१. विभङ्गवारो

हेतुपच्चयो

५१. उपादिन्नुपादानियो धम्मो उपादिन्नुपादानियस्स धम्मस्स हेतुपच्चयेन पच्चयो – उपादिन्नुपादानिया हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे उपादिन्नुपादानिया हेतू सम्पयुत्तकानं खन्धानं कटत्ता च रूपानं हेतुपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स हेतुपच्चयेन पच्चयो – उपादिन्नुपादानिया हेतू चित्तसमुट्ठानानं रूपानं हेतुपच्चयेन पच्चयो. (२)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स हेतुपच्चयेन पच्चयो – उपादिन्नुपादानिया हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

अनुपादिन्नुपादानियो धम्मो अनुपादिन्नुपादानियस्स धम्मस्स हेतुपच्चयेन पच्चयो – अनुपादिन्नुपादानिया हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (१)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स हेतुपच्चयेन पच्चयो – अनुपादिन्नअनुपादानिया हेतू सम्पयुत्तकानं खन्धानं हेतुपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स हेतुपच्चयेन पच्चयो – अनुपादिन्नअनुपादानिया हेतू चित्तसमुट्ठानानं रूपानं हेतुपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स च अनुपादिन्नअनुपादानियस्स च धम्मस्स हेतुपच्चयेन पच्चयो – अनुपादिन्नअनुपादानिया हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

आरम्मणपच्चयो

५२. उपादिन्नुपादानियो धम्मो उपादिन्नुपादानियस्स धम्मस्स आरम्मणपच्चयेन पच्चयो – सेक्खा वा पुथुज्जना वा चक्खुं अनिच्चतो दुक्खतो अनत्ततो विपस्सन्ति, अस्सादेन्ति अभिनन्दन्ति; तं आरब्भ रागो उप्पज्जति…पे… दोमनस्सं उप्पज्जति; कुसलाकुसले निरुद्धे विपाको तदारम्मणता उप्पज्जति. सोतं… घानं… जिव्हं… कायं… उपादिन्नुपादानिये रूपे… गन्धे… रसे… फोट्ठब्बे… वत्थुं… उपादिन्नुपादानिये खन्धे अनिच्चतो दुक्खतो अनत्ततो विप्पस्सन्ति, अस्सादेन्ति अभिनन्दति; तं आरब्भ रागो उप्पज्जति…पे… दोमनस्सं उप्पज्जति. कुसलाकुसले निरुद्धे विपाको तदारम्मणता उप्पज्जति. उपादिन्नुपादानियं रूपायतनं चक्खुविञ्ञाणस्स…पे… उपादिन्नुपादानियं गन्धायतनं… रसायतनं… फोट्ठब्बायतनं कायविञ्ञाणस्स आरम्मणपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स आरम्मणपच्चयेन पच्चयो – चक्खुं अनिच्चतो दुक्खतो अनत्ततो विपस्सति, अस्सादेति अभिनन्दति; तं आरब्भ रागो उप्पज्जति…पे… दोमनस्सं उप्पज्जति. सोतं… घानं… जिव्हं… कायं… उपादिन्नुपादानिये रूपे… गन्धे… रसे… फोट्ठब्बे… वत्थुं… उपादिन्नुपादानिये खन्धे अनिच्चतो दुक्खतो अनत्ततो विपस्सति, अस्सादेति अभिनन्दति; तं आरब्भ रागो उप्पज्जति…पे… दोमनस्सं उप्पज्जति. दिब्बेन चक्खुना उपादिन्नुपादानियं रूपं पस्सति, चेतोपरियञाणेन उपादिन्नुपादानियचित्तसमङ्गिस्स चित्तं जानाति. उपादिन्नुपादानिया खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स अनागतंसञाणस्स, आवज्जनाय आरम्मणपच्चयेन पच्चयो. (२)

५३. अनुपादिन्नुपादानियो धम्मो अनुपादिन्नुपादानियस्स धम्मस्स आरम्मणपच्चयेन पच्चयो – दानं दत्वा, सीलं समादियित्वा, उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति, झाना वुट्ठहित्वा झानं पच्चवेक्खति, अरिया गोत्रभुं पच्चवेक्खन्ति, वोदानं पच्चवेक्खन्ति, अरिया पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति; अनुपादिन्नुपादानिये रूपे… सद्दे… गन्धे… रसे… फोट्ठब्बे… अनुपादिन्नुपादानिये खन्धे अनिच्चतो दुक्खतो अनत्ततो विपस्सन्ति, अस्सादेन्ति अभिनन्दन्ति; तं आरब्भ रागो उप्पज्जति…पे… दोमनस्सं उप्पज्जति. दिब्बेन चक्खुना अनुपादिन्नुपादानियं रूपं पस्सन्ति, दिब्बाय सोतधातुया सद्दं सुणन्ति, चेतोपरियञाणेन अनुपादिन्नुपादानियचित्तसमङ्गिस्स चित्तं जानन्ति. आकासानञ्चायतनं विञ्ञाणञ्चायतनस्स आरम्मणपच्चयेन पच्चयो. आकिञ्चञ्ञायतनं नेवसञ्ञानासञ्ञायतनस्स आरम्मणपच्चयेन पच्चयो. अनुपादिन्नुपादानिया खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अनुपादिन्नुपादानियो धम्मो उपादिन्नुपादानियस्स धम्मस्स आरम्मणपच्चयेन पच्चयो – सेक्खा वा पुथुज्जना वा अनुपादिन्नुपादानिये रूपे… सद्दे… गन्धे… रसे… फोट्ठब्बे… अनुपादिन्नुपादानिये खन्धे अनिच्चतो दुक्खतो अनत्ततो विपस्सन्ति, अस्सादेन्ति अभिनन्दति; तं आरब्भ रागो उप्पज्जति…पे… दोमनस्सं उप्पज्जति. कुसलाकुसले निरुद्धे विपाको तदारम्मणता उप्पज्जति. आकासानञ्चायतनकुसलं विञ्ञाणञ्चायतनविपाकस्स आरम्मणपच्चयेन पच्चयो. आकिञ्चञ्ञायतनकुसलं नेवसञ्ञानासञ्ञायतनविपाकस्स आरम्मणपच्चयेन पच्चयो. अनुपादिन्नुपादानियं रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स आरम्मणपच्चयेन पच्चयो. (२)

५४. अनुपादिन्नअनुपादानियो धम्मो अनुपादिन्नअनुपादानियस्स धम्मस्स आरम्मणपच्चयेन पच्चयो – निब्बानं मग्गस्स, फलस्स आरम्मणपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति; निब्बानं गोत्रभुस्स, वोदानस्स, आवज्जनाय आरम्मणपच्चयेन पच्चयो. अरिया चेतोपरियञाणेन अनुपादिन्नअनुपादानियचित्तसमङ्गिस्स चित्तं जानन्ति; अनुपादिन्नअनुपादानिया खन्धा चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

