फलस्स अनन्तरपच्चयेन पच्चयो. (१)

अप्पमाणो धम्मो परित्तस्स धम्मस्स अनन्तरपच्चयेन पच्चयो – फलं परित्तस्स वुट्ठानस्स अनन्तरपच्चयेन पच्चयो. (२)

अप्पमाणो धम्मो महग्गतस्स धम्मस्स अनन्तरपच्चयेन पच्चयो – फलं महग्गतस्स वुट्ठानस्स अनन्तरपच्चयेन पच्चयो. (३)

(समनन्तरपच्चयं अनन्तरपच्चयसदिसं.)

सहजातपच्चयो

६४. परित्तो धम्मो परित्तस्स धम्मस्स सहजातपच्चयेन पच्चयो – परित्तो एको खन्धो तिण्णन्नं खन्धानं चित्तसमुट्ठानानञ्च रूपानं सहजातपच्चयेन पच्चयो…पे… द्वे खन्धा…पे… पटिसन्धिक्खणे…पे… खन्धा वत्थुस्स, वत्थु खन्धानं सहजातपच्चयेन पच्चयो; एकं महाभूतं…पे… असञ्ञसत्तानं…पे…. (१)

परित्तो धम्मो महग्गतस्स धम्मस्स सहजातपच्चयेन पच्चयो – पटिसन्धिक्खणे वत्थु महग्गतानं खन्धानं सहजातपच्चयेन पच्चयो. (२)

६५. महग्गतो धम्मो महग्गतस्स धम्मस्स सहजातपच्चयेन पच्चयो – महग्गतो एको खन्धो तिण्णन्नं खन्धानं…पे… द्वे खन्धा…पे… पटिसन्धिक्खणे…पे…. (१)

महग्गतो धम्मो परित्तस्स धम्मस्स सहजातपच्चयेन पच्चयो – महग्गता खन्धा चित्तसमुट्ठानानं रूपानं सहजातपच्चयेन पच्चयो. पटिसन्धिक्खणे महग्गता खन्धा कटत्तारूपानं सहजातपच्चयेन पच्चयो. (२)

महग्गतो धम्मो परित्तस्स च महग्गतस्स च धम्मस्स सहजातपच्चयेन पच्चयो – महग्गतो एको खन्धो तिण्णन्नं खन्धानं चित्तसमुट्ठानानञ्च रूपानं सहजातपच्चयेन पच्चयो…पे… द्वे खन्धा…पे… पटिसन्धिक्खणे…पे…. (३)

६६. अप्पमाणो धम्मो अप्पमाणस्स धम्मस्स सहजातपच्चयेन पच्चयो – अप्पमाणो एको खन्धो तिण्णन्नं खन्धानं सहजातपच्चयेन पच्चयो…पे…. (१)

अप्पमाणो धम्मो परित्तस्स धम्मस्स सहजातपच्चयेन पच्चयो – अप्पमाणा खन्धा चित्तसमुट्ठानानं रूपानं सहजातपच्चयेन पच्चयो. (२)

अप्पमाणो धम्मो परित्तस्स च अप्पमाणस्स च धम्मस्स सहजातपच्चयेन पच्चयो – अप्पमाणो एको खन्धो तिण्णन्नं खन्धानं चित्तसमुट्ठानानञ्च रूपानं सहजातपच्चयेन पच्चयो…पे…. (३)

६७. परित्तो च अप्पमाणो च धम्मा परित्तस्स धम्मस्स सहजातपच्चयेन पच्चयो – अप्पमाणा खन्धा च महाभूता च चित्तसमुट्ठानानं रूपानं सहजातपच्चयेन पच्चयो. (१)

परित्तो च महग्गतो च धम्मा परित्तस्स धम्मस्स सहजातपच्चयेन पच्चयो – महग्गता खन्धा च महाभूता च चित्तसमुट्ठानानं रूपानं सहजातपच्चयेन पच्चयो. पटिसन्धिक्खणे महग्गता खन्धा च महाभूता च कटत्तारूपानं सहजातपच्चयेन पच्चयो. (१)

