१. विभङ्गवारो

नहेतुपच्चयो

१३. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नहेतुपच्चया – अहेतुकं उपादिन्नुपादानियं एकं खन्धं पटिच्च तयो खन्धा, द्वे खन्धे पटिच्च द्वे खन्धा, अहेतुकपटिसन्धिक्खणे उपादिन्नुपादानियं एकं खन्धं पटिच्च तयो खन्धा कटत्ता च रूपं…पे… द्वे खन्धे पटिच्च द्वे खन्धा कटत्ता च रूपं; खन्धे पटिच्च वत्थु, वत्थुं पटिच्च खन्धा; एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं; असञ्ञसत्तानं एकं महाभूतं पटिच्च…पे… महाभूते पटिच्च कटत्तारूपं उपादारूपं. (१)

उपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नहेतुपच्चया – अहेतुके उपादिन्नुपादानिये खन्धे पटिच्च चित्तसमुट्ठानं रूपं. (२)

उपादिन्नुपादानियं धम्मं पटिच्च उपादिन्नुपादानियो च अनुपादिन्नुपादानियो च धम्मा उप्पज्जन्ति नहेतुपच्चया – अहेतुकं उपादिन्नुपादानियं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं. (३)

अनुपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नहेतुपच्चया – अहेतुकं अनुपादिन्नुपादानियं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं. अनुपादिन्नुपादानियं एकं महाभूतं…पे… महाभूते पटिच्च चित्तसमुट्ठानं रूपं उपादारूपं. बाहिरं… आहारसमुट्ठानं… उतुसमुट्ठानं एकं महाभूतं पटिच्च…पे… महाभूते पटिच्च उपादारूपं. विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

उपादिन्नुपादानियञ्च अनुपादिन्नुपादानियञ्च धम्मं पटिच्च अनुपादिन्नुपादानियो धम्मो उप्पज्जति नहेतुपच्चया – अहेतुके उपादिन्नुपादानिये खन्धे च महाभूते च पटिच्च चित्तसमुट्ठानं रूपं. (१)

नआरम्मणपच्चयो

१४. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नआरम्मणपच्चया – पटिसन्धिक्खणे उपादिन्नुपादानिये खन्धे पटिच्च कटत्तारूपं, खन्धे पटिच्च वत्थु, एकं महाभूतं पटिच्च…पे… असञ्ञसत्तानं एकं महाभूतं पटिच्च…पे…. (१)

उपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नआरम्मणपच्चया – उपादिन्नुपादानिये खन्धे पटिच्च चित्तसमुट्ठानं रूपं. (२)

अनुपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नआरम्मणपच्चया – अनुपादिन्नुपादानिये खन्धे पटिच्च चित्तसमुट्ठानं रूपं, एकं महाभूतं पटिच्च …पे… बाहिरं… आहारसमुट्ठानं… उतुसमुट्ठानं एकं महाभूतं पटिच्च…पे…. (१)

अनुपादिन्नअनुपादानियं धम्मं पटिच्च अनुपादिन्नुपादानियो धम्मो उप्पज्जति नआरम्मणपच्चया – अनुपादिन्नअनुपादानिये खन्धे पटिच्च चित्तसमुट्ठानं रूपं. (१)

अनुपादिन्नुपादानियञ्च अनुपादिन्नअनुपादानियञ्च धम्मं पटिच्च अनुपादिन्नुपादानियो धम्मो उप्पज्जति नआरम्मणपच्चया – अनुपादिन्नअनुपादानिये खन्धे च महाभूते च पटिच्च चित्तसमुट्ठानं रूपं. (१)

उपादिन्नुपादानियञ्च अनुपादिन्नुपादानियञ्च धम्मं पटिच्च अनुपादिन्नुपादानियो धम्मो उप्पज्जति नआरम्मणपच्चया – उपादिन्नुपादानिये खन्धे च महाभूते च पटिच्च चित्तसमुट्ठानं रूपं. (१)

नअधिपतिपच्चयो

१५. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नअधिपतिपच्चया (पटिसन्धि परिपुण्णं)… तीणि.

अनुपादिन्नुपादानियं धम्मं पटिच्च… एका.

अनुपादिन्नअनुपादानियं धम्मं पटिच्च अनुपादिन्नअनुपादानियो धम्मो उप्पज्जति नअधिपतिपच्चया – अनुपादिन्नअनुपादानिये खन्धे पटिच्च अनुपादिन्नअनुपादानिया अधिपति. (१)

उपादिन्नुपादानियञ्च अनुपादिन्नुपादानियञ्च धम्मं पटिच्च अनुपादिन्नुपादानियो धम्मो उप्पज्जति नअधिपतिपच्चया – उपादिन्नुपादानिये खन्धे च महाभूते च पटिच्च चित्तसमुट्ठानं रूपं.

