१. विभङ्गवारो

हेतुपच्चयो

४२. सेक्खो धम्मो सेक्खस्स धम्मस्स हेतुपच्चयेन पच्चयो – सेक्खा हेतू सम्पयुत्तकानं खन्धानं हेतुपच्चयेन पच्चयो. (१)

सेक्खो धम्मो नेवसेक्खनासेक्खस्स धम्मस्स हेतुपच्चयेन पच्चयो – सेक्खा हेतू चित्तसमुट्ठानानं रूपानं हेतुपच्चयेन पच्चयो. (२)

सेक्खो धम्मो सेक्खस्स च नेवसेक्खनासेक्खस्स च धम्मस्स हेतुपच्चयेन पच्चयो – सेक्खा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

असेक्खो धम्मो असेक्खस्स धम्मस्स (तीणि).

नेवसेक्खनासेक्खो धम्मो नेवसेक्खनासेक्खस्स धम्मस्स हेतुपच्चयेन पच्चयो – नेवसेक्खनासेक्खा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. पटिसन्धिक्खणे…पे…. (१)

आरम्मणपच्चयो

४३. सेक्खो धम्मो नेवसेक्खनासेक्खस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा मग्गं पच्चवेक्खन्ति, सेक्खं फलं पच्चवेक्खन्ति, चेतोपरियञाणेन सेक्खचित्तसमङ्गिस्स चित्तं जानन्ति, सेक्खा खन्धा चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

असेक्खो धम्मो नेवसेक्खनासेक्खस्स धम्मस्स आरम्मणपच्चयेन पच्चयो – अरहा असेक्खं फलं पच्चवेक्खति, चेतोपरियञाणेन असेक्खचित्तसमङ्गिस्स चित्तं जानाति, असेक्खा खन्धा चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

४४. नेवसेक्खनासेक्खो धम्मो नेवसेक्खनासेक्खस्स धम्मस्स आरम्मणपच्चयेन पच्चयो – दानं दत्वा सीलं समादियित्वा उपोसथकम्मं कत्वा तं पच्चवेक्खति, पुब्बे सुचिण्णानि…पे… झाना वुट्ठहित्वा झानं पच्चवेक्खति, अरिया निब्बानं पच्चवेक्खन्ति. निब्बानं गोत्रभुस्स, वोदानस्स, आवज्जनाय आरम्मणपच्चयेन पच्चयो. अरिया पहीने किलेसे पच्चवेक्खन्ति विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति, चक्खुं अनिच्चतो दुक्खतो अनत्ततो विपस्सन्ति, अस्सादेन्ति अभिनन्दन्ति, तं आरब्भ रागो उप्पज्जति…पे… दोमनस्सं उप्पज्जति, सोतं…पे… वत्थुं नेवसेक्खनासेक्खे खन्धे अनिच्चतो दुक्खतो अनत्ततो विपस्सन्ति, अस्सादेन्ति…पे… दोमनस्सं उप्पज्जति, दिब्बेन चक्खुना रूपं पस्सति, दिब्बाय सोतधातुया सद्दं सुणाति, चेतोपरियञाणेन नेवसेक्खनासेक्खचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स आरम्मणपच्चयेन पच्चयो. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… नेवसेक्खनासेक्खा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

नेवसेक्खनासेक्खो धम्मो सेक्खस्स धम्मस्स आरम्मणपच्चयेन पच्चयो – निब्बानं मग्गस्स, सेक्खस्स फलस्स आरम्मणपच्चयेन पच्चयो. (२)

नेवसेक्खनासेक्खो धम्मो असेक्खस्स धम्मस्स आरम्मणपच्चयेन पच्चयो – निब्बानं असेक्खस्स फलस्स आरम्मणपच्चयेन पच्चयो. (३)

