१. विभङ्गवारो

हेतुपच्चयो

३८. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स हेतुपच्चयेन पच्चयो – सुखाय वेदनाय सम्पयुत्ता हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे सुखाय वेदनाय सम्पयुत्ता हेतू सम्पयुत्तकानं खन्धानं हेतुपच्चयेन पच्चयो. (१)

दुक्खाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स हेतुपच्चयेन पच्चयो – दुक्खाय वेदनाय सम्पयुत्ता हेतू सम्पयुत्तकानं खन्धानं हेतुपच्चयेन पच्चयो. (१)

अदुक्खमसुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स हेतुपच्चयेन पच्चयो – अदुक्खमसुखाय वेदनाय सम्पयुत्ता हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे अदुक्खमसुखाय वेदनाय सम्पयुत्ता हेतू सम्पयुत्तकानं खन्धानं हेतुपच्चयेन पच्चयो. (१)

आरम्मणपच्चयो

३९. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स आरम्मणपच्चयेन पच्चयो – सुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा सुखाय वेदनाय सम्पयुत्तेन चित्तेन पच्चवेक्खति. सुखाय वेदनाय सम्पयुत्ता झाना वुट्ठहित्वा, मग्गा वुट्ठहित्वा, फला वुट्ठहित्वा सुखाय वेदनाय सम्पयुत्तेन चित्तेन पच्चवेक्खति. अरिया सुखाय वेदनाय सम्पयुत्तेन चित्तेन सुखाय वेदनाय सम्पयुत्ते पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति. सुखाय वेदनाय सम्पयुत्ते खन्धे सुखाय वेदनाय सम्पयुत्तेन चित्तेन अनिच्चतो दुक्खतो अनत्ततो विपस्सति, अस्सादेति अभिनन्दति; तं आरब्भ सुखाय वेदनाय सम्पयुत्तो रागो उप्पज्जति, दिट्ठि उप्पज्जति; सुखाय वेदनाय सम्पयुत्ते खन्धे आरब्भ सुखाय वेदनाय सम्पयुत्ता खन्धा उप्पज्जन्ति. (१)

सुखाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स आरम्मणपच्चयेन पच्चयो – सुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा विप्पटिसारिस्स दोमनस्सं उप्पज्जति. सुखाय वेदनाय सम्पयुत्ते झाने परिहीने विप्पटिसारिस्स दोमनस्सं उप्पज्जति. सुखाय वेदनाय सम्पयुत्ते खन्धे आरब्भ दुक्खाय वेदनाय सम्पयुत्ता खन्धा उप्पज्जन्ति. (२)

सुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स आरम्मणपच्चयेन पच्चयो – सुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा अदुक्खमसुखाय वेदनाय सम्पयुत्तेन चित्तेन पच्चवेक्खति. सुखाय वेदनाय सम्पयुत्ता झाना वुट्ठहित्वा, मग्गा वुट्ठहित्वा, फला वुट्ठहित्वा अदुक्खमसुखाय वेदनाय सम्पयुत्तेन चित्तेन पच्चवेक्खति. अरिया अदुक्खमसुखाय वेदनाय सम्पयुत्तेन चित्तेन सुखाय वेदनाय सम्पयुत्ते पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति. सुखाय वेदनाय सम्पयुत्ते खन्धे अदुक्खमसुखाय वेदनाय सम्पयुत्तेन चित्तेन अनिच्चतो दुक्खतो अनत्ततो विपस्सति, अस्सादेति अभिनन्दति; तं आरब्भ अदुक्खमसुखाय वेदनाय सम्पयुत्तो रागो उप्पज्जति, दिट्ठि उप्पज्जति, विचिकिच्छा उप्पज्जति, उद्धच्चं उप्पज्जति, चेतोपरियञाणेन सुखाय वेदनाय सम्पयुत्तचित्तसमङ्गिस्स चित्तं जानाति. सुखाय वेदनाय सम्पयुत्ता खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. सुखाय वेदनाय सम्पयुत्ते खन्धे आरब्भ अदुक्खमसुखाय वेदनाय सम्पयुत्ता खन्धा उप्पज्जन्ति. (३)