अधिपतिपच्चयो

५५. उपादिन्नुपादानियो धम्मो अनुपादिन्नुपादानियस्स धम्मस्स अधिपतिपच्चयेन पच्चयो. आरम्मणाधिपति – चक्खुं गरुं कत्वा अस्सादेति अभिनन्दति; तं गरुं कत्वा रागो उप्पज्जति, दिट्ठि उप्पज्जति. सोतं… घानं… जिव्हं… कायं… उपादिन्नुपादानिये रूपे… गन्धे… रसे… फोट्ठब्बे… वत्थुं… उपादिन्नुपादानिये खन्धे गरुं कत्वा अस्सादेति अभिनन्दति; तं गरुं कत्वा रागो उप्पज्जति, दिट्ठि उप्पज्जति. (१)

अनुपादिन्नुपादानियो धम्मो अनुपादिन्नुपादानियस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा, सीलं समादियित्वा, उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि गरुं कत्वा पच्चवेक्खति; झाना वुट्ठहित्वा झानं गरुं कत्वा पच्चवेक्खति; सेक्खा गोत्रभुं गरुं कत्वा पच्चवेक्खन्ति, वोदानं गरुं कत्वा पच्चवेक्खन्ति. अनुपादिन्नुपादानिये रूपे… सद्दे… गन्धे… रसे… फोट्ठब्बे… अनुपादिन्नुपादानिये खन्धे गरुं कत्वा अस्सादेन्ति अभिनन्दन्ति; तं गरुं कत्वा रागो उप्पज्जति, दिट्ठि उप्पज्जति. सहजाताधिपति – अनुपादिन्नुपादानियाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – निब्बानं मग्गस्स फलस्स अधिपतिपच्चयेन पच्चयो. सहजाताधिपति – अनुपादिन्नअनुपादानियाधिपति सम्पयुत्तकानं खन्धानं अधिपतिपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं गरुं कत्वा पच्चवेक्खन्ति, निब्बानं गरुं कत्वा पच्चवेक्खन्ति. निब्बानं गोत्रभुस्स, वोदानस्स अधिपतिपच्चयेन पच्चयो. सहजाताधिपति – अनुपादिन्नअनुपादानियाधिपति चित्तसमुट्ठानानं रूपानं अधिपतिपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स च अनुपादिन्नअनुपादानियस्स च धम्मस्स अधिपतिपच्चयेन पच्चयो. सहजाताधिपति – अनुपादिन्नअनुपादानियाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

अनन्तरपच्चयो

५६. उपादिन्नुपादानियो धम्मो उपादिन्नुपादानियस्स धम्मस्स अनन्तरपच्चयेन पच्चयो – पुरिमा पुरिमा उपादिन्नुपादानिया खन्धा पच्छिमानं पच्छिमानं उपादिन्नुपादानियानं खन्धानं अनन्तरपच्चयेन पच्चयो; पञ्चविञ्ञाणं विपाकमनोधातुया अनन्तरपच्चयेन पच्चयो; विपाकमनोधातु विपाकमनोविञ्ञाणधातुया अनन्तरपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स अनन्तरपच्चयेन पच्चयो – भवङ्गं आवज्जनाय, विपाकमनोविञ्ञाणधातु किरियमनोविञ्ञाणधातुया अनन्तरपच्चयेन पच्चयो. (२)

अनुपादिन्नुपादानियो धम्मो अनुपादिन्नुपादानियस्स धम्मस्स अनन्तरपच्चयेन पच्चयो – पुरिमा पुरिमा अनुपादिन्नुपादानिया खन्धा पच्छिमानं पच्छिमानं अनुपादिन्नुपादानियानं खन्धानं अनन्तरपच्चयेन पच्चयो; अनुलोमं गोत्रभुस्स… अनुलोमं वोदानस्स… आवज्जना अनुपादिन्नुपादानियानं खन्धानं अनन्तरपच्चयेन पच्चयो. (१)

अनुपादिन्नुपादानियो धम्मो उपादिन्नुपादानियस्स धम्मस्स अनन्तरपच्चयेन पच्चयो – आवज्जना पञ्चन्नं विञ्ञाणानं अनन्तरपच्चयेन पच्चयो; अनुपादिन्नुपादानिया खन्धा वुट्ठानस्स अनन्तरपच्चयेन पच्चयो. (२)

अनुपादिन्नुपादानियो धम्मो अनुपादिन्नअनुपादानियस्स धम्मस्स अनन्तरपच्चयेन पच्चयो – गोत्रभु मग्गस्स… वोदानं मग्गस्स… अनुलोमं फलसमापत्तिया… निरोधा वुट्ठहन्तस्स… नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. (३)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स अनन्तरपच्चयेन पच्चयो – पुरिमा पुरिमा अनुपादिन्नअनुपादानिया खन्धा पच्छिमानं पच्छिमानं अनुपादिन्नअनुपादानियानं खन्धानं अनन्तरपच्चयेन पच्चयो. मग्गो फलस्स… फलं फलस्स अनन्तरपच्चयेन पच्चयो. (१)

अनुपादिन्नअनुपादानियो धम्मो उपादिन्नुपादानियस्स धम्मस्स अनन्तरपच्चयेन पच्चयो – फलं वुट्ठानस्स अनन्तरपच्चयेन पच्चयो. (२)

समनन्तरपच्चयो

५७. उपादिन्नुपादानियो धम्मो उपादिन्नुपादानियस्स धम्मस्स समनन्तरपच्चयेन पच्चयो (अनन्तरपच्चयसदिसं).

सहजातपच्चयो

५८. उपादिन्नुपादानियो धम्मो उपादिन्नुपादानियस्स धम्मस्स सहजातपच्चयेन पच्चयो – उपादिन्नुपादानियो एको खन्धो तिण्णन्नं खन्धानं सहजातपच्चयेन पच्चयो…पे… द्वे खन्धा द्विन्नं खन्धानं…पे… पटिसन्धिक्खणे उपादिन्नुपादानियो एको खन्धो तिण्णन्नं खन्धानं कटत्ता च रूपानं सहजातपच्चयेन पच्चयो…पे… द्वे खन्धा द्विन्नं खन्धानं कटत्ता च रूपानं…पे… खन्धा वत्थुस्स…पे… वत्थु खन्धानं…पे… एकं महाभूतं तिण्णन्नं महाभूतानं…पे… तयो महाभूता एकस्स महाभूतस्स …पे… द्वे महाभूता द्विन्नं महाभूतानं…पे… महाभूता कटत्तारूपानं उपादारूपानं सहजातपच्चयेन पच्चयो. असञ्ञसत्तानं एकं महाभूतं…पे…. (१)

उपादिन्नुपादानियो धम्मो अनुपादिन्नुपादानियस्स धम्मस्स सहजातपच्चयेन पच्चयो – उपादिन्नुपादानिया खन्धा चित्तसमुट्ठानानं रूपानं सहजातपच्चयेन पच्चयो. (२)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स सहजातपच्चयेन पच्चयो – उपादिन्नुपादानियो एको खन्धो तिण्णन्नं खन्धानं चित्तसमुट्ठानानञ्च रूपानं सहजातपच्चयेन पच्चयो…पे… द्वे खन्धा द्विन्नं खन्धानं चित्तसमुट्ठानानञ्च रूपानं सहजातपच्चयेन पच्चयो. (३)