अधिपतिपच्चयो

४५. सेक्खो धम्मो सेक्खस्स धम्मस्स अधिपतिपच्चयेन पच्चयो. सहजाताधिपति – सेक्खाधिपति सम्पयुत्तकानं खन्धानं अधिपतिपच्चयेन पच्चयो. (१)

सेक्खो धम्मो नेवसेक्खनासेक्खस्स धम्मस्स अधिपतिपच्चयेन पच्चयो. आरम्मणाधिपति, सहजाताधिपति. आरम्मणाधिपति – अरिया मग्गा वुट्ठहित्वा मग्गं गरुं कत्वा पच्चवेक्खन्ति, सेक्खं फलं गरुं कत्वा पच्चवेक्खन्ति. सहजाताधिपति – सेक्खाधिपति चित्तसमुट्ठानानं रूपानं अधिपतिपच्चयेन पच्चयो. (२)

सेक्खो धम्मो सेक्खस्स च नेवसेक्खनासेक्खस्स च धम्मस्स अधिपतिपच्चयेन पच्चयो. सहजाताधिपति – सेक्खाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

४६. असेक्खो धम्मो असेक्खस्स धम्मस्स अधिपतिपच्चयेन पच्चयो. सहजाताधिपति – असेक्खाधिपति सम्पयुत्तकानं खन्धानं अधिपतिपच्चयेन पच्चयो. (१)

असेक्खो धम्मो नेवसेक्खनासेक्खस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरहा असेक्खं फलं गरुं कत्वा पच्चवेक्खति. सहजाताधिपति – असेक्खाधिपति चित्तसमुट्ठानानं रूपानं अधिपतिपच्चयेन पच्चयो. (२)

असेक्खो धम्मो असेक्खस्स च नेवसेक्खनासेक्खस्स च धम्मस्स अधिपतिपच्चयेन पच्चयो. सहजाताधिपति – असेक्खाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

४७. नेवसेक्खनासेक्खो धम्मो नेवसेक्खनासेक्खस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं समादियित्वा उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि गरुं कत्वा पच्चवेक्खति, झाना वुट्ठहित्वा झानं गरुं कत्वा पच्चवेक्खति, अरिया निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स अधिपतिपच्चयेन पच्चयो. चक्खुं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सोतं…पे… वत्थुं नेवसेक्खनासेक्खे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नेवसेक्खनासेक्खाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

नेवसेक्खनासेक्खो धम्मो सेक्खस्स धम्मस्स अधिपतिपच्चयेन पच्चयो. आरम्मणाधिपति – निब्बानं मग्गस्स, सेक्खस्स फलस्स अधिपतिपच्चयेन पच्चयो. (२)

नेवसेक्खनासेक्खो धम्मो असेक्खस्स धम्मस्स अधिपतिपच्चयेन पच्चयो. आरम्मणाधिपति – निब्बानं असेक्खस्स फलस्स अधिपतिपच्चयेन पच्चयो. (३)

अनन्तरपच्चयो

४८. सेक्खो धम्मो सेक्खस्स धम्मस्स अनन्तरपच्चयेन पच्चयो – पुरिमा पुरिमा सेक्खा खन्धा पच्छिमानं पच्छिमानं सेक्खानं खन्धानं अनन्तरपच्चयेन पच्चयो. मग्गो सेक्खस्स फलस्स… सेक्खं फलं सेक्खस्स फलस्स अनन्तरपच्चयेन पच्चयो. (१)

सेक्खो धम्मो असेक्खस्स धम्मस्स अनन्तरपच्चयेन पच्चयो – मग्गो असेक्खस्स फलस्स अनन्तरपच्चयेन पच्चयो. (२)

सेक्खो धम्मो नेवसेक्खनासेक्खस्स धम्मस्स अनन्तरपच्चयेन पच्चयो – सेक्खं फलं वुट्ठानस्स अनन्तरपच्चयेन पच्चयो. (३)