परित्तो च महग्गतो च धम्मा महग्गतस्स धम्मस्स सहजातपच्चयेन पच्चयो – पटिसन्धिक्खणे महग्गतो एको खन्धो च वत्थु च तिण्णन्नं खन्धानं सहजातपच्चयेन पच्चयो…पे…. (२)

अञ्ञमञ्ञपच्चयो

६८. परित्तो धम्मो परित्तस्स धम्मस्स अञ्ञमञ्ञपच्चयेन पच्चयो – परित्तो एको खन्धो तिण्णन्नं खन्धानं अञ्ञमञ्ञपच्चयेन पच्चयो…पे… पटिसन्धिक्खणे…पे… खन्धा वत्थुस्स…पे… वत्थु खन्धानं अञ्ञमञ्ञपच्चयेन पच्चयो; एकं महाभूतं…पे… असञ्ञसत्तानं…पे…. (१)

परित्तो धम्मो महग्गतस्स धम्मस्स अञ्ञमञ्ञपच्चयेन पच्चयो…पे… पटिसन्धिक्खणे वत्थु महग्गतानं खन्धानं अञ्ञमञ्ञपच्चयेन पच्चयो…पे…. (२)

महग्गतो धम्मो महग्गतस्स धम्मस्स अञ्ञमञ्ञपच्चयेन पच्चयो – महग्गतो एको खन्धो तिण्णन्नं खन्धानं अञ्ञमञ्ञपच्चयेन पच्चयो…पे… पटिसन्धिक्खणे…पे…. (१)

महग्गतो धम्मो परित्तस्स धम्मस्स अञ्ञमञ्ञपच्चयेन पच्चयो – पटिसन्धिक्खणे महग्गता खन्धा वत्थुस्स अञ्ञमञ्ञपच्चयेन पच्चयो. (२)

महग्गतो धम्मो परित्तस्स च महग्गतस्स च धम्मस्स अञ्ञमञ्ञपच्चयेन पच्चयो – पटिसन्धिक्खणे महग्गतो एको खन्धो तिण्णन्नं खन्धानं वत्थुस्स च अञ्ञमञ्ञपच्चयेन पच्चयो…पे…. (३)

अप्पमाणो धम्मो अप्पमाणस्स धम्मस्स अञ्ञमञ्ञपच्चयेन पच्चयो – अप्पमाणो एको खन्धो तिण्णन्नं खन्धानं अञ्ञमञ्ञपच्चयेन पच्चयो…पे… द्वे खन्धा…पे…. (१)

परित्तो च महग्गतो च धम्मा महग्गतस्स धम्मस्स अञ्ञमञ्ञपच्चयेन पच्चयो – पटिसन्धिक्खणे महग्गतो एको खन्धो च वत्थु च तिण्णन्नं खन्धानं अञ्ञमञ्ञपच्चयेन पच्चयो…पे…. (१)

निस्सयपच्चयो

६९. परित्तो धम्मो परित्तस्स धम्मस्स निस्सयपच्चयेन पच्चयो – परित्तो एको खन्धो तिण्णन्नं खन्धानं चित्तसमुट्ठानानञ्च रूपानं निस्सयपच्चयेन पच्चयो…पे… द्वे खन्धा…पे… पटिसन्धिक्खणे…पे… खन्धा वत्थुस्स…पे… वत्थु खन्धानं निस्सयपच्चयेन पच्चयो…पे… एकं महाभूतं…पे… असञ्ञसत्तानं एकं महाभूतं…पे… चक्खायतनं चक्खुविञ्ञाणस्स…पे… कायायतनं कायविञ्ञाणस्स… वत्थु परित्तानं खन्धानं निस्सयपच्चयेन पच्चयो. (१)

परित्तो धम्मो महग्गतस्स धम्मस्स निस्सयपच्चयेन पच्चयो – वत्थु महग्गतानं खन्धानं निस्सयपच्चयेन पच्चयो. पटिसन्धिक्खणे वत्थु महग्गतानं खन्धानं निस्सयपच्चयेन पच्चयो. (२)

परित्तो धम्मो अप्पमाणस्स धम्मस्स निस्सयपच्चयेन पच्चयो – वत्थु अप्पमाणानं खन्धानं निस्सयपच्चयेन पच्चयो. (३)

