१. विभङ्गवारो

नहेतुपच्चयो

२४. विपाकं धम्मं पटिच्च विपाको धम्मो उप्पज्जति नहेतुपच्चया – अहेतुकं विपाकं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा; अहेतुकपटिसन्धिक्खणे विपाकं एकं खन्धं पटिच्च तयो खन्धा, तयो खन्धे पटिच्च एको खन्धो, द्वे खन्धे पटिच्च द्वे खन्धा. (१)

विपाकं धम्मं पटिच्च नेवविपाकनविपाकधम्मधम्मो उप्पज्जति नहेतुपच्चया – अहेतुके विपाके खन्धे पटिच्च चित्तसमुट्ठानं रूपं; अहेतुकपटिसन्धिक्खणे विपाके खन्धे पटिच्च कटत्तारूपं, खन्धे पटिच्च वत्थु. (२)

विपाकं धम्मं पटिच्च विपाको च नेवविपाकनविपाकधम्मधम्मो च धम्मा उप्पज्जन्ति नहेतुपच्चया – अहेतुकं विपाकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं; अहेतुकपटिसन्धिक्खणे विपाकं एकं खन्धं पटिच्च तयो खन्धा कटत्ता च रूपं…पे… द्वे खन्धे पटिच्च द्वे खन्धा कटत्ता च रूपं. (३)

२५. विपाकधम्मधम्मं पटिच्च विपाकधम्मधम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नहेतुपच्चया – अहेतुकं नेवविपाकनविपाकधम्मधम्मं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं, एकं महाभूतं पटिच्च तयो महाभूता…पे… द्वे महाभूते पटिच्च द्वे महाभूता, महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं. (१)

नेवविपाकनविपाकधम्मधम्मं पटिच्च विपाको धम्मो उप्पज्जति नहेतुपच्चया – अहेतुकपटिसन्धिक्खणे वत्थुं पटिच्च विपाका खन्धा. (२)

नेवविपाकनविपाकधम्मधम्मं पटिच्च विपाको च नेवविपाकनविपाकधम्मधम्मो च धम्मा उप्पज्जन्ति नहेतुपच्चया – अहेतुकपटिसन्धिक्खणे वत्थुं पटिच्च विपाका खन्धा, महाभूते पटिच्च कटत्तारूपं. (३)

२६. विपाकञ्च नेवविपाकनविपाकधम्मधम्मञ्च धम्मं पटिच्च विपाको धम्मो उप्पज्जति नहेतुपच्चया – अहेतुकपटिसन्धिक्खणे विपाकं एकं खन्धञ्च वत्थुञ्च पटिच्च तयो खन्धा…पे… द्वे खन्धे च वत्थुञ्च पटिच्च द्वे खन्धा. (१)

विपाकञ्च नेवविपाकनविपाकधम्मधम्मञ्च धम्मं पटिच्च नेवविपाकनविपाकधम्मधम्मो उप्पज्जति नहेतुपच्चया – अहेतुके विपाके खन्धे च महाभूते च पटिच्च चित्तसमुट्ठानं रूपं; अहेतुकपटिसन्धिक्खणे विपाके खन्धे च महाभूते च पटिच्च कटत्तारूपं. (२)

विपाकञ्च नेवविपाकनविपाकधम्मधम्मञ्च धम्मं पटिच्च विपाको च नेवविपाकनविपाकधम्मधम्मो च धम्मा उप्पज्जन्ति नहेतुपच्चया – अहेतुकपटिसन्धिक्खणे विपाकं एकं खन्धञ्च वत्थुञ्च पटिच्च तयो खन्धा…पे… द्वे खन्धे च वत्थुञ्च पटिच्च द्वे खन्धा, विपाके खन्धे च महाभूते च पटिच्च कटत्तारूपं. (३)