४९. असेक्खो धम्मो असेक्खस्स धम्मस्स अनन्तरपच्चयेन पच्चयो – पुरिमा पुरिमा असेक्खा खन्धा पच्छिमानं पच्छिमानं असेक्खानं खन्धानं अनन्तरपच्चयेन पच्चयो. असेक्खं फलं असेक्खस्स फलस्स अनन्तरपच्चयेन पच्चयो. (१)

असेक्खो धम्मो नेवसेक्खनासेक्खस्स धम्मस्स अनन्तरपच्चयेन पच्चयो – असेक्खं फलं वुट्ठानस्स अनन्तरपच्चयेन पच्चयो. (२)

५०. नेवसेक्खनासेक्खो धम्मो नेवसेक्खनासेक्खस्स धम्मस्स अनन्तरपच्चयेन पच्चयो – पुरिमा पुरिमा नेवसेक्खनासेक्खा खन्धा पच्छिमानं पच्छिमानं नेवसेक्खनासेक्खानं खन्धानं…पे… अनुलोमं गोत्रभुस्स… अनुलोमं वोदानस्स… आवज्जना नेवसेक्खनासेक्खानं खन्धानं अनन्तरपच्चयेन पच्चयो. (१)

नेवसेक्खनासेक्खो धम्मो सेक्खस्स धम्मस्स अनन्तरपच्चयेन पच्चयो – गोत्रभु मग्गस्स… वोदानं मग्गस्स… अनुलोमं सेक्खाय फलसमापत्तिया… निरोधा वुट्ठहन्तस्स नेवसञ्ञानासञ्ञायतनकुसलं सेक्खाय फलसमापत्तिया अनन्तरपच्चयेन पच्चयो. (२)

नेवसेक्खनासेक्खो धम्मो असेक्खस्स धम्मस्स अनन्तरपच्चयेन पच्चयो – अनुलोमं असेक्खाय फलसमापत्तिया… निरोधा वुट्ठहन्तस्स नेवसञ्ञानासञ्ञायतनकिरियं असेक्खाय फलसमापत्तिया अनन्तरपच्चयेन पच्चयो. (३)

समनन्तरपच्चयो

५१. सेक्खो धम्मो सेक्खस्स धम्मस्स समनन्तरपच्चयेन पच्चयो…पे… (अनन्तरसदिसं, अट्ठ पञ्हा).

सहजातपच्चयादि

५२. सेक्खो धम्मो सेक्खस्स धम्मस्स सहजातपच्चयेन पच्चयो…पे… (पटिच्चवारे सहजातसदिसं, नव पञ्हा) अञ्ञमञ्ञपच्चयेन पच्चयो (पटिच्चवारे अञ्ञमञ्ञसदिसं, तीणि. निस्सयपच्चये कुसलत्तिके निस्सयपच्चयसदिसं, तेरस पञ्हा).

उपनिस्सयपच्चयो

५३. सेक्खो धम्मो सेक्खस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – पठमो मग्गो दुतियस्स मग्गस्स उपनिस्सयपच्चयेन पच्चयो. दुतियो मग्गो ततियस्स मग्गस्स उपनिस्सयपच्चयेन पच्चयो. ततियो मग्गो चतुत्थस्स मग्गस्स उपनिस्सयपच्चयेन पच्चयो. मग्गो सेक्खाय फलसमापत्तिया उपनिस्सयपच्चयेन पच्चयो. (१)

सेक्खो धम्मो असेक्खस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – मग्गो असेक्खाय फलसमापत्तिया उपनिस्सयपच्चयेन पच्चयो. (२)

सेक्खो धम्मो नेवसेक्खनासेक्खस्स धम्मस्स उपनिस्सयपच्चयेन पच्चय – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अरिया मग्गं उपनिस्साय अनुप्पन्नं कुसलसमापत्तिं उप्पादेन्ति, उप्पन्नं समापज्जन्ति, सङ्खारे अनिच्चतो…पे… विपस्सन्ति, मग्गो अरियानं अत्थप्पटिसम्भिदाय…पे… पटिभानप्पटिसम्भिदाय… ठानाठानकोसल्लस्स उपनिस्सयपच्चयेन पच्चयो. सेक्खा फलसमापत्तिया कायिकस्स सुखस्स उपनिस्सयपच्चयेन पच्चयो. (३)