७०. महग्गतो धम्मो महग्गतस्स धम्मस्स निस्सयपच्चयेन पच्चयो – महग्गतो एको खन्धो तिण्णन्नं खन्धानं…पे… द्वे खन्धा…पे… पटिसन्धिक्खणे…पे…. (१)

महग्गतो धम्मो परित्तस्स धम्मस्स निस्सयपच्चयेन पच्चयो – महग्गता खन्धा चित्तसमुट्ठानानं रूपानं निस्सयपच्चयेन पच्चयो. पटिसन्धिक्खणे महग्गता खन्धा कटत्तारूपानं निस्सयपच्चयेन पच्चयो. (२)

महग्गतो धम्मो परित्तस्स च महग्गतस्स च धम्मस्स निस्सयपच्चयेन पच्चयो – महग्गतो एको खन्धो तिण्णन्नं खन्धानं चित्तसमुट्ठानानञ्च रूपानं निस्सयपच्चयेन पच्चयो…पे… द्वे खन्धा…पे… पटिसन्धिक्खणे…पे…. (३)

७१. अप्पमाणो धम्मो अप्पमाणस्स धम्मस्स निस्सयपच्चयेन पच्चयो – अप्पमाणो एको खन्धो तिण्णन्नं खन्धानं निस्सयपच्चयेन पच्चयो…पे…. (१)

अप्पमाणो धम्मो परित्तस्स धम्मस्स निस्सयपच्चयेन पच्चयो – अप्पमाणा खन्धा चित्तसमुट्ठानानं रूपानं निस्सयपच्चयेन पच्चयो. (२)

अप्पमाणो धम्मो परित्तस्स च अप्पमाणस्स च धम्मस्स निस्सयपच्चयेन पच्चयो – अप्पमाणो एको खन्धो तिण्णन्नं खन्धानं चित्तसमुट्ठानानञ्च रूपानं निस्सयपच्चयेन पच्चयो…पे…. (३)

परित्तो च अप्पमाणो च धम्मा परित्तस्स धम्मस्स निस्सयपच्चयेन पच्चयो – अप्पमाणा खन्धा च महाभूता च चित्तसमुट्ठानानं रूपानं निस्सयपच्चयेन पच्चयो. (१)

परित्तो च अप्पमाणो च धम्मा अप्पमाणस्स धम्मस्स निस्सयपच्चयेन पच्चयो – अप्पमाणो एको खन्धो च वत्थु च तिण्णन्नं खन्धानं निस्सयपच्चयेन पच्चयो…पे… द्वे खन्धा…पे…. (२)

परित्तो च महग्गतो च धम्मा परित्तस्स धम्मस्स निस्सयपच्चयेन पच्चयो – महग्गता खन्धा च महाभूता च चित्तसमुट्ठानानं रूपानं निस्सयपच्चयेन पच्चयो. पटिसन्धिक्खणे महग्गता खन्धा च महाभूता च कटत्तारूपानं निस्सयपच्चयेन पच्चयो. (१)

परित्तो च महग्गतो च धम्मा महग्गतस्स धम्मस्स निस्सयपच्चयेन पच्चयो – महग्गतो एको खन्धो च वत्थु च तिण्णन्नं खन्धानं निस्सयपच्चयेन पच्चयो…पे… पटिसन्धिक्खणे महग्गतो एको खन्धो च वत्थु च तिण्णन्नं खन्धानं निस्सयपच्चयेन पच्चयो…पे… द्वे खन्धा…पे…. (२)

उपनिस्सयपच्चयो

७२. परित्तो धम्मो परित्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – परित्तं सद्धं उपनिस्साय दानं देति, सीलं समादियति, उपोसथकम्मं करोति, विपस्सनं उप्पादेति, मानं जप्पेति, दिट्ठिं गण्हाति, परित्तं सीलं…पे… पञ्ञं… रागं…पे… पत्थनं… कायिकं सुखं…पे… सेनासनं उपनिस्साय दानं देति, सीलं…पे… उपोसथं…पे… विपस्सनं उप्पादेति, पाणं हनति…पे… सङ्घं भिन्दति. परित्ता सद्धा…पे… पञ्ञा, रागो…पे… पत्थना, कायिकं सुखं…पे… सेनासनं परित्ताय सद्धाय…पे… पञ्ञाय, रागस्स…पे… पत्थनाय, कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो. कुसलाकुसलं कम्मं विपाकस्स उपनिस्सयपच्चयेन पच्चयो. पाणातिपातो पाणातिपातस्स उपनिस्सयपच्चयेन पच्चयो (चक्कं कातब्बं). मातुघातिकम्मं मातुघातिकम्मस्स उपनिस्सयपच्चयेन पच्चयो (चक्कं कातब्बं कुसलत्तिकसदिसं). (१)