अनुपादिन्नुपादानियो धम्मो अनुपादिन्नुपादानियस्स धम्मस्स सहजातपच्चयेन पच्चयो – अनुपादिन्नुपादानियो एको खन्धो तिण्णन्नं खन्धानं चित्तसमुट्ठानानञ्च रूपानं सहजातपच्चयेन पच्चयो…पे… द्वे खन्धा द्विन्नं खन्धानं चित्तसमुट्ठानानञ्च रूपानं सहजातपच्चयेन पच्चयो. अनुपादिन्नुपादानियं एकं महाभूतं…पे… महाभूता चित्तसमुट्ठानानं रूपानं …पे… बाहिरं… आहारसमुट्ठानं… उतुसमुट्ठानं एकं महाभूतं…पे… महाभूता उपादारूपानं सहजातपच्चयेन पच्चयो. (१)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स सहजातपच्चयेन पच्चयो – अनुपादिन्नअनुपादानियो एको खन्धो तिण्णन्नं खन्धानं…पे… द्वे खन्धा द्विन्नं खन्धानं सहजातपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स सहजातपच्चयेन पच्चयो – अनुपादिन्नअनुपादानिया खन्धा चित्तसमुट्ठानानं रूपानं सहजातपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स च अनुपादिन्नअनुपादानियस्स च धम्मस्स सहजातपच्चयेन पच्चयो; अनुपादिन्नअनुपादानियो एको खन्धो तिण्णन्नं खन्धानं चित्तसमुट्ठानानञ्च रूपानं सहजातपच्चयेन पच्चयो…पे… द्वे खन्धा द्विन्नं खन्धानं चित्तसमुट्ठानानञ्च रूपानं सहजातपच्चयेन पच्चयो. (३)

अनुपादिन्नुपादानियो च अनुपादिन्नअनुपादानियो च धम्मा अनुपादिन्नुपादानियस्स धम्मस्स सहजातपच्चयेन पच्चयो – अनुपादिन्नअनुपादानिया खन्धा च महाभूता च चित्तसमुट्ठानानं रूपानं सहजातपच्चयेन पच्चयो. (१)

उपादिन्नुपादानियो च अनुपादिन्नुपादानियो च धम्मा अनुपादिन्नुपादानियस्स धम्मस्स सहजातपच्चयेन पच्चयो – उपादिन्नुपादानिया खन्धा च महाभूता च चित्तसमुट्ठानानं रूपानं सहजातपच्चयेन पच्चयो. (१)

अञ्ञमञ्ञपच्चयो

५९. उपादिन्नुपादानियो धम्मो उपादिन्नुपादानियस्स धम्मस्स अञ्ञमञ्ञपच्चयेन पच्चयो – उपादिन्नुपादानियो एको खन्धो तिण्णन्नं खन्धानं अञ्ञमञ्ञपच्चयेन पच्चयो…पे… द्वे खन्धा द्विन्नं खन्धानं…पे… पटिसन्धिक्खणे उपादिन्नुपादानियो एको खन्धो तिण्णन्नं खन्धानं वत्थुस्स च…पे… खन्धा वत्थुस्स…पे… वत्थु खन्धानं…पे… एकं महाभूतं तिण्णन्नं महाभूतानं…पे… द्वे महाभूता द्विन्नं महाभूतानं…पे… असञ्ञसत्तानं एकं महाभूतं…पे…. (१)

अनुपादिन्नुपादानियो धम्मो अनुपादिन्नुपादानियस्स धम्मस्स अञ्ञमञ्ञपच्चयेन पच्चयो – अनुपादिन्नुपादानियो एको खन्धो तिण्णन्नं खन्धानं…पे… द्वे खन्धा द्विन्नं खन्धानं अञ्ञमञ्ञपच्चयेन पच्चयो. एकं महाभूतं…पे… बाहिरं… आहारसमुट्ठानं… उतुसमुट्ठानं एकं महाभूतं…पे…. (१)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स अञ्ञमञ्ञपच्चयेन पच्चयो – अनुपादिन्नअनुपादानियो एको खन्धो तिण्णन्नं खन्धानं…पे… द्वे खन्धा द्विन्नं खन्धानं…पे…. (१)

निस्सयपच्चयो

६०. उपादिन्नुपादानियो धम्मो उपादिन्नुपादानियस्स धम्मस्स निस्सयपच्चयेन पच्चयो – उपादिन्नुपादानियो एको खन्धो तिण्णन्नं खन्धानं निस्सयपच्चयेन पच्चयो…पे… पटिसन्धिक्खणे…पे… एकं महाभूतं…पे… असञ्ञसत्तानं एकं महाभूतं…पे… चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु उपादिन्नुपादानियानं खन्धानं निस्सयपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स निस्सयपच्चयेन पच्चयो – उपादिन्नुपादानिया खन्धा चित्तसमुट्ठानानं रूपानं निस्सयपच्चयेन पच्चयो. वत्थु अनुपादिन्नुपादानियानं खन्धानं निस्सयपच्चयेन पच्चयो. (२)

उपादिन्नुपादानियो धम्मो अनुपादिन्नअनुपादानियस्स धम्मस्स निस्सयपच्चयेन पच्चयो – वत्थु अनुपादिन्नअनुपादानियानं खन्धानं निस्सयपच्चयेन पच्चयो. (३)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स निस्सयपच्चयेन पच्चयो – उपादिन्नुपादानियो एको खन्धो तिण्णन्नं खन्धानं चित्तसमुट्ठानानञ्च रूपानं निस्सयपच्चयेन पच्चयो…पे… द्वे खन्धा द्विन्नं खन्धानं चित्तसमुट्ठानानञ्च रूपानं निस्सयपच्चयेन पच्चयो. (४)

अनुपादिन्नुपादानियो धम्मो अनुपादिन्नुपादानियस्स धम्मस्स… एका.

अनुपादिन्नअनुपादानियो धम्मो… तीणि.