५४. असेक्खो धम्मो असेक्खस्स धम्मस्स उपनिस्सयपच्चयेन पच्चयो. अनन्तरूपनिस्सयो – पुरिमा पुरिमा असेक्खा खन्धा पच्छिमानं पच्छिमानं असेक्खानं खन्धानं…पे… असेक्खं फलं असेक्खस्स फलस्स उपनिस्सयपच्चयेन पच्चयो. (१)

असेक्खो धम्मो नेवसेक्खनासेक्खस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – असेक्खा फलसमापत्ति कायिकस्स सुखस्स उपनिस्सयपच्चयेन पच्चयो. (२)

५५. नेवसेक्खनासेक्खो धम्मो नेवसेक्खनासेक्खस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नेवसेक्खनासेक्खं सद्धं उपनिस्साय दानं देति. सीलं…पे… उपोसथकम्मं…पे… झानं…पे… विपस्सनं…पे… अभिञ्ञं…पे… समापत्तिं उप्पादेति, मानं जप्पेति, दिट्ठिं गण्हाति. नेवसेक्खनासेक्खं सीलं…पे… पञ्ञं… रागं…पे… पत्थनं… कायिकं सुखं…पे… उतुं… भोजनं… सेनासनं उपनिस्साय दानं देति, सीलं…पे… समापत्तिं उप्पादेति, पाणं हनति…पे… सङ्घं भिन्दति. नेवसेक्खनासेक्खा सद्धा…पे… पञ्ञा, रागो…पे… पत्थना, कायिकं सुखं…पे… सेनासनं नेवसेक्खनासेक्खाय सद्धाय…पे… पञ्ञाय, रागस्स…पे… पत्थनाय, कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो. पठमस्स झानस्स परिकम्मं पठमस्स झानस्स उपनिस्सयपच्चयेन पच्चयो…पे… नेवसञ्ञानासञ्ञायतनस्स परिकम्मं नेवसञ्ञानासञ्ञायतनस्स…पे… पठमं झानं दुतियस्स झानस्स उपनिस्सयपच्चयेन पच्चयो…पे… आकिञ्चञ्ञायतनं नेवसञ्ञानासञ्ञायतनस्स उपनिस्सयपच्चयेन पच्चयो. (१)

नेवसेक्खनासेक्खो धम्मो सेक्खस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – पठमस्स मग्गस्स परिकम्मं पठमस्स मग्गस्स उपनिस्सयपच्चयेन पच्चयो…पे… चतुत्थस्स मग्गस्स परिकम्मं चतुत्थस्स मग्गस्स उपनिस्सयपच्चयेन पच्चयो. (२)

नेवसेक्खनासेक्खो धम्मो असेक्खस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – कायिकं सुखं… कायिकं दुक्खं… उतुं… भोजनं… सेनासनं असेक्खाय फलसमापत्तिया उपनिस्सयपच्चयेन पच्चयो. (३)

पुरेजातपच्चयो

५६. नेवसेक्खनासेक्खो धम्मो नेवसेक्खनासेक्खस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं अनिच्चतो…पे… विपस्सति, अस्सादेति अभिनन्दति; तं आरब्भ रागो उप्पज्जति…पे… दोमनस्सं उप्पज्जति. सोतं…पे… वत्थुं अनिच्चतो दुक्खतो अनत्ततो विपस्सति…पे… दोमनस्सं उप्पज्जति, दिब्बेन चक्खुना रूपं पस्सति, दिब्बाय सोतधातुया सद्दं सुणाति, रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स, वत्थु नेवसेक्खनासेक्खानं खन्धानं पुरेजातपच्चयेन पच्चयो. (१)