परित्तो धम्मो महग्गतस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – परित्तं सद्धं उपनिस्साय महग्गतं झानं उप्पादेति, अभिञ्ञं उप्पादेति, समापत्तिं उप्पादेति. परित्तं सीलं…पे… पञ्ञं… रागं…पे… सेनासनं उपनिस्साय महग्गतं झानं उप्पादेति, अभिञ्ञं उप्पादेति, समापत्तिं उप्पादेति. परित्ता सद्धा…पे… सेनासनं महग्गताय सद्धाय…पे… पञ्ञाय उपनिस्सयपच्चयेन पच्चयो. पठमस्स झानस्स परिकम्मं…पे… नेवसञ्ञानासञ्ञायतनस्स परिकम्मं नेवसञ्ञानासञ्ञायतनस्स उपनिस्सयपच्चयेन पच्चयो. दिब्बस्स चक्खुस्स परिकम्मं…पे… अनागतंसञाणस्स परिकम्मं…पे…. (२)

परित्तो धम्मो अप्पमाणस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो परित्तं सद्धं उपनिस्साय अप्पमाणं झानं उप्पादेति, मग्गं उप्पादेति, फलसमापत्तिं उप्पादेति. परित्तं सीलं…पे… पञ्ञं… रागं…पे… पत्थनं… कायिकं सुखं…पे… सेनासनं उपनिस्साय अप्पमाणं झानं उप्पादेति, मग्गं उप्पादेति, फलसमापत्तिं उप्पादेति. परित्ता सद्धा…पे… सेनासनं अप्पमाणाय सद्धाय…पे… पञ्ञाय, मग्गस्स फलसमापत्तिया उपनिस्सयपच्चयेन पच्चयो. पठमस्स मग्गस्स परिकम्मं पठमस्स मग्गस्स…पे… चतुत्थस्स मग्गस्स परिकम्मं चतुत्थस्स मग्गस्स उपनिस्सयपच्चयेन पच्चयो. (३)

७३. महग्गतो धम्मो महग्गतस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – महग्गतं सद्धं उपनिस्साय महग्गतं झानं उप्पादेति, अभिञ्ञं उप्पादेति, समापत्तिं उप्पादेति. महग्गतं सीलं…पे… पञ्ञं उपनिस्साय महग्गतं झानं उप्पादेति, अभिञ्ञं उप्पादेति, समापत्तिं उप्पादेति. महग्गता सद्धा…पे… पञ्ञा महग्गताय सद्धाय…पे… पञ्ञाय उपनिस्सयपच्चयेन पच्चयो. पठमं झानं दुतियस्स झानस्स…पे… आकिञ्चञ्ञायतनं नेवसञ्ञानासञ्ञायतनस्स उपनिस्सयपच्चयेन पच्चयो. (१)

महग्गतो धम्मो परित्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – महग्गतं सद्धं उपनिस्साय दानं देति, सीलं समादियति, उपोसथकम्मं करोति, विपस्सनं उप्पादेति, मानं जप्पेति, दिट्ठिं गण्हाति, महग्गतं सीलं…पे… पञ्ञं उपनिस्साय दानं देति…पे… विपस्सनं उप्पादेति…पे… महग्गता सद्धा…पे… पञ्ञा परित्ताय सद्धाय…पे… पञ्ञाय…पे… कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो. (२)

महग्गतो धम्मो अप्पमाणस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – महग्गतं सद्धं उपनिस्साय अप्पमाणं झानं उप्पादेति, मग्गं उप्पादेति, फलसमापत्तिं उप्पादेति. महग्गतं सीलं…पे… पञ्ञं उपनिस्साय अप्पमाणं झानं उप्पादेति, मग्गं उप्पादेति, फलसमापत्तिं उप्पादेति. महग्गता सद्धा…पे… पञ्ञा अप्पमाणाय सद्धाय…पे… पञ्ञाय मग्गस्स फलसमापत्तिया उपनिस्सयपच्चयेन पच्चयो. (३)