नआरम्मणपच्चयो

२७. विपाकं धम्मं पटिच्च नेवविपाकनविपाकधम्मधम्मो उप्पज्जति नआरम्मणपच्चया – विपाके खन्धे पटिच्च चित्तसमुट्ठानं रूपं; पटिसन्धिक्खणे विपाके खन्धे पटिच्च कटत्तारूपं, खन्धे पटिच्च वत्थु. (१)

२८. विपाकधम्मधम्मं पटिच्च नेवविपाकनविपाकधम्मधम्मो उप्पज्जति नआरम्मणपच्चया – विपाकधम्मधम्मे खन्धे पटिच्च चित्तसमुट्ठानं रूपं. (१)

२९. नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नआरम्मणपच्चया – नेवविपाकनविपाकधम्मधम्मे खन्धे पटिच्च चित्तसमुट्ठानं रूपं, एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता… महाभूते पटिच्च कटत्तारूपं उपादारूपं. (१)

३०. विपाकञ्च नेवविपाकनविपाकधम्मधम्मञ्च धम्मं पटिच्च नेवविपाकनविपाकधम्मधम्मो उप्पज्जति नआरम्मणपच्चया – विपाके खन्धे च महाभूते च पटिच्च चित्तसमुट्ठानं रूपं; पटिसन्धिक्खणे विपाके खन्धे च महाभूते च पटिच्च कटत्तारूपं. (१)

३१. विपाकधम्मधम्मञ्च नेवविपाकनविपाकधम्मधम्मञ्च धम्मं पटिच्च नेवविपाकनविपाकधम्मधम्मो उप्पज्जति नआरम्मणपच्चया – विपाकधम्मधम्मे खन्धे च महाभूते च पटिच्च चित्तसमुट्ठानं रूपं. (१)

नअधिपतिपच्चयो

३२. विपाकं धम्मं पटिच्च विपाको धम्मो उप्पज्जति नअधिपतिपच्चया. (संखित्तं. यथा अनुलोमं सहजातसदिसं.)

नअनन्तरपच्चयादि

३३. विपाकं धम्मं पटिच्च नेवविपाकनविपाकधम्मधम्मो उप्पज्जति नअनन्तरपच्चया … नसमनन्तरपच्चया… नअञ्ञमञ्ञपच्चया…पे… महाभूते पटिच्च चित्तसमुट्ठानं रूपं कटत्तारूपं उपादारूपं; बाहिरं… आहारसमुट्ठानं… उतुसमुट्ठानं, असञ्ञसत्तानं महाभूते पटिच्च कटत्तारूपं उपादारूपं (इदं नानत्तं) नअञ्ञमञ्ञपच्चया… नउपनिस्सयपच्चया… (संखित्तं).

नपुरेजातपच्चयो

३४. विपाकं धम्मं पटिच्च विपाको धम्मो उप्पज्जति नपुरेजातपच्चया – अरूपे विपाकं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा; पटिसन्धिक्खणे विपाकं एकं खन्धं (संखित्तं). (१)

विपाकं धम्मं पटिच्च नेवविपाकनविपाकधम्मधम्मो उप्पज्जति नपुरेजातपच्चया – विपाके खन्धे पटिच्च चित्तसमुट्ठानं रूपं, पटिसन्धिक्खणे (संखित्तं). (२)

विपाकं धम्मं पटिच्च विपाको च नेवविपाकनविपाकधम्मधम्मो च धम्मा उप्पज्जन्ति नपुरेजातपच्चया – पटिसन्धिक्खणे विपाकं एकं खन्धं पटिच्च तयो खन्धा कटत्ता च रूपं…पे… द्वे खन्धे पटिच्च द्वे खन्धा कटत्ता च रूपं. (३)

विपाकधम्मधम्मं पटिच्च विपाकधम्मधम्मो उप्पज्जति नपुरेजातपच्चया – अरूपे विपाकधम्मधम्मं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

विपाकधम्मधम्मं पटिच्च नेवविपाकनविपाकधम्मधम्मो उप्पज्जति नपुरेजातपच्चया – विपाकधम्मधम्मे खन्धे पटिच्च चित्तसमुट्ठानं रूपं. (२)