नेवसेक्खनासेक्खो धम्मो सेक्खस्स धम्मस्स पुरेजातपच्चयेन पच्चयो. वत्थुपुरेजातं – वत्थु सेक्खानं खन्धानं पुरेजातपच्चयेन पच्चयो. (२)

नेवसेक्खनासेक्खो धम्मो असेक्खस्स धम्मस्स पुरेजातपच्चयेन पच्चयो. वत्थुपुरेजातं – वत्थु असेक्खानं खन्धानं पुरेजातपच्चयेन पच्चयो. (३)

पच्छाजातपच्चयो

५७. सेक्खो धम्मो नेवसेक्खनासेक्खस्स धम्मस्स पच्छाजातपच्चयेन पच्चयो – पच्छाजाता सेक्खा खन्धा पुरेजातस्स इमस्स कायस्स पच्छाजातपच्चयेन पच्चयो. (१)

असेक्खो धम्मो नेवसेक्खनासेक्खस्स धम्मस्स पच्छाजातपच्चयेन पच्चयो – पच्छाजाता असेक्खा खन्धा पुरेजातस्स इमस्स कायस्स पच्छाजातपच्चयेन पच्चयो. (१)

नेवसेक्खनासेक्खो धम्मो नेवसेक्खनासेक्खस्स धम्मस्स पच्छाजातपच्चयेन पच्चयो – पच्छाजाता नेवसेक्खनासेक्खा खन्धा पुरेजातस्स इमस्स कायस्स पच्छाजातपच्चयेन पच्चयो. (१)

आसेवनपच्चयो

५८. नेवसेक्खनासेक्खो धम्मो नेवसेक्खनासेक्खस्स धम्मस्स आसेवनपच्चयेन पच्चयो – पुरिमा पुरिमा नेवसेक्खनासेक्खा खन्धा पच्छिमानं पच्छिमानं नेवसेक्खनासेक्खानं खन्धानं आसेवनपच्चयेन पच्चयो. अनुलोमं गोत्रभुस्स… अनुलोमं वोदानस्स आसेवनपच्चयेन पच्चयो. (१)

नेवसेक्खनासेक्खो धम्मो सेक्खस्स धम्मस्स आसेवनपच्चयेन पच्चयो – गोत्रभु मग्गस्स… वोदानं मग्गस्स आसेवनपच्चयेन पच्चयो. (२)

कम्मपच्चयो

५९. सेक्खो धम्मो सेक्खस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – सेक्खा चेतना सम्पयुत्तकानं खन्धानं कम्मपच्चयेन पच्चयो. नानाक्खणिका – सेक्खा चेतना विपाकानं सेक्खानं खन्धानं कम्मपच्चयेन पच्चयो. (१)

सेक्खो धम्मो असेक्खस्स धम्मस्स कम्मपच्चयेन पच्चयो. नानाक्खणिका – सेक्खा चेतना असेक्खानं खन्धानं कम्मपच्चयेन पच्चयो. (२)

सेक्खो धम्मो नेवसेक्खनासेक्खस्स धम्मस्स कम्मपच्चयेन पच्चयो. सहजाता – सेक्खा चेतना चित्तसमुट्ठानानं रूपानं कम्मपच्चयेन पच्चयो. (३)

सेक्खो धम्मो सेक्खस्स च नेवसेक्खनासेक्खस्स च धम्मस्स कम्मपच्चयेन पच्चयो – सेक्खा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (४)

६०. असेक्खो धम्मो असेक्खस्स धम्मस्स कम्मपच्चयेन पच्चयो – असेक्खा चेतना सम्पयुत्तकानं खन्धानं कम्मपच्चयेन पच्चयो. (१)