७४. अप्पमाणो धम्मो अप्पमाणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अप्पमाणं सद्धं उपनिस्साय अप्पमाणं झानं उप्पादेति, मग्गं उप्पादेति, फलसमापत्तिं उप्पादेति. अप्पमाणं सीलं…पे… पञ्ञं उपनिस्साय अप्पमाणं झानं उप्पादेति, मग्गं उप्पादेति, फलसमापत्तिं उप्पादेति. अप्पमाणा सद्धा…पे… पञ्ञा अप्पमाणाय सद्धाय…पे… पञ्ञाय उपनिस्सयपच्चयेन पच्चयो. पठमो मग्गो दुतियस्स मग्गस्स…पे… ततियो मग्गो चतुत्थस्स मग्गस्स… मग्गो फलसमापत्तिया उपनिस्सयपच्चयेन पच्चयो. (१)

अप्पमाणो धम्मो परित्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अप्पमाणं सद्धं उपनिस्साय दानं देति, सीलं…पे… उपोसथकम्मं… विपस्सनं उप्पादेति. अप्पमाणं सीलं…पे… पञ्ञं उपनिस्साय दानं देति, सीलं…पे… उपोसथकम्मं… विपस्सनं… अप्पमाणा सद्धा…पे… पञ्ञा परित्ताय सद्धाय…पे… पञ्ञाय…पे… कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो. फलसमापत्ति कायिकस्स सुखस्स उपनिस्सयपच्चयेन पच्चयो. अरिया मग्गं उपनिस्साय सङ्खारे अनिच्चतो…पे… विपस्सन्ति, मग्गो अरियानं अत्थप्पटिसम्भिदाय…पे… पटिभानप्पटिसम्भिदाय… ठानाठानकोसल्लस्स उपनिस्सयपच्चयेन पच्चयो. (२)

अप्पमाणो धम्मो महग्गतस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – अप्पमाणं सद्धं उपनिस्साय महग्गतं झानं उप्पादेति, अभिञ्ञं उप्पादेति, समापत्तिं उप्पादेति, अप्पमाणं सीलं…पे… पञ्ञं उपनिस्साय महग्गतं झानं उप्पादेति, अभिञ्ञं उप्पादेति, समापत्तिं उप्पादेति. अप्पमाणा सद्धा…पे… पञ्ञा महग्गताय सद्धाय…पे… पञ्ञाय उपनिस्सयपच्चयेन पच्चयो, अरिया मग्गं उपनिस्साय अनुप्पन्नं समापत्तिं उप्पादेन्ति, उप्पन्नं समापज्जन्ति. (३)

पुरेजातपच्चयो

७५. परित्तो धम्मो परित्तस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं अनिच्चतो…पे… विपस्सति अस्सादेति अभिनन्दति; तं आरब्भ रागो उप्पज्जति…पे… दोमनस्सं उप्पज्जति. सोतं…पे… वत्थुं अनिच्चतो…पे… दोमनस्सं उप्पज्जति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स… वत्थु परित्तानं खन्धानं पुरेजातपच्चयेन पच्चयो. (१)

परित्तो धम्मो महग्गतस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – दिब्बेन चक्खुना रूपं पस्सति, दिब्बाय सोतधातुया सद्दं सुणाति. वत्थुपुरेजातं – वत्थु महग्गतानं खन्धानं पुरेजातपच्चयेन पच्चयो. (२)

परित्तो धम्मो अप्पमाणस्स धम्मस्स पुरेजातपच्चयेन पच्चयो. वत्थुपुरेजातं – वत्थु अप्पमाणानं खन्धानं पुरेजातपच्चयेन पच्चयो. (३)

पच्छाजातपच्चयो

७६. परित्तो धम्मो परित्तस्स धम्मस्स पच्छाजातपच्चयेन पच्चयो – पच्छाजाता परित्ता खन्धा पुरेजातस्स इमस्स कायस्स पच्छाजातपच्चयेन पच्चयो. (१)