नअनन्तरपच्चयादि

१६. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नअनन्तरपच्चया…पे… नसमनन्तरपच्चया…. नअञ्ञमञ्ञपच्चया… नउपनिस्सयपच्चया… नपुरेजातपच्चया… नपच्छाजातपच्चया… नआसेवनपच्चया…पे….

अनुपादिन्नअनुपादानियं धम्मं पटिच्च अनुपादिन्नअनुपादानियो धम्मो उप्पज्जति नआसेवनपच्चया – विपाकं अनुपादिन्नअनुपादानियं एकं खन्धं पटिच्च तयो खन्धा (संखित्तं).

नकम्मपच्चयो

१७. अनुपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नकम्मपच्चया – अनुपादिन्नुपादानिये खन्धे पटिच्च अनुपादिन्नुपादानिया चेतना. बाहिरं… आहारसमुट्ठानं… उतुसमुट्ठानं एकं महाभूतं पटिच्च…पे…. (१)

अनुपादिन्नअनुपादानियं धम्मं पटिच्च अनुपादिन्नअनुपादानियो धम्मो उप्पज्जति नकम्मपच्चया – कुसले अनुपादिन्नअनुपादानिये खन्धे पटिच्च अनुपादिन्नअनुपादानिया चेतना. (२)

नविपाकपच्चयो

१८. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नविपाकपच्चया – असञ्ञसत्तानं एकं महाभूतं पटिच्च…पे… महाभूते पटिच्च कटत्तारूपं उपादारूपं. (१)

अनुपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नविपाकपच्चया… एका.

अनुपादिन्नअनुपादानियं धम्मं पटिच्च अनुपादिन्नअनुपादानियो धम्मो उप्पज्जति नविपाकपच्चया – कुसलं अनुपादिन्नअनुपादानियं एकं खन्धं पटिच्च तयो खन्धा… तीणि.

अनुपादिन्नुपादानियञ्च अनुपादिन्नअनुपादानियञ्च धम्मं पटिच्च अनुपादिन्नुपादानियो धम्मो उप्पज्जति नविपाकपच्चया – कुसले अनुपादिन्नअनुपादानिये खन्धे च महाभूते च पटिच्च चित्तसमुट्ठानं रूपं. (१)

नआहारपच्चयो

१९. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नआहारपच्चया – असञ्ञसत्तानं एकं महाभूतं पटिच्च…पे…. (१)

अनुपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नआहारपच्चया – बाहिरं… उतुसमुट्ठानं एकं महाभूतं पटिच्च…पे…. (१)

नइन्द्रियपच्चयो

२०. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नइन्द्रियपच्चया – असञ्ञसत्तानं महाभूते पटिच्च रूपजीवितिन्द्रियं. (१)

अनुपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नइन्द्रियपच्चया – बाहिरं… आहारसमुट्ठानं… उतुसमुट्ठानं एकं महाभूतं पटिच्च…पे…. (१)

नझानपच्चयो

२१. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नझानपच्चया – पञ्चविञ्ञाणसहगतं एकं खन्धं पटिच्च तयो खन्धा…पे… असञ्ञसत्तानं एकं महाभूतं पटिच्च …पे…. (१)

अनुपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नझानपच्चया – बाहिरं… आहारसमुट्ठानं… उतुसमुट्ठानं एकं महाभूतं पटिच्च…पे…. (१)

नमग्गपच्चयो

२२. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नमग्गपच्चया – अहेतुकं उपादिन्नुपादानियं एकं खन्धं पटिच्च तयो खन्धा… पञ्च.

नसम्पयुत्तपच्चयो

२३. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नसम्पयुत्तपच्चया (नआरम्मणपच्चयसदिसं).

नविप्पयुत्तपच्चयो

२४. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नविप्पयुत्तपच्चया – अरूपे उपादिन्नुपादानियं एकं खन्धं पटिच्च तयो खन्धा…पे… असञ्ञसत्तानं एकं महाभूतं पटिच्च…पे…. (१)

अनुपादिन्नुपादानियं धम्मं पटिच्च अनुपादिन्नुपादानियो धम्मो उप्पज्जति नविप्पयुत्तपच्चया – अरूपे अनुपादिन्नुपादानियं एकं खन्धं पटिच्च तयोखन्धा…पे… बाहिरं… आहारसमुट्ठानं… उतुसमुट्ठानं एकं महाभूतं पटिच्च…पे…. (१)

अनुपादिन्नअनुपादानियं धम्मं पटिच्च अनुपादिन्नअनुपादानियो धम्मो उप्पज्जति नविप्पयुत्तपच्चया – अरूपे अनुपादिन्नअनुपादानियं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

नोनत्थि-नोविगतपच्चया

२५. उपादिन्नुपादानियं धम्मं पटिच्च उपादिन्नुपादानियो धम्मो उप्पज्जति नोनत्थिपच्चया… नोविगतपच्चया.

(यथा कुसलत्तिके पच्चनीयवारो वित्थारितो, एवं वित्थारेतब्बो.)