असेक्खो धम्मो नेवसेक्खनासेक्खस्स धम्मस्स कम्मपच्चयेन पच्चयो – असेक्खा चेतना चित्तसमुट्ठानानं रूपानं कम्मपच्चयेन पच्चयो. (२)

असेक्खो धम्मो असेक्खस्स च नेवसेक्खनासेक्खस्स च धम्मस्स कम्मपच्चयेन पच्चयो – असेक्खा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

६१. नेवसेक्खनासेक्खो धम्मो नेवसेक्खनासेक्खस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नेवसेक्खनासेक्खा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. पटिसन्धिक्खणे…पे…. नानाक्खणिका – नेवसेक्खनासेक्खा चेतना विपाकानं नेवसेक्खनासेक्खानं खन्धानं कटत्ता च रूपानं कम्मपच्चयेन पच्चयो. (१)

विपाकपच्चयो

६२. सेक्खो धम्मो सेक्खस्स धम्मस्स विपाकपच्चयेन पच्चयो – विपाको सेक्खो एको खन्धो तिण्णन्नं खन्धानं…पे… (सेक्खमूलके तीणि ).

असेक्खो धम्मो असेक्खस्स धम्मस्स विपाकपच्चयेन पच्चयो – असेक्खो एको खन्धो तिण्णन्नं खन्धानं…पे… (असेक्खमूलके तीणि).

नेवसेक्खनासेक्खो धम्मो नेवसेक्खनासेक्खस्स धम्मस्स विपाकपच्चयेन पच्चयो – विपाको नेवसेक्खनासेक्खो एको खन्धो तिण्णन्नं खन्धानं…पे… पटिसन्धिक्खणे…पे… खन्धा वत्थुस्स विपाकपच्चयेन पच्चयो. (१)

आहारपच्चयादि

६३. सेक्खो धम्मो सेक्खस्स धम्मस्स आहारपच्चयेन पच्चयो… इन्द्रियपच्चयेन पच्चयो… झानपच्चयेन पच्चयो… मग्गपच्चयेन पच्चयो… सम्पयुत्तपच्चयेन पच्चयो…पे….

विप्पयुत्तपच्चयो

६४. सेक्खो धम्मो नेवसेक्खनासेक्खस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – सेक्खा खन्धा चित्तसमुट्ठानानं रूपानं विप्पयुत्तपच्चयेन पच्चयो. पच्छाजाता – सेक्खा खन्धा पुरेजातस्स इमस्स कायस्स विप्पयुत्तपच्चयेन पच्चयो (१).

असेक्खो धम्मो नेवसेक्खनासेक्खस्स धम्मस्स विप्पयुत्तपच्चयेन पच्चयो – सहजातं, पच्छाजातं (सेक्खसदिसं).

नेवसेक्खनासेक्खो धम्मो नेवसेक्खनासेक्खस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – नेवसेक्खनासेक्खा खन्धा चित्तसमुट्ठानानं रूपानं विप्पयुत्तपच्चयेन पच्चयो. पटिसन्धिक्खणे नेवसेक्खनासेक्खा खन्धा कटत्तारूपानं विप्पयुत्तपच्चयेन पच्चयो. खन्धा वत्थुस्स विप्पयुत्तपच्चयेन पच्चयो. वत्थु खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स, वत्थु नेवसेक्खनासेक्खानं खन्धानं विप्पयुत्तपच्चयेन पच्चयो. पच्छाजाता – नेवसेक्खनासेक्खा खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

नेवसेक्खनासेक्खो धम्मो सेक्खस्स धम्मस्स विप्पयुत्तपच्चयेन पच्चयो. पुरेजातं – वत्थु सेक्खानं खन्धानं विप्पयुत्तपच्चयेन पच्चयो. (२)

नेवसेक्खनासेक्खो धम्मो असेक्खस्स धम्मस्स विप्पयुत्तपच्चयेन पच्चयो. पुरेजातं – वत्थु असेक्खानं खन्धानं विप्पयुत्तपच्चयेन पच्चयो. (३)