महग्गतो धम्मो परित्तस्स धम्मस्स पच्छाजातपच्चयेन पच्चयो – पच्छाजाता महग्गता खन्धा पुरेजातस्स इमस्स कायस्स पच्छाजातपच्चयेन पच्चयो. (१)

अप्पमाणो धम्मो परित्तस्स धम्मस्स पच्छाजातपच्चयेन पच्चयो – पच्छाजाता अप्पमाणा खन्धा पुरेजातस्स इमस्स कायस्स पच्छाजातपच्चयेन पच्चयो. (१)

आसेवनपच्चयो

७७. परित्तो धम्मो परित्तस्स धम्मस्स आसेवनपच्चयेन पच्चयो – पुरिमा पुरिमा परित्ता खन्धा पच्छिमानं पच्छिमानं परित्तानं खन्धानं…पे… अनुलोमं गोत्रभुस्स, अनुलोमं वोदानस्स आसेवनपच्चयेन पच्चयो. (१)

परित्तो धम्मो महग्गतस्स धम्मस्स आसेवनपच्चयेन पच्चयो – पठमस्स झानस्स परिकम्मं तस्सेव [पठमस्स झानस्स (?)] आसेवनपच्चयेन पच्चयो…पे… नेवसञ्ञानासञ्ञायतनस्स परिकम्मं तस्सेव [नेवसञ्ञानासञ्ञायतनस्स (?) अञ्ञेसु तिकेसु ओलोकेतब्बं] आसेवनपच्चयेन पच्चयो. दिब्बस्स चक्खुस्स परिकम्मं…पे… अनागतंसञाणस्स परिकम्मं अनागतंसञाणस्स आसेवनपच्चयेन पच्चयो. (२)

परित्तो धम्मो अप्पमाणस्स धम्मस्स आसेवनपच्चयेन पच्चयो – गोत्रभु मग्गस्स… वोदानं मग्गस्स आसेवनपच्चयेन पच्चयो. (३)

महग्गतो धम्मो महग्गतस्स धम्मस्स आसेवनपच्चयेन पच्चयो – पुरिमा पुरिमा महग्गता खन्धा पच्छिमानं पच्छिमानं महग्गतानं खन्धानं…पे… आसेवनपच्चयेन पच्चयो. (१)

कम्मपच्चयो

७८. परित्तो धम्मो परित्तस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – परित्ता चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. पटिसन्धिक्खणे परित्ता चेतना सम्पयुत्तकानं खन्धानं कटत्ता च रूपानं कम्मपच्चयेन पच्चयो. नानाक्खणिका – परित्ता चेतना विपाकानं परित्तानं खन्धानं कटत्ता च रूपानं कम्मपच्चयेन पच्चयो. (१)

महग्गतो धम्मो महग्गतस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – महग्गता चेतना सम्पयुत्तकानं खन्धानं कम्मपच्चयेन पच्चयो. पटिसन्धिक्खणे महग्गता चेतना सम्पयुत्तकानं खन्धानं कम्मपच्चयेन पच्चयो. नानाक्खणिका – महग्गता चेतना विपाकानं महग्गतानं खन्धानं कम्मपच्चयेन पच्चयो. (१)

महग्गतो धम्मो परित्तस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – महग्गता चेतना चित्तसमुट्ठानानं रूपानं कम्मपच्चयेन पच्चयो. पटिसन्धिक्खणे महग्गता चेतना कटत्तारूपानं कम्मपच्चयेन पच्चयो. नानाक्खणिका – महग्गता चेतना कटत्तारूपानं कम्मपच्चयेन पच्चयो. (२)

महग्गतो धम्मो परित्तस्स च महग्गतस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – महग्गता चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. पटिसन्धिक्खणे महग्गता चेतना सम्पयुत्तकानं खन्धानं कटत्ता च रूपानं कम्मपच्चयेन पच्चयो. नानाक्खणिका – महग्गता चेतना विपाकानं महग्गतानं खन्धानं कटत्ता च रूपानं कम्मपच्चयेन पच्चयो. (३)