उपादिन्नुपादानियो च अनुपादिन्नअनुपादानियो च धम्मा अनुपादिन्नअनुपादानियस्स धम्मस्स निस्सयपच्चयेन पच्चयो – अनुपादिन्नअनुपादानियो एको खन्धो च वत्थु च तिण्णन्नं खन्धानं निस्सयपच्चयेन पच्चयो…पे… द्वे खन्धा च वत्थु च द्विन्नं खन्धानं निस्सयपच्चयेन पच्चयो. (१)

अनुपादिन्नुपादानियो च अनुपादिन्नअनुपादानियो च धम्मा अनुपादिन्नुपादानियस्स धम्मस्स निस्सयपच्चयेन पच्चयो – अनुपादिन्नअनुपादानिया खन्धा च महाभूता च चित्तसमुट्ठानानं रूपानं निस्सयपच्चयेन पच्चयो. (१)

उपादिन्नुपादानियो च अनुपादिन्नुपादानियो च धम्मा अनुपादिन्नुपादानियस्स धम्मस्स निस्सयपच्चयेन पच्चयो – उपादिन्नुपादानिया खन्धा च महाभूता च चित्तसमुट्ठानानं रूपानं निस्सयपच्चयेन पच्चयो. अनुपादिन्नुपादानियो एको खन्धो च वत्थु च तिण्णन्नं खन्धानं निस्सयपच्चयेन पच्चयो…पे… द्वे खन्धा च वत्थु च द्विन्नं खन्धानं निस्सयपच्चयेन पच्चयो. (१)

उपनिस्सयपच्चयो

६१. उपादिन्नुपादानियो धम्मो उपादिन्नुपादानियस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – कायिकं सुखं कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो. कायिकं दुक्खं कायिकस्स सुखस्स, कायिकस्स दुक्खस्स…पे… उतु कायिकस्स सुखस्स, कायिकस्स दुक्खस्स…पे… भोजनं कायिकस्स सुखस्स, कायिकस्स दुक्खस्स…पे… कायिकं सुखं… कायिकं दुक्खं… उतु… भोजनं कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – कायिकं सुखं उपनिस्साय दानं देति, सीलं समादियति, उपोसथकम्मं करोति, झानं उप्पादेति, विपस्सनं उप्पादेति, अभिञ्ञं उप्पादेति, समापत्तिं उप्पादेति, पाणं हनति…पे… सङ्घं भिन्दति. कायिकं दुक्खं… उतुं… भोजनं उपनिस्साय दानं देति…पे… सङ्घं भिन्दति. कायिकं सुखं… कायिकं दुक्खं… उतु… भोजनं अनुपादिन्नुपादानियाय सद्धाय… सीलस्स… सुतस्स… चागस्स… पञ्ञाय… रागस्स… दोसस्स… मोहस्स… मानस्स… दिट्ठिया… पत्थनाय उपनिस्सयपच्चयेन पच्चयो. (२)

उपादिन्नुपादानियो धम्मो अनुपादिन्नअनुपादानियस्स धम्मस्स उपनिस्सयपच्चयेन पच्चयो. पकतूपनिस्सयो – कायिकं सुखं उपनिस्साय मग्गं उप्पादेति, फलसमापत्तिं समापज्जति. कायिकं दुक्खं… उतुं… भोजनं उपनिस्साय मग्गं उप्पादेति, फलसमापत्तिं समापज्जति. कायिकं सुखं… कायिकं दुक्खं… उतु… भोजनं मग्गस्स… फलसमापत्तिया उपनिस्सयपच्चयेन पच्चयो. (३)

६२. अनुपादिन्नुपादानियो धम्मो अनुपादिन्नुपादानियस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अनुपादिन्नुपादानियं सद्धं उपनिस्साय दानं देति, सीलं समादियति, उपोसथकम्मं करोति, झानं उप्पादेति, विपस्सनं उप्पादेति, अभिञ्ञं उप्पादेति, समापत्तिं उप्पादेति, मानं जप्पेति, दिट्ठिं गण्हाति. अनुपादिन्नुपादानियं सीलं… सुतं… चागं… पञ्ञं… रागं… दोसं… मोहं… मानं … दिट्ठिं… पत्थनं… उतुं… भोजनं… सेनासनं उपनिस्साय दानं देति…पे… समापत्तिं उप्पादेति, मानं जप्पेति, दिट्ठिं गण्हाति, पाणं हनति…पे… सङ्घं भिन्दति. अनुपादिन्नुपादानिया सद्धा… सीलं… सुतं… चागो… पञ्ञा… रागो… दोसो… मोहो… मानो… दिट्ठि… पत्थना… उतु… भोजनं… सेनासनं… अनुपादिन्नुपादानियाय सद्धाय… सीलस्स… सुतस्स… चागस्स… पञ्ञाय… रागस्स… दोसस्स… मोहस्स… मानस्स… दिट्ठिया… पत्थनाय उपनिस्सयपच्चयेन पच्चयो. पठमस्स झानस्स परिकम्मं पठमस्स झानस्स…पे… नेवसञ्ञानासञ्ञायतनस्स परिकम्मं नेवसञ्ञानासञ्ञायतनस्स…पे… पठमं झानं दुतियस्स…पे… आकिञ्चञ्ञायतनं नेवसञ्ञानासञ्ञायतनस्स…पे… पाणातिपातो पाणातिपातस्स…पे… नियतमिच्छादिट्ठि नियतमिच्छादिट्ठिया…पे…. (१)

अनुपादिन्नुपादानियो धम्मो उपादिन्नुपादानियस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – अनुपादिन्नुपादानियं सद्धं उपनिस्साय अत्तानं आतापेति परितापेति, परियिट्ठिमूलकं दुक्खं पच्चनुभोति. अनुपादिन्नुपादानियं सीलं …पे… सेनासनं उपनिस्साय अत्तानं आतापेति परितापेति, परियिट्ठिमूलकं दुक्खं पच्चनुभोति. अनुपादिन्नुपादानिया सद्धा…पे… सेनासनं कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो. कुसलाकुसलं कम्मं विपाकस्स उपनिस्सयपच्चयेन पच्चयो. (२)

अनुपादिन्नुपादानियो धम्मो अनुपादिन्नअनुपादानियस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – पठमस्स मग्गस्स परिकम्मं पठमस्स मग्गस्स उपनिस्सयपच्चयेन पच्चयो. दुतियस्स मग्गस्स…पे… ततियस्स मग्गस्स…पे… चतुत्थस्स मग्गस्स परिकम्मं चतुत्थस्स मग्गस्स उपनिस्सयपच्चयेन पच्चयो. (३)

६३. अनुपादिन्नअनुपादानियो धम्मो अनुपादिन्नअनुपादानियस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – पठमो मग्गो दुतियस्स मग्गस्स उपनिस्सयपच्चयेन पच्चयो. दुतियो मग्गो ततियस्स मग्गस्स…पे… ततियो मग्गो चतुत्थस्स मग्गस्स…पे… मग्गो फलसमापत्तिया उपनिस्सयपच्चयेन पच्चयो. (१)

अनुपादिन्नअनुपादानियो धम्मो उपादिन्नुपादानियस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – फलसमापत्ति कायिकस्स सुखस्स उपनिस्सयपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स धम्मस्स उपनिस्सयपच्चयेन पच्चयो – आरम्मणूपनिस्सयो, पकतूनिस्सयो…पे…. पकतूपनिस्सयो – अरिया मग्गं उपनिस्साय अनुप्पन्नं समापत्तिं उप्पादेन्ति, उप्पन्नं समापत्तिं समापज्जन्ति, सङ्खारे अनिच्चतो दुक्खतो अनत्ततो विपस्सन्ति. मग्गो अरियानं अत्थप्पटिसम्भिदाय धम्मप्पटिसम्भिदाय निरुत्तिप्पटिसम्भिदाय पटिभानप्पटिसम्भिदाय ठानाठानकोसल्लस्स उपनिस्सयपच्चयेन पच्चयो. (३)

पुरेजातपच्चयो

६४. उपादिन्नुपादानियो धम्मो उपादिन्नुपादानियस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – सेक्खा वा पुथुज्जना वा चक्खुं अनिच्चतो दुक्खतो अनत्ततो विपस्सन्ति, अस्सादेन्ति अभिनन्दन्ति; तं आरब्भ रागो उप्पज्जति…पे… दोमनस्सं उप्पज्जति; कुसलाकुसले निरुद्धे विपाको तदारम्मणता उप्पज्जति. सोतं… घानं… जिव्हं… कायं… उपादिन्नुपादानिये रूपे… गन्धे… रसे… फोट्ठब्बे… वत्थुं अनिच्चतो दुक्खतो अनत्ततो विपस्सन्ति, अस्सादेन्ति अभिनन्दन्ति; तं आरब्भ रागो उप्पज्जति…पे… दोमनस्सं उप्पज्जति. कुसलाकुसले निरुद्धे विपाको तदारम्मणता उप्पज्जति. उपादिन्नुपादानियं रूपायतनं चक्खुविञ्ञाणस्स…पे… उपादिन्नुपादानियं गन्धायतनं… रसायतनं… फोट्ठब्बायतनं कायविञ्ञाणस्स पुरेजातपच्चयेन पच्चयो. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु उपादिन्नुपादानियानं खन्धानं पुरेजातपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं अनिच्चतो दुक्खतो अनत्ततो विपस्सन्ति, अस्सादेन्ति अभिनन्दन्ति; तं आरब्भ रागो उप्पज्जति…पे… दोमनस्सं उप्पज्जति. सोतं…पे… वत्थुं अनिच्चतो दुक्खतो अनत्ततो विपस्सति, अस्सादेति अभिनन्दति; तं आरब्भ रागो उप्पज्जति…पे… दोमनस्सं उप्पज्जति. दिब्बेन चक्खुना उपादिन्नुपादानियं रूपं पस्सन्ति. वत्थुपुरेजातं – वत्थु अनुपादिन्नुपादानियानं खन्धानं पुरेजातपच्चयेन पच्चयो. (२)

उपादिन्नुपादानियो धम्मो अनुपादिन्नअनुपादानियस्स धम्मस्स पुरेजातपच्चयेन पच्चयो. वत्थुपुरेजातं – वत्थु अनुपादिन्नअनुपादानियानं खन्धानं पुरेजातपच्चयेन पच्चयो. (३)

६५. अनुपादिन्नुपादानियो धम्मो अनुपादिन्नुपादानियस्स धम्मस्स पुरेजातपच्चयेन पच्चयो. आरम्मणपुरेजातं – अनुपादिन्नुपादानिये रूपे… सद्दे… गन्धे… रसे… फोट्ठब्बे अनिच्चतो दुक्खतो अनत्ततो विपस्सति, अस्सादेति अभिनन्दति; तं आरब्भ रागो उप्पज्जति …पे… दोमनस्सं उप्पज्जति. दिब्बेन चक्खुना अनुपादिन्नुपादानियं रूपं पस्सति, दिब्बाय सोतधातुया सद्दं सुणाति. (१)

अनुपादिन्नुपादानियो धम्मो उपादिन्नुपादानियस्स धम्मस्स पुरेजातपच्चयेन पच्चयो. आरम्मणपुरेजातं – अनुपादिन्नुपादानिये रूपे… सद्दे… गन्धे… रसे… फोट्ठब्बे अनिच्चतो दुक्खतो अनत्ततो विपस्सति, अस्सादेति अभिनन्दति; तं आरब्भ रागो उप्पज्जति…पे… दोमनस्सं उप्पज्जति. कुसलाकुसले निरुद्धे विपाको तदारम्मणता उप्पज्जति. अनुपादिन्नुपादानियं रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. (२)

उपादिन्नुपादानियो च अनुपादिन्नुपादानियो च धम्मा उपादिन्नुपादानियस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. अनुपादिन्नुपादानियं रूपायतनञ्च चक्खायतनञ्च चक्खुविञ्ञाणस्स पुरेजातपच्चयेन पच्चयो…पे… अनुपादिन्नुपादानियं फोट्ठब्बायतनञ्च कायायतनञ्च कायविञ्ञाणस्स पुरेजातपच्चयेन पच्चयो. अनुपादिन्नुपादानियं रूपायतनञ्च वत्थु च उपादिन्नुपादानियानं खन्धानं पुरेजातपच्चयेन पच्चयो…पे… अनुपादिन्नुपादानियं फोट्ठब्बायतनञ्च वत्थु च उपादिन्नुपादानियानं खन्धानं पुरेजातपच्चयेन पच्चयो. (१)

उपादिन्नुपादानियो च अनुपादिन्नुपादानियो च धम्मा अनुपादिन्नुपादानियस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. अनुपादिन्नुपादानियं रूपायतनञ्च वत्थु च अनुपादिन्नुपादानियानं खन्धानं पुरेजातपच्चयेन पच्चयो…पे… अनुपादिन्नुपादानियं फोट्ठब्बायतनञ्च वत्थु च अनुपादिन्नुपादानियानं खन्धानं पुरेजातपच्चयेन पच्चयो. (२)

पच्छाजातपच्चयो

६६. उपादिन्नुपादानियो धम्मो उपादिन्नुपादानियस्स धम्मस्स पच्छाजातपच्चयेन पच्चयो – पच्छाजाता उपादिन्नुपादानिया खन्धा पुरेजातस्स इमस्स उपादिन्नुपादानियस्स कायस्स पच्छाजातपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स पच्छाजातपच्चयेन पच्चयो – पच्छाजाता उपादिन्नुपादानिया खन्धा पुरेजातस्स इमस्स अनुपादिन्नुपादानियस्स कायस्स पच्छाजातपच्चयेन पच्चयो. (२)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स पच्छाजातपच्चयेन पच्चयो – पच्छाजाता उपादिन्नुपादानिया खन्धा पुरेजातस्स इमस्स उपादिन्नुपादानियस्स च अनुपादिन्नुपादानियस्स च कायस्स पच्छाजातपच्चयेन पच्चयो. (३)

अनुपादिन्नुपादानियो धम्मो अनुपादिन्नुपादानियस्स धम्मस्स पच्छाजातपच्चयेन पच्चयो – पच्छाजाता अनुपादिन्नुपादानिया खन्धा पुरेजातस्स इमस्स अनुपादिन्नुपादानियस्स कायस्स पच्छाजातपच्चयेन पच्चयो. (१)

अनुपादिन्नुपादानियो धम्मो उपादिन्नुपादानियस्स धम्मस्स पच्छाजातपच्चयेन पच्चयो – पच्छाजाता अनुपादिन्नुपादानिया खन्धा पुरेजातस्स इमस्स उपादिन्नुपादानियस्स कायस्स पच्छाजातपच्चयेन पच्चयो. (२)

अनुपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स पच्छाजातपच्चयेन पच्चयो – पच्छाजाता अनुपादिन्नुपादानिया खन्धा पुरेजातस्स इमस्स उपादिन्नुपादानियस्स च अनुपादिन्नुपादानियस्स च कायस्स पच्छाजातपच्चयेन पच्चयो. (३)

६७. अनुपादिन्नअनुपादानियो धम्मो उपादिन्नुपादानियस्स धम्मस्स पच्छाजातपच्चयेन पच्चयो – पच्छाजाता अनुपादिन्नअनुपादानिया खन्धा पुरेजातस्स इमस्स उपादिन्नुपादानियस्स कायस्स पच्छाजातपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स पच्छाजातपच्चयेन पच्चयो – पच्छाजाता अनुपादिन्नअनुपादानिया खन्धा पुरेजातस्स इमस्स अनुपादिन्नुपादानियस्स कायस्स पच्छाजातपच्चयेन पच्चयो. (२)

अनुपादिन्नअनुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स पच्छाजातपच्चयेन पच्चयो – पच्छाजाता अनुपादिन्नअनुपादानिया खन्धा पुरेजातस्स इमस्स उपादिन्नुपादानियस्स च अनुपादिन्नुपादानियस्स च कायस्स पच्छाजातपच्चयेन पच्चयो. (३)

आसेवनपच्चयो

६८. अनुपादिन्नुपादानियो धम्मो अनुपादिन्नुपादानियस्स धम्मस्स आसेवनपच्चयेन पच्चयो – पुरिमा पुरिमा अनुपादिन्नुपादानिया खन्धा पच्छिमानं पच्छिमानं अनुपादिन्नुपादानियानं खन्धानं आसेवनपच्चयेन पच्चयो. अनुलोमं गोत्रभुस्स… अनुलोमं वोदानस्स आसेवनपच्चयेन पच्चयो. (१)

अनुपादिन्नुपादानियो धम्मो अनुपादिन्नअनुपादानियस्स धम्मस्स आसेवनपच्चयेन पच्चयो – गोत्रभु मग्गस्स… वोदानं मग्गस्स आसेवनपच्चयेन पच्चयो. (२)

कम्मपच्चयो

६९. उपादिन्नुपादानियो धम्मो उपादिन्नुपादानियस्स धम्मस्स कम्मपच्चयेन पच्चयो – उपादिन्नुपादानिया चेतना सम्पयुत्तकानं खन्धानं कम्मपच्चयेन पच्चयो; पटिसन्धिक्खणे उपादिन्नुपादानिया चेतना सम्पयुत्तकानं खन्धानं कटत्ता च रूपानं कम्मपच्चयेन पच्चयो. चेतना वत्थुस्स कम्मपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स कम्मपच्चयेन पच्चयो – उपादिन्नुपादानिया चेतना चित्तसमुट्ठानानं रूपानं कम्मपच्चयेन पच्चयो. (२)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स कम्मपच्चयेन पच्चयो – उपादिन्नुपादानिया चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

अनुपादिन्नुपादानियो धम्मो अनुपादिन्नुपादानियस्स धम्मस्स कम्मपच्चयेन पच्चयो – अनुपादिन्नुपादानिया चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (१)

अनुपादिन्नुपादानियो धम्मो उपादिन्नुपादानियस्स धम्मस्स कम्मपच्चयेन पच्चयो – नानाक्खणिका अनुपादिन्नुपादानिया चेतना विपाकानं उपादिन्नुपादानियानं खन्धानं कटत्ता च रूपानं कम्मपच्चयेन पच्चयो. (२)

७०. अनुपादिन्नअनुपादानियो धम्मो अनुपादिन्नअनुपादानियस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – अनुपादिन्नअनुपादानिया चेतना सम्पयुत्तकानं खन्धानं कम्मपच्चयेन पच्चयो. नानाक्खणिका – अनुपादिन्नअनुपादानिया कुसला चेतना विपाकानं अनुपादिन्नअनुपादानियानं खन्धानं कम्मपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स कम्मपच्चयेन पच्चयो – अनुपादिन्नअनुपादानिया चेतना चित्तसमुट्ठानानं रूपानं कम्मपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स च अनुपादिन्नअनुपादानियस्स च धम्मस्स कम्मपच्चयेन पच्चयो – अनुपादिन्नअनुपादानिया चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

विपाकपच्चयो

७१. उपादिन्नुपादानियो धम्मो उपादिन्नुपादानियस्स धम्मस्स विपाकपच्चयेन पच्चयो – विपाको उपादिन्नुपादानियो एको खन्धो तिण्णन्नं खन्धानं विपाकपच्चयेन पच्चयो…पे… द्वे खन्धा द्विन्नं खन्धानं विपाकपच्चयेन पच्चयो; पटिसन्धिक्खणे विपाको उपादिन्नुपादानियो एको खन्धो तिण्णन्नं खन्धानं कटत्ता च रूपानं विपाकपच्चयेन पच्चयो…पे… द्वे खन्धा द्विन्नं खन्धानं कटत्ता च रूपानं विपाकपच्चयेन पच्चयो. खन्धा वत्थुस्स विपाकपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स विपाकपच्चयेन पच्चयो – विपाका उपादिन्नुपादानिया खन्धा चित्तसमुट्ठानानं रूपानं विपाकपच्चयेन पच्चयो. (२)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स विपाकपच्चयेन पच्चयो – विपाको उपादिन्नुपादानियो एको खन्धो तिण्णन्नं खन्धानं चित्तसमुट्ठानानञ्च रूपानं विपाकपच्चयेन पच्चयो …पे… द्वे खन्धा द्विन्नं खन्धानं चित्तसमुट्ठानानञ्च रूपानं विपाकपच्चयेन पच्चयो. (३)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स विपाकपच्चयेन पच्चयो – विपाको अनुपादिन्नअनुपादानियो एको खन्धो तिण्णन्नं खन्धानं विपाकपच्चयेन पच्चयो…पे… द्वे खन्धा द्विन्नं खन्धानं विपाकपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स विपाकपच्चयेन पच्चयो – विपाका अनुपादिन्नअनुपादानिया खन्धा चित्तसमुट्ठानानं रूपानं विपाकपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स च अनुपादिन्नअनुपादानियस्स च धम्मस्स विपाकपच्चयेन पच्चयो – विपाको अनुपादिन्नअनुपादानियो एको खन्धो तिण्णन्नं खन्धानं चित्तसमुट्ठानानञ्च रूपानं विपाकपच्चयेन पच्चयो…पे… द्वे खन्धा द्विन्नं खन्धानं चित्तसमुट्ठानानञ्च रूपानं विपाकपच्चयेन पच्चयो. (३)

आहारपच्चयो

७२. उपादिन्नुपादानियो धम्मो उपादिन्नुपादानियस्स धम्मस्स आहारपच्चयेन पच्चयो – उपादिन्नुपादानिया आहारा सम्पयुत्तकानं खन्धानं आहारपच्चयेन पच्चयो; पटिसन्धिक्खणे उपादिन्नुपादानिया आहारा सम्पयुत्तकानं खन्धानं कटत्ता च रूपानं आहारपच्चयेन पच्चयो. उपादिन्नुपादानियो कबळीकारो आहारो उपादिन्नुपादानियस्स कायस्स आहारपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स आहारपच्चयेन पच्चयो – उपादिन्नुपादानिया आहारा चित्तसमुट्ठानानं रूपानं आहारपच्चयेन पच्चयो; उपादिन्नुपादानियो कबळीकारो आहारो अनुपादिन्नुपादानियस्स कायस्स आहारपच्चयेन पच्चयो. (२)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स आहारपच्चयेन पच्चयो – उपादिन्नुपादानिया आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो. उपादिन्नुपादानियो कबळीकारो आहारो उपादिन्नुपादानियस्स च अनुपादिन्नुपादानियस्स च कायस्स आहारपच्चयेन पच्चयो. (३)

७३. अनुपादिन्नुपादानियो धम्मो अनुपादिन्नुपादानियस्स धम्मस्स आहारपच्चयेन पच्चयो – अनुपादिन्नुपादानिया आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो. अनुपादिन्नुपादानियो कबळीकारो आहारो अनुपादिन्नुपादानियस्स कायस्स आहारपच्चयेन पच्चयो. (१)

अनुपादिन्नुपादानियो धम्मो उपादिन्नुपादानियस्स धम्मस्स आहारपच्चयेन पच्चयो – अनुपादिन्नुपादानियो कबळीकारो आहारो उपादिन्नुपादानियस्स कायस्स आहारपच्चयेन पच्चयो. (२)

अनुपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स आहारपच्चयेन पच्चयो – अनुपादिन्नुपादानियो कबळीकारो आहारो उपादिन्नुपादानियस्स च अनुपादिन्नुपादानियस्स च कायस्स आहारपच्चयेन पच्चयो. (३)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स आहारपच्चयेन पच्चयो – अनुपादिन्नअनुपादानिया आहारा सम्पयुत्तकानं खन्धानं आहारपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स आहारपच्चयेन पच्चयो – अनुपादिन्नअनुपादानिया आहारा चित्तसमुट्ठानानं रूपानं आहारपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स च अनुपादिन्नअनुपादानियस्स च धम्मस्स आहारपच्चयेन पच्चयो – अनुपादिन्नअनुपादानिया आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो. (३)

७४. उपादिन्नुपादानियो च अनुपादिन्नुपादानियो च धम्मा उपादिन्नुपादानियस्स धम्मस्स आहारपच्चयेन पच्चयो – उपादिन्नुपादानियो च अनुपादिन्नुपादानियो च कबळीकारो आहारो उपादिन्नुपादानियस्स कायस्स आहारपच्चयेन पच्चयो. (१)

उपादिन्नुपादानियो च अनुपादिन्नुपादानियो च धम्मा अनुपादिन्नुपादानियस्स धम्मस्स आहारपच्चयेन पच्चयो – उपादिन्नुपादानियो च अनुपादिन्नुपादानियो च कबळीकारो आहारो अनुपादिन्नुपादानियस्स कायस्स आहारपच्चयेन पच्चयो. (२)

उपादिन्नुपादानियो च अनुपादिन्नुपादानियो च धम्मा उपादिन्नुपादानियस्स च अनुपादिन्नुपादानियस्स च धम्मस्स आहारपच्चयेन पच्चयो – उपादिन्नुपादानियो च अनुपादिन्नुपादानियो च कबळीकारो आहारो उपादिन्नुपादानियस्स च अनुपादिन्नुपादानियस्स च कायस्स आहारपच्चयेन पच्चयो. (३)

इन्द्रियपच्चयो

७५. उपादिन्नुपादानियो धम्मो उपादिन्नुपादानियस्स धम्मस्स इन्द्रियपच्चयेन पच्चयो – उपादिन्नुपादानिया इन्द्रिया सम्पयुत्तकानं खन्धानं इन्द्रियपच्चयेन पच्चयो; पटिसन्धिक्खणे उपादिन्नुपादानिया इन्द्रिया सम्पयुत्तकानं खन्धानं कटत्ता च रूपानं इन्द्रियपच्चयेन पच्चयो. चक्खुन्द्रियं चक्खुविञ्ञाणस्स…पे… कायिन्द्रियं कायविञ्ञाणस्स…पे… रूपजीवितिन्द्रियं कटत्तारूपानं इन्द्रियपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स इन्द्रियपच्चयेन पच्चयो – उपादिन्नुपादानिया इन्द्रिया चित्तसमुट्ठानानं रूपानं इन्द्रियपच्चयेन पच्चयो. (२)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स इन्द्रियपच्चयेन पच्चयो – उपादिन्नुपादानिया इन्द्रिया सम्पयुत्तकानं खन्धानं चित्तसमुट्ठानानञ्च रूपानं इन्द्रियपच्चयेन पच्चयो. (३)

अनुपादिन्नुपादानियो धम्मो अनुपादिन्नुपादानियस्स धम्मस्स इन्द्रियपच्चयेन पच्चयो – अनुपादिन्नुपादानिया इन्द्रिया सम्पयुत्तकानं खन्धानं चित्तसमुट्ठानानञ्च रूपानं इन्द्रियपच्चयेन पच्चयो. (१)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स इन्द्रियपच्चयेन पच्चयो – अनुपादिन्नअनुपादानिया इन्द्रिया सम्पयुत्तकानं खन्धानं इन्द्रियपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स इन्द्रियपच्चयेन पच्चयो – अनुपादिन्नअनुपादानिया इन्द्रिया चित्तसमुट्ठानानं रूपानं इन्द्रियपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स च अनुपादिन्नअनुपादानियस्स च धम्मस्स इन्द्रियपच्चयेन पच्चयो – अनुपादिन्नअनुपादानिया इन्द्रिया सम्पयुत्तकानं खन्धानं चित्तसमुट्ठानानञ्च रूपानं इन्द्रियपच्चयेन पच्चयो. (३)

झानपच्चयो

७६. उपादिन्नुपादानियो धम्मो उपादिन्नुपादानियस्स धम्मस्स झानपच्चयेन पच्चयो – उपादिन्नुपादानियानि झानङ्गानि सम्पयुत्तकानं खन्धानं झानपच्चयेन पच्चयो; पटिसन्धिक्खणे उपादिन्नुपादानियानि झानङ्गानि सम्पयुत्तकानं खन्धानं कटत्ता च रूपानं झानपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स झानपच्चयेन पच्चयो – उपादिन्नुपादानियानि झानङ्गानि चित्तसमुट्ठानानं रूपानं झानपच्चयेन पच्चयो. (२)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स झानपच्चयेन पच्चयो – उपादिन्नुपादानियानि झानङ्गानि सम्पयुत्तकानं खन्धानं चित्तसमुट्ठानानञ्च रूपानं झानपच्चयेन पच्चयो. (३)

अनुपादिन्नुपादानियो धम्मो अनुपादिन्नुपादानियस्स धम्मस्स झानपच्चयेन पच्चयो – अनुपादिन्नुपादानियानि झानङ्गानि सम्पयुत्तकानं खन्धानं चित्तसमुट्ठानानञ्च रूपानं झानपच्चयेन पच्चयो. (१)

७७. अनुपादिन्नअनुपादानियो धम्मो अनुपादिन्नअनुपादानियस्स धम्मस्स झानपच्चयेन पच्चयो – अनुपादिन्नअनुपादानियानि झानङ्गानि सम्पयुत्तकानं खन्धानं झानपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स झानपच्चयेन पच्चयो – अनुपादिन्नअनुपादानियानि झानङ्गानि चित्तसमुट्ठानानं रूपानं झानपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स च अनुपादिन्नअनुपादानियस्स च धम्मस्स झानपच्चयेन पच्चयो – अनुपादिन्नअनुपादानियानि झानङ्गानि सम्पयुत्तकानं खन्धानं चित्तसमुट्ठानानञ्च रूपानं झानपच्चयेन पच्चयो. (३)

मग्गपच्चयो

७८. उपादिन्नुपादानियो धम्मो उपादिन्नुपादानियस्स धम्मस्स मग्गपच्चयेन पच्चयो – उपादिन्नुपादानियानि मग्गङ्गानि सम्पयुत्तकानं खन्धानं मग्गपच्चयेन पच्चयो. पटिसन्धिक्खणे…पे…. (१)

उपादिन्नुपादानियो धम्मो अनुपादिन्नुपादानियस्स धम्मस्स मग्गपच्चयेन पच्चयो – उपादिन्नुपादानियानि मग्गङ्गानि चित्तसमुट्ठानानं रूपानं मग्गपच्चयेन पच्चयो. (२)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स मग्गपच्चयेन पच्चयो – उपादिन्नुपादानियानि मग्गङ्गानि सम्पयुत्तकानं खन्धानं चित्तसमुट्ठानानञ्च रूपानं मग्गपच्चयेन पच्चयो. (३)

अनुपादिन्नुपादानियो धम्मो अनुपादिन्नुपादानियस्स धम्मस्स मग्गपच्चयेन पच्चयो – अनुपादिन्नुपादानियानि मग्गङ्गानि सम्पयुत्तकानं खन्धानं चित्तसमुट्ठानानञ्च रूपानं मग्गपच्चयेन पच्चयो. (१)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स मग्गपच्चयेन पच्चयो – अनुपादिन्नअनुपादानियानि मग्गङ्गानि सम्पयुत्तकानं खन्धानं मग्गपच्चयेन पच्चयो. (१)

अनुपादिन्नअनुपादानियो धम्मो अनुपादिन्नुपादानियस्स धम्मस्स मग्गपच्चयेन पच्चयो – अनुपादिन्नअनुपादानियानि मग्गङ्गानि चित्तसमुट्ठानानं रूपानं मग्गपच्चयेन पच्चयो. (२)

अनुपादिन्नअनुपादानियो धम्मो अनुपादिन्नुपादानियस्स च अनुपादिन्नअनुपादानियस्स च धम्मस्स मग्गपच्चयेन पच्चयो – अनुपादिन्नअनुपादानियानि मग्गङ्गानि सम्पयुत्तकानं खन्धानं चित्तसमुट्ठानानञ्च रूपानं मग्गपच्चयेन पच्चयो. (३)

सम्पयुत्तपच्चयो

७९. उपादिन्नुपादानियो धम्मो उपादिन्नुपादानियस्स धम्मस्स सम्पयुत्तपच्चयेन पच्चयो – उपादिन्नुपादानियो एको खन्धो तिण्णन्नं खन्धानं सम्पयुत्तपच्चयेन पच्चयो…पे… द्वे खन्धा द्विन्नं खन्धानं…पे… पटिसन्धिक्खणे…पे…. (१)

अनुपादिन्नुपादानियो धम्मो अनुपादिन्नुपादानियस्स धम्मस्स सम्पयुत्तपच्चयेन पच्चयो – अनुपादिन्नुपादानियो एको खन्धो तिण्णन्नं खन्धानं सम्पयुत्तपच्चयेन पच्चयो…पे… द्वे खन्धा द्विन्नं खन्धानं…पे…. (१)

अनुपादिन्नअनुपादानियो धम्मो अनुपादिन्नअनुपादानियस्स धम्मस्स सम्पयुत्तपच्चयेन पच्चयो – अनुपादिन्नअनुपादानियो एको खन्धो तिण्णन्नं खन्धानं सम्पयुत्तपच्चयेन पच्चयो…पे… द्वे खन्धा द्विन्नं खन्धानं…पे…. (१)

विप्पयुत्तपच्चयो

८०. उपादिन्नुपादानियो धम्मो उपादिन्नुपादानियस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – पटिसन्धिक्खणे उपादिन्नुपादानिया खन्धा कटत्तारूपानं विप्पयुत्तपच्चयेन पच्चयो. खन्धा वत्थुस्स विप्पयुत्तपच्चयेन पच्चयो. वत्थु खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स विप्पयुत्तपच्चयेन पच्चयो…पे… कायायतनं कायविञ्ञाणस्स विप्पयुत्तपच्चयेन पच्चयो. वत्थु उपादिन्नुपादानियानं खन्धानं विप्पयुत्तपच्चयेन पच्चयो. पच्छाजाता – उपादिन्नुपादानिया खन्धा पुरेजातस्स इमस्स उपादिन्नुपादानियस्स कायस्स विप्पयुत्तपच्चयेन पच्चयो. (१)

उपादिन्नुपादानियो धम्मो अनुपादिन्नुपादानियस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – उपादिन्नुपादानिया खन्धा चित्तसमुट्ठानानं रूपानं विप्पयुत्तपच्चयेन पच्चयो. पुरेजातं – वत्थु अनुपादिन्नुपादानियानं खन्धानं विप्पयुत्तपच्चयेन पच्चयो. पच्छाजाता – उपादिन्नुपादानिया खन्धा पुरेजातस्स इमस्स अनुपादिन्नुपादानियस्स कायस्स विप्पयुत्तपच्चयेन पच्चयो. (२)

उपादिन्नुपादानियो धम्मो अनुपादिन्नअनुपादानियस्स धम्मस्स विप्पयुत्तपच्चयेन पच्चयो. पुरेजातं – वत्थु अनुपादिन्नअनुपादानियानं खन्धानं विप्पयुत्तपच्चयेन पच्चयो. (३)

उपादिन्नुपादानियो धम्मो उपादिन्नुपादानियस्स च अनुपादिन्नुपादानियस्स च धम्मस्स विप्पयुत्तपच्चयेन पच्चयो. पच्छाजाता – उपादिन्नुपादानिया खन्धा पुरेजातस्स इमस्स उपादिन्नुपादानियस्स च अनुपादिन्नुपादानियस्स च कायस्स विप्पयुत्तपच्चयेन पच्चयो. (४)

८१. अनुपादिन्नुपादानियो धम्मो अनुपादिन्नुपादानियस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – अनुपादिन्नुपादानिया खन्धा चित्तसमुट्ठानानं रूपानं विप्पयुत्तपच्चयेन पच्चयो. पच्छाजाता – अनुपादिन्नुपादानिया खन्धा पुरेजातस्स इमस्स अनुपादिन्नुपादानियस्स कायस्स विप्पयुत्तपच्चयेन पच्चयो. (१)