अत्थिपच्चयो

६५. सेक्खो धम्मो सेक्खस्स धम्मस्स अत्थिपच्चयेन पच्चयो – सेक्खो एको खन्धो तिण्णन्नं खन्धानं…पे…. (१)

सेक्खो धम्मो नेवसेक्खनासेक्खस्स धम्मस्स अत्थिपच्चयेन पच्चयो – सहजातं, पच्छाजातं. सहजाता – सेक्खा खन्धा चित्तसमुट्ठानानं रूपानं अत्थिपच्चयेन पच्चयो. पच्छाजाता – सेक्खा खन्धा पुरेजातस्स इमस्स कायस्स अत्थिपच्चयेन पच्चयो. (२)

सेक्खो धम्मो सेक्खस्स च नेवसेक्खनासेक्खस्स च धम्मस्स अत्थिपच्चयेन पच्चयो – सेक्खो एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा…पे…. (३)

असेक्खो धम्मो असेक्खस्स धम्मस्स अत्थिपच्चयेन पच्चयो…पे… तीणि (सेक्खसदिसं).

६६. नेवसेक्खनासेक्खो धम्मो नेवसेक्खनासेक्खस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – नेवसेक्खनासेक्खो एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा…पे… पटिसन्धिक्खणे…पे… खन्धा वत्थुस्स अत्थिपच्चयेन पच्चयो. वत्थु खन्धानं अत्थिपच्चयेन पच्चयो, एकं महाभूतं…पे… बाहिरं…पे… असञ्ञसत्तानं…पे…. पुरेजातं – चक्खुं अनिच्चतो दुक्खतो अनत्ततो विपस्सति; अस्सादेति अभिनन्दति; तं आरब्भ रागो उप्पज्जति…पे… दोमनस्सं उप्पज्जति. सोतं…पे… वत्थुं अनिच्चतो…पे… विपस्सति, दिब्बेन चक्खुना रूपं पस्सति, दिब्बाय सोतधातुया सद्दं सुणाति, रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… चक्खायतनं चक्खुविञ्ञाणस्स…पे… कायायतनं कायविञ्ञाणस्स… वत्थु नेवसेक्खनासेक्खानं खन्धानं अत्थिपच्चयेन पच्चयो. पच्छाजाता – नेवसेक्खनासेक्खा खन्धा पुरेजातस्स इमस्स कायस्स अत्थिपच्चयेन पच्चयो. कबळीकारो आहारो इमस्स कायस्स अत्थिपच्चयेन पच्चयो. रूपजीवितिन्द्रियं कटत्तारूपानं अत्थिपच्चयेन पच्चयो. (१)

नेवसेक्खनासेक्खो धम्मो सेक्खस्स धम्मस्स अत्थिपच्चयेन पच्चयो. पुरेजातं – वत्थु सेक्खानं खन्धानं अत्थिपच्चयेन पच्चयो. (२)

नेवसेक्खनासेक्खो धम्मो असेक्खस्स धम्मस्स अत्थिपच्चयेन पच्चयो. पुरेजातं – वत्थु असेक्खानं खन्धानं अत्थिपच्चयेन पच्चयो. (३)

६७. सेक्खो च नेवसेक्खनासेक्खो च धम्मा सेक्खस्स धम्मस्स अत्थिपच्चयेन पच्चयो – सहजातं, पुरेजातं. सहजातो – सेक्खो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा…पे…. (१)

सेक्खो च नेवसेक्खनासेक्खो च धम्मा नेवसेक्खनासेक्खस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – सेक्खा खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. पच्छाजाता – सेक्खा खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – सेक्खा खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

असेक्खो च नेवसेक्खनासेक्खो च धम्मा असेक्खस्स धम्मस्स अत्थिपच्चयेन पच्चयो…पे… (द्वे पञ्हा कातब्बा, सेक्खसदिसा).