७९. अप्पमाणो धम्मो अप्पमाणस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – अप्पमाणा चेतना सम्पयुत्तकानं खन्धानं कम्मपच्चयेन पच्चयो. नानाक्खणिका – अप्पमाणा चेतना विपाकानं अप्पमाणानं खन्धानं कम्मपच्चयेन पच्चयो. (१)

अप्पमाणो धम्मो परित्तस्स धम्मस्स कम्मपच्चयेन पच्चयो – अप्पमाणा चेतना चित्तसमुट्ठानानं रूपानं कम्मपच्चयेन पच्चयो. (२)

अप्पमाणो धम्मो परित्तस्स च अप्पमाणस्स च धम्मस्स कम्मपच्चयेन पच्चयो – अप्पमाणा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

विपाकपच्चयो

८०. परित्तो धम्मो परित्तस्स धम्मस्स विपाकपच्चयेन पच्चयो – विपाको परित्तो एको खन्धो तिण्णन्नं खन्धानं चित्तसमुट्ठानानञ्च रूपानं विपाकपच्चयेन पच्चयो…पे… पटिसन्धिक्खणे…पे… खन्धा वत्थुस्स विपाकपच्चयेन पच्चयो. (१)

महग्गतो धम्मो महग्गतस्स धम्मस्स विपाकपच्चयेन पच्चयो…पे… (तिस्सो पञ्हा, पवत्तिपटिसन्धि कातब्बा). (३)

अप्पमाणो धम्मो अप्पमाणस्स धम्मस्स विपाकपच्चयेन पच्चयो… तीणि (पवत्तिमेव).

आहारपच्चयादि

८१. परित्तो धम्मो परित्तस्स धम्मस्स आहारपच्चयेन पच्चयो…पे… इन्द्रियपच्चयेन पच्चयो… झानपच्चयेन पच्चयो… मग्गपच्चयेन पच्चयो… सम्पयुत्तपच्चयेन पच्चयो… विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – परित्ता खन्धा चित्तसमुट्ठानानं रूपानं विप्पयुत्तपच्चयेन पच्चयो. पटिसन्धिक्खणे परित्ता खन्धा कटत्तारूपानं विप्पयुत्तपच्चयेन पच्चयो. खन्धा वत्थुस्स…पे… वत्थु खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स विप्पयुत्तपच्चयेन पच्चयो…पे… कायायतनं कायविञ्ञाणस्स विप्पयुत्तपच्चयेन पच्चयो. वत्थु परित्तानं खन्धानं विप्पयुत्तपच्चयेन पच्चयो. पच्छाजाता – परित्ता खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

परित्तो धम्मो महग्गतस्स धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु महग्गतानं खन्धानं विप्पयुत्तपच्चयेन पच्चयो. पुरेजातं – वत्थु महग्गतानं खन्धानं विप्पयुत्तपच्चयेन पच्चयो. (२)

परित्तो धम्मो अप्पमाणस्स धम्मस्स विप्पयुत्तपच्चयेन पच्चयो. पुरेजातं – वत्थु अप्पमाणानं खन्धानं विप्पयुत्तपच्चयेन पच्चयो. (३)

८२. महग्गतो धम्मो परित्तस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – महग्गता खन्धा चित्तसमुट्ठानानं रूपानं विप्पयुत्तपच्चयेन पच्चयो. पटिसन्धिक्खणे…पे… पच्छाजाता – महग्गता खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

अप्पमाणो धम्मो परित्तस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – अप्पमाणा खन्धा चित्तसमुट्ठानानं रूपानं विप्पयुत्तपच्चयेन पच्चयो. पच्छाजाता – अप्पमाणा खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

अत्थिपच्चयो

८३. परित्तो धम्मो परित्तस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – परित्तो एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा…पे… पटिसन्धिक्खणे…पे… खन्धा वत्थुस्स अत्थिपच्चयेन पच्चयो. वत्थु खन्धानं अत्थिपच्चयेन पच्चयो; एकं महाभूतं…पे… असञ्ञसत्तानं…पे…. पुरेजातं – चक्खुं…पे… वत्थुं अनिच्चतो…पे… विपस्सति अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति, रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स अत्थिपच्चयेन पच्चयो. चक्खायतनं चक्खुविञ्ञाणस्स अत्थिपच्चयेन पच्चयो…पे… कायायतनं कायविञ्ञाणस्स…पे… वत्थु परित्तानं खन्धानं अत्थिपच्चयेन पच्चयो. पच्छाजाता – परित्ता खन्धा पुरेजातस्स इमस्स कायस्स अत्थिपच्चयेन पच्चयो. कबळीकारो आहारो इमस्स कायस्स अत्थिपच्चयेन पच्चयो. रूपजीवितिन्द्रियं कटत्तारूपानं अत्थिपच्चयेन पच्चयो. (१)