४०. दुक्खाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स आरम्मणपच्चयेन पच्चयो – दोसं आरब्भ दोसो उप्पज्जति, मोहो उप्पज्जति; दुक्खाय वेदनाय सम्पयुत्तं मोहं आरब्भ मोहो उप्पज्जति, दोसो उप्पज्जति; दुक्खसहगतं कायविञ्ञाणं आरब्भ दोसो उप्पज्जति, मोहो उप्पज्जति; दुक्खाय वेदनाय सम्पयुत्ते खन्धे आरब्भ दुक्खाय वेदनाय सम्पयुत्ता खन्धा उप्पज्जन्ति. (१)

दुक्खाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स आरम्मणपच्चयेन पच्चयो – अरिया सुखाय वेदनाय सम्पयुत्तेन चित्तेन दुक्खाय वेदनाय सम्पयुत्ते पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति. दुक्खाय वेदनाय सम्पयुत्ते खन्धे सुखाय वेदनाय सम्पयुत्तेन चित्तेन अनिच्चतो दुक्खतो अनत्ततो विपस्सति; दुक्खाय वेदनाय सम्पयुत्ते खन्धे आरब्भ सुखाय वेदनाय सम्पयुत्ता खन्धा उप्पज्जन्ति. (२)

दुक्खाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स आरम्मणपच्चयेन पच्चयो – अरिया अदुक्खमसुखाय वेदनाय सम्पयुत्तेन चित्तेन दुक्खाय वेदनाय सम्पयुत्ते पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति. दुक्खाय वेदनाय सम्पयुत्ते खन्धे अदुक्खमसुखाय वेदनाय सम्पयुत्तेन चित्तेन अनिच्चतो दुक्खतो अनत्ततो विपस्सति; चेतोपरियञाणेन दुक्खाय वेदनाय सम्पयुत्तचित्तसमङ्गिस्स चित्तं जानन्ति. दुक्खाय वेदनाय सम्पयुत्ता खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो – दुक्खाय वेदनाय सम्पयुत्ते खन्धे आरब्भ अदुक्खमसुखाय वेदनाय सम्पयुत्ता खन्धा उप्पज्जन्ति. (३)

४१. अदुक्खमसुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स आरम्मणपच्चयेन पच्चयो – अदुक्खमसुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा अदुक्खमसुखाय वेदनाय सम्पयुत्तेन चित्तेन पच्चवेक्खति. अदुक्खमसुखाय वेदनाय सम्पयुत्ता झाना वुट्ठहित्वा, मग्गा वुट्ठहित्वा, फला वुट्ठहित्वा अदुक्खमसुखाय वेदनाय सम्पयुत्तेन चित्तेन पच्चवेक्खति; अरिया अदुक्खमसुखाय वेदनाय सम्पयुत्तेन चित्तेन अदुक्खमसुखाय वेदनाय सम्पयुत्ते पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति. अदुक्खमसुखाय वेदनाय सम्पयुत्ते खन्धे अदुक्खमसुखाय वेदनाय सम्पयुत्तेन चित्तेन अनिच्चतो दुक्खतो अनत्ततो विपस्सति, अस्सादेति अभिनन्दति; तं आरब्भ अदुक्खमसुखाय वेदनाय सम्पयुत्तो रागो उप्पज्जति, दिट्ठि उप्पज्जति, विचिकिच्छा उप्पज्जति, उद्धच्चं उप्पज्जति; चेतोपरियञाणेन अदुक्खमसुखाय वेदनाय सम्पयुत्तचित्तसमङ्गिस्स चित्तं जानन्ति. आकासानञ्चायतनं विञ्ञाणञ्चायतनस्स आरम्मणपच्चयेन पच्चयो. आकिञ्चञ्ञायतनं नेवसञ्ञानासञ्ञायतनस्स आरम्मणपच्चयेन पच्चयो. अदुक्खमसुखाय वेदनाय सम्पयुत्ता खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स आवज्जनाय आरम्मणपच्चयेन पच्चयो. अदुक्खमसुखाय वेदनाय सम्पयुत्ते खन्धे आरब्भ अदुक्खमसुखाय वेदनाय सम्पयुत्ता खन्धा उप्पज्जन्ति. (१)

अदुक्खमसुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स आरम्मणपच्चयेन पच्चयो – अदुक्खमसुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा सुखाय वेदनाय सम्पयुत्तेन चित्तेन पच्चवेक्खति. अदुक्खमसुखाय वेदनाय सम्पयुत्ता झाना वुट्ठहित्वा, मग्गा वुट्ठहित्वा, फला वुट्ठहित्वा सुखाय वेदनाय सम्पयुत्तेन चित्तेन पच्चवेक्खति. अरिया सुखाय वेदनाय सम्पयुत्तेन चित्तेन अदुक्खमसुखाय वेदनाय सम्पयुत्ते पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति. अदुक्खमसुखाय वेदनाय सम्पयुत्ते खन्धे सुखाय वेदनाय सम्पयुत्तेन चित्तेन अनिच्चतो दुक्खतो अनत्ततो विपस्सति, अस्सादेति अभिनन्दति; तं आरब्भ सुखाय वेदनाय सम्पयुत्तो रागो उप्पज्जति, दिट्ठि उप्पज्जति; अदुक्खमसुखाय वेदनाय सम्पयुत्ते खन्धे आरब्भ सुखाय वेदनाय सम्पयुत्ता खन्धा उप्पज्जन्ति. (२)

अदुक्खमसुखाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स आरम्मणपच्चयेन पच्चयो – अदुक्खमसुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा विप्पटिसारिस्स दोमनस्सं उप्पज्जति, अदुक्खमसुखाय वेदनाय सम्पयुत्ते झाने परिहीने विप्पटिसारिस्स दोमनस्सं उप्पज्जति, अदुक्खमसुखाय वेदनाय सम्पयुत्ते खन्धे आरब्भ दुक्खाय वेदनाय सम्पयुत्ता खन्धा उप्पज्जन्ति. (३)

अधिपतिपच्चयो

४२. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति.

आरम्मणाधिपति – सुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा सुखाय वेदनाय सम्पयुत्तेन चित्तेन तं गरुं कत्वा पच्चवेक्खति. सुखाय वेदनाय सम्पयुत्ता झाना वुट्ठहित्वा, मग्गा वुट्ठहित्वा, फला वुट्ठहित्वा सुखाय वेदनाय सम्पयुत्तेन चित्तेन तं गरुं कत्वा पच्चवेक्खति. सुखाय वेदनाय सम्पयुत्ते खन्धे सुखाय वेदनाय सम्पयुत्तेन चित्तेन गरुं कत्वा अस्सादेति अभिनन्दति; तं गरुं कत्वा सुखाय वेदनाय सम्पयुत्तो रागो उप्पज्जति, दिट्ठि उप्पज्जति.

सहजाताधिपति – सुखाय वेदनाय सम्पयुत्ताधिपति सम्पयुत्तकानं खन्धानं अधिपतिपच्चयेन पच्चयो. (१)

सुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स अधिपतिपच्चयेन पच्चयो.

आरम्मणाधिपति – सुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा अदुक्खमसुखाय वेदनाय सम्पयुत्तेन चित्तेन तं गरुं कत्वा पच्चवेक्खति. सुखाय वेदनाय सम्पयुत्ता झाना वुट्ठहित्वा, मग्गा वुट्ठहित्वा, फला वुट्ठहित्वा अदुक्खमसुखाय वेदनाय सम्पयुत्तेन चित्तेन तं गरुं कत्वा पच्चवेक्खति. सुखाय वेदनाय सम्पयुत्ते खन्धे अदुक्खमसुखाय वेदनाय सम्पयुत्तेन चित्तेन गरुं कत्वा अस्सादेति अभिनन्दति; तं गरुं कत्वा अदुक्खमसुखाय वेदनाय सम्पयुत्तो रागो उप्पज्जति, दिट्ठि उप्पज्जति. (२)

४३. दुक्खाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स अधिपतिपच्चयेन पच्चयो.

सहजाताधिपति – दुक्खाय वेदनाय सम्पयुत्ताधिपति सम्पयुत्तकानं खन्धानं अधिपतिपच्चयेन पच्चयो. (१)

४४. अदुक्खमसुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति.

आरम्मणाधिपति – अदुक्खमसुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा अदुक्खमसुखाय वेदनाय सम्पयुत्तेन चित्तेन तं गरुं कत्वा पच्चवेक्खति. अदुक्खमसुखाय वेदनाय सम्पयुत्ता झाना वुट्ठहित्वा, मग्गा वुट्ठहित्वा, फला वुट्ठहित्वा अदुक्खमसुखाय वेदनाय सम्पयुत्तेन चित्तेन तं गरुं कत्वा पच्चवेक्खति. अदुक्खमसुखाय वेदनाय सम्पयुत्ते खन्धे अदुक्खमसुखाय वेदनाय सम्पयुत्तेन चित्तेन गरुं कत्वा अस्सादेति अभिनन्दति; तं गरुं कत्वा अदुक्खमसुखाय वेदनाय सम्पयुत्तो रागो उप्पज्जति, दिट्ठि उप्पज्जति.

सहजाताधिपति – अदुक्खमसुखाय वेदनाय सम्पयुत्ताधिपति सम्पयुत्तकानं खन्धानं अधिपतिपच्चयेन पच्चयो. (१)

अदुक्खमसुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स अधिपतिपच्चयेन पच्चयो.

आरम्मणाधिपति – अदुक्खमसुखाय वेदनाय सम्पयुत्तेन चित्तेन दानं दत्वा, सीलं समादियित्वा, उपोसथकम्मं कत्वा सुखाय वेदनाय सम्पयुत्तेन चित्तेन तं गरुं कत्वा पच्चवेक्खति. अदुक्खमसुखाय वेदनाय सम्पयुत्ता झाना वुट्ठहित्वा, मग्गा वुट्ठहित्वा, फला वुट्ठहित्वा सुखाय वेदनाय सम्पयुत्तेन चित्तेन तं गरुं कत्वा पच्चवेक्खति. अदुक्खमसुखाय वेदनाय सम्पयुत्ते खन्धे सुखाय वेदनाय सम्पयुत्तेन चित्तेन गरुं कत्वा अस्सादेति अभिनन्दति; तं गरुं कत्वा सुखाय वेदनाय सम्पयुत्तो रागो उप्पज्जति, दिट्ठि उप्पज्जति. (२)

अनन्तरपच्चयो

४५. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स अनन्तरपच्चयेन पच्चयो – पुरिमा पुरिमा सुखाय वेदनाय सम्पयुत्ता खन्धा पच्छिमानं पच्छिमानं सुखाय वेदनाय सम्पयुत्तकानं खन्धानं अनन्तरपच्चयेन पच्चयो. सुखाय वेदनाय सम्पयुत्तं अनुलोमं सुखाय वेदनाय सम्पयुत्तस्स गोत्रभुस्स अनन्तरपच्चयेन पच्चयो, अनुलोमं वोदानस्स… गोत्रभु मग्गस्स… वोदानं मग्गस्स… मग्गो फलस्स… फलं फलस्स… अनुलोमं सुखाय वेदनाय सम्पयुत्ताय फलसमापत्तिया अनन्तरपच्चयेन पच्चयो. सुखाय वेदनाय सम्पयुत्ता खन्धा सुखाय वेदनाय सम्पयुत्तस्स वुट्ठानस्स अनन्तरपच्चयेन पच्चयो. (१)

सुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स अनन्तरपच्चयेन पच्चयो – सुखाय वेदनाय सम्पयुत्तं चुतिचित्तं अदुक्खमसुखाय वेदनाय सम्पयुत्तस्स उपपत्तिचित्तस्स अनन्तरपच्चयेन पच्चयो. सुखाय वेदनाय सम्पयुत्तं भवङ्गं आवज्जनाय अनन्तरपच्चयेन पच्चयो. सुखसहगतं कायविञ्ञाणं विपाकमनोधातुया अनन्तरपच्चयेन पच्चयो. सुखाय वेदनाय सम्पयुत्ता विपाकमनोविञ्ञाणधातु किरियमनोविञ्ञाणधातुया अनन्तरपच्चयेन पच्चयो. सुखाय वेदनाय सम्पयुत्तं भवङ्गं अदुक्खमसुखाय वेदनाय सम्पयुत्तस्स भवङ्गस्स अनन्तरपच्चयेन पच्चयो. सुखाय वेदनाय सम्पयुत्तं कुसलाकुसलं अदुक्खमसुखाय वेदनाय सम्पयुत्तस्स वुट्ठानस्स… किरियं वुट्ठानस्स… फलं वुट्ठानस्स अनन्तरपच्चयेन पच्चयो. (२)

४६. दुक्खाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स अनन्तरपच्चयेन पच्चयो – पुरिमा पुरिमा दुक्खाय वेदनाय सम्पयुत्ता खन्धा पच्छिमानं पच्छिमानं दुक्खाय वेदनाय सम्पयुत्तकानं खन्धानं अनन्तरपच्चयेन पच्चयो. (१)

दुक्खाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स अनन्तरपच्चयेन पच्चयो – दुक्खसहगतं कायविञ्ञाणं विपाकमनोधातुया अनन्तरपच्चयेन पच्चयो. दुक्खाय वेदनाय सम्पयुत्ता खन्धा अदुक्खमसुखाय वेदनाय सम्पयुत्तस्स वुट्ठानस्स अनन्तरपच्चयेन पच्चयो. (२)

४७. अदुक्खमसुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स अनन्तरपच्चयेन पच्चयो – पुरिमा पुरिमा अदुक्खमसुखाय वेदनाय सम्पयुत्ता खन्धा पच्छिमानं पच्छिमानं अदुक्खमसुखाय वेदनाय सम्पयुत्तकानं खन्धानं अनन्तरपच्चयेन पच्चयो. अदुक्खमसुखाय वेदनाय सम्पयुत्तं अनुलोमं अदुक्खमसुखाय वेदनाय सम्पयुत्तस्स गोत्रभुस्स अनन्तरपच्चयेन पच्चयो. अनुलोमं वोदानस्स… गोत्रभु मग्गस्स… वोदानं मग्गस्स… मग्गो फलस्स… फलं फलस्स… अनुलोमं फलसमापत्तिया… निरोधा वुट्ठहन्तस्स नेवसञ्ञानासञ्ञायतनं अदुक्खमसुखाय वेदनाय सम्पयुत्ताय फलसमापत्तिया अनन्तरपच्चयेन पच्चयो. अदुक्खमसुखाय वेदनाय सम्पयुत्ता खन्धा अदुक्खमसुखाय वेदनाय सम्पयुत्तस्स वुट्ठानस्स अनन्तरपच्चयेन पच्चयो. (१)

अदुक्खमसुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स अनन्तरपच्चयेन पच्चयो – अदुक्खमसुखाय वेदनाय सम्पयुत्तं चुतिचित्तं सुखाय वेदनाय सम्पयुत्तस्स उपपत्तिचित्तस्स अनन्तरपच्चयेन पच्चयो. आवज्जना सुखाय वेदनाय सम्पयुत्तकानं खन्धानं अनन्तरपच्चयेन पच्चयो. विपाकमनोधातु सुखाय वेदनाय सम्पयुत्ताय विपाकमनोविञ्ञाणधातुया अनन्तरपच्चयेन पच्चयो. अदुक्खमसुखाय वेदनाय सम्पयुत्तं भवङ्गं सुखाय वेदनाय सम्पयुत्तस्स भवङ्गस्स अनन्तरपच्चयेन पच्चयो. अदुक्खमसुखाय वेदनाय सम्पयुत्तं कुसलाकुसलं सुखाय वेदनाय सम्पयुत्तस्स वुट्ठानस्स… किरियं वुट्ठानस्स… फलं वुट्ठानस्स… निरोधा वुट्ठहन्तस्स नेवसञ्ञानासञ्ञायतनं सुखाय वेदनाय सम्पयुत्ताय फलसमापत्तिया अनन्तरपच्चयेन पच्चयो. (२)

अदुक्खमसुखाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स अनन्तरपच्चयेन पच्चयो – आवज्जना दुक्खाय वेदनाय सम्पयुत्तकानं खन्धानं अनन्तरपच्चयेन पच्चयो. (३)

समनन्तरपच्चयो

४८. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स समनन्तरपच्चयेन पच्चयो (अनन्तरपच्चयसदिसं).

सहजातपच्चयो

४९. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स सहजातपच्चयेन पच्चयो – सुखाय वेदनाय सम्पयुत्तो एको खन्धो द्विन्नं खन्धानं सहजातपच्चयेन पच्चयो. द्वे खन्धा एकस्स खन्धस्स सहजातपच्चयेन पच्चयो. पटिसन्धिक्खणे सुखाय वेदनाय सम्पयुत्तो एको खन्धो द्विन्नं खन्धानं सहजातपच्चयेन पच्चयो. द्वे खन्धा एकस्स खन्धस्स सहजातपच्चयेन पच्चयो