३५. नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नपुरेजातपच्चया – अरूपे नेवविपाकनविपाकधम्मधम्मं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा, नेवविपाकनविपाकधम्मधम्मे खन्धे पटिच्च चित्तसमुट्ठानं रूपं, एकं महाभूतं पटिच्च तयो महाभूता…पे… बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च…पे…. (१)

नेवविपाकनविपाकधम्मधम्मं पटिच्च विपाको धम्मो उप्पज्जति नपुरेजातपच्चया – पटिसन्धिक्खणे वत्थुं पटिच्च विपाका खन्धा. (२)

नेवविपाकनविपाकधम्मधम्मं पटिच्च विपाको च नेवविपाकनविपाकधम्मधम्मो च धम्मा उप्पज्जन्ति नपुरेजातपच्चया – पटिसन्धिक्खणे वत्थुं पटिच्च विपाका खन्धा, महाभूते पटिच्च कटत्तारूपं. (३)

३६. विपाकञ्च नेवविपाकनविपाकधम्मधम्मञ्च धम्मं पटिच्च विपाको धम्मो उप्पज्जति नपुरेजातपच्चया – पटिसन्धिक्खणे विपाकं एकं खन्धञ्च वत्थुञ्च पटिच्च तयो खन्धा…पे… द्वे खन्धे च वत्थुञ्च पटिच्च द्वे खन्धा. (१)

विपाकञ्च नेवविपाकनविपाकधम्मधम्मञ्च धम्मं पटिच्च नेवविपाकनविपाकधम्मधम्मो उप्पज्जति नपुरेजातपच्चया – विपाके खन्धे च महाभूते च पटिच्च चित्तसमुट्ठानं रूपं; पटिसन्धिक्खणे विपाके खन्धे च महाभूते च पटिच्च कटत्तारूपं. (२)

विपाकञ्च नेवविपाकनविपाकधम्मधम्मञ्च धम्मं पटिच्च विपाको च नेवविपाकनविपाकधम्मधम्मो च धम्मा उप्पज्जन्ति नपुरेजातपच्चया – पटिसन्धिक्खणे विपाकं एकं खन्धञ्च वत्थुञ्च पटिच्च तयो खन्धा…पे… द्वे खन्धे च वत्थुञ्च पटिच्च द्वे खन्धा; विपाके खन्धे च महाभूते च पटिच्च कटत्तारूपं. (३)

३७. विपाकधम्मधम्मञ्च नेवविपाकनविपाकधम्मधम्मञ्च धम्मं पटिच्च नेवविपाकनविपाकधम्मधम्मो उप्पज्जति नपुरेजातपच्चया – विपाकधम्मधम्मे खन्धे च महाभूते च पटिच्च चित्तसमुट्ठानं रूपं.

नपच्छाजातपच्चयादि

३८. विपाकं धम्मं पटिच्च विपाको धम्मो उप्पज्जति नपच्छाजातपच्चया…पे… नआसेवनपच्चया (संखित्तं).

नकम्मपच्चयो

३९. विपाकधम्मधम्मं पटिच्च विपाकधम्मधम्मो उप्पज्जति नकम्मपच्चया – विपाकधम्मधम्मे खन्धे पटिच्च विपाकधम्मधम्मा चेतना.

नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नकम्मपच्चया – नेवविपाकनविपाकधम्मधम्मे खन्धे पटिच्च नेवविपाकनविपाकधम्मधम्मा चेतना; बाहिरं… आहारसमुट्ठानं… उतुसमुट्ठानं एकं महाभूतं पटिच्च तयो महाभूता…पे… महाभूते पटिच्च उपादारूपं.

नविपाकपच्चयो

४०. विपाकधम्मधम्मं पटिच्च विपाकधम्मधम्मो उप्पज्जति नविपाकपच्चया – विपाकधम्मधम्मं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

विपाकधम्मधम्मं पटिच्च नेवविपाकनविपाकधम्मधम्मो उप्पज्जति नविपाकपच्चया – विपाकधम्मधम्मे खन्धे पटिच्च चित्तसमुट्ठानं रूपं. (२)

विपाकधम्मधम्मं पटिच्च विपाकधम्मधम्मो च नेवविपाकनविपाकधम्मधम्मो च धम्मा उप्पज्जन्ति नविपाकपच्चया – विपाकधम्मधम्मं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं. (३)

४१. नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नविपाकपच्चया – नेवविपाकनविपाकधम्मधम्मं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं. एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं. (१)

विपाकधम्मधम्मञ्च नेवविपाकनविपाकधम्मधम्मञ्च धम्मं पटिच्च नेवविपाकनविपाकधम्मधम्मो उप्पज्जति नविपाकपच्चया – विपाकधम्मधम्मे खन्धे च महाभूते च पटिच्च चित्तसमुट्ठानं रूपं. (१)

नआहारपच्चयो

४२. नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नआहारपच्चया – बाहिरं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं.

नइन्द्रियपच्चयो

४३. नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नइन्द्रियपच्चया – बाहिरं… आहारसमुट्ठानं… उतुसमुट्ठानं एकं महाभूतं पटिच्च तयो महाभूता…पे… असञ्ञसत्तानं महाभूते पटिच्च रूपजीवितिन्द्रियं.

नझानपच्चयो

४४. विपाकं धम्मं पटिच्च विपाको धम्मो उप्पज्जति नझानपच्चया – पञ्चविञ्ञाणसहगतं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा.

नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नझानपच्चया – बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च…पे….

नमग्गपच्चयो

४५. विपाकं धम्मं पटिच्च विपाको धम्मो उप्पज्जति नमग्गपच्चया – अहेतुकं विपाकं एकं खन्धं पटिच्च… तीणि.

नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नमग्गपच्चया – अहेतुकं नेवविपाकनविपाकधम्मधम्मं एकं खन्धं पटिच्च… तीणि.

विपाकञ्च नेवविपाकनविपाकधम्मधम्मञ्च धम्मं पटिच्च विपाको धम्मो उप्पज्जति नमग्गपच्चया – अहेतुकपटिसन्धिक्खणे विपाकं एकं खन्धञ्च वत्थुञ्च पटिच्च… तीणि.

नसम्पयुत्तपच्चयो

४६. विपाकं धम्मं पटिच्च नेवविपाकनविपाकधम्मधम्मो उप्पज्जति नसम्पयुत्तपच्चया… द्वे.

विपाकधम्मधम्मं पटिच्च नेवविपाकनविपाकधम्मधम्मो उप्पज्जति नसम्पयुत्तपच्चया… द्वे.

नेवविपाकनविपाकधम्मधम्मं पटिच्च… एकं.

नविप्पयुत्तपच्चयो

४७. विपाकं धम्मं पटिच्च विपाको धम्मो उप्पज्जति नविप्पयुत्तपच्चया – अरूपे विपाके एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा.

विपाकधम्मधम्मं पटिच्च विपाकधम्मधम्मो उप्पज्जति नविप्पयुत्तपच्चया – अरूपे विपाकधम्मधम्मं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा.

नेवविपाकनविपाकधम्मधम्मं पटिच्च नेवविपाकनविपाकधम्मधम्मो उप्पज्जति नविप्पयुत्तपच्चया – अरूपे नेवविपाकनविपाकधम्मधम्मं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च तयो महाभूता…पे… महाभूते पटिच्च कटत्तारूपं उपादारूपं.

नोनत्थि-नोविगतपच्चया

४८. विपाकं धम्मं पटिच्च नेवविपाकनविपाकधम्मधम्मो उप्पज्जति नोनत्थिपच्चया… नोविगतपच्चया (संखित्तं).