परित्तो धम्मो महग्गतस्स धम्मस्स अत्थिपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु महग्गतानं खन्धानं अत्थिपच्चयेन पच्चयो. पुरेजातं – दिब्बेन चक्खुना रूपं पस्सति, दिब्बाय सोतधातुया सद्दं सुणाति, वत्थु महग्गतानं खन्धानं अत्थिपच्चयेन पच्चयो. (२)

परित्तो धम्मो अप्पमाणस्स धम्मस्स अत्थिपच्चयेन पच्चयो. पुरेजातं – वत्थु अप्पमाणानं खन्धानं अत्थिपच्चयेन पच्चयो. (३)

८४. महग्गतो धम्मो महग्गतस्स धम्मस्स अत्थिपच्चयेन पच्चयो. महग्गतो एको खन्धो तिण्णन्नं खन्धानं…पे… द्वे खन्धा…पे… पटिसन्धिक्खणे…पे…. (१)

महग्गतो धम्मो परित्तस्स धम्मस्स अत्थिपच्चयेन पच्चयो – सहजातं, पच्छाजातं. सहजाता – महग्गता खन्धा चित्तसमुट्ठानानं रूपानं अत्थिपच्चयेन पच्चयो. पटिसन्धिक्खणे महग्गता खन्धा कटत्तारूपानं अत्थिपच्चयेन पच्चयो. पच्छाजाता – महग्गता खन्धा पुरेजातस्स इमस्स कायस्स अत्थिपच्चयेन पच्चयो. (२)

महग्गतो धम्मो परित्तस्स च महग्गतस्स च धम्मस्स अत्थिपच्चयेन पच्चयो – महग्गतो एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा…पे… पटिसन्धिक्खणे…पे…. (३)

८५. अप्पमाणो धम्मो अप्पमाणस्स धम्मस्स अत्थिपच्चयेन पच्चयो – अप्पमाणो एको खन्धो तिण्णन्नं खन्धानं…पे…. (१)

अप्पमाणो धम्मो परित्तस्स धम्मस्स अत्थिपच्चयेन पच्चयो – सहजातं, पच्छाजातं. सहजाता – अप्पमाणा खन्धा चित्तसमुट्ठानानं रूपानं अत्थिपच्चयेन पच्चयो. पच्छाजाता – अप्पमाणा खन्धा पुरेजातस्स इमस्स कायस्स अत्थिपच्चयेन पच्चयो. (२)

अप्पमाणो धम्मो परित्तस्स च अप्पमाणस्स च धम्मस्स अत्थिपच्चयेन पच्चयो – अप्पमाणो एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे…. (३)

८६. परित्तो च अप्पमाणो च धम्मा परित्तस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – अप्पमाणा खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. पच्छाजाता – अप्पमाणा खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – अप्पमाणा खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (१)

परित्तो च अप्पमाणो च धम्मा अप्पमाणस्स धम्मस्स अत्थिपच्चयेन पच्चयो – सहजातं, पुरेजातं. सहजातो – अप्पमाणो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा…पे…. (२)

परित्तो च महग्गतो च धम्मा परित्तस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – महग्गता खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. पटिसन्धिक्खणे महग्गता खन्धा च महाभूता च कटत्तारूपानं अत्थिपच्चयेन पच्चयो. पच्छाजाता – महग्गता खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – महग्गता खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (१)

परित्तो च महग्गतो च धम्मा महग्गतस्स धम्मस्स अत्थिपच्चयेन पच्चयो – सहजातं, पुरेजातं. सहजातो – महग्गतो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा…पे… पटिसन्धिक्खणे महग्गतो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च वत्थु च…पे… नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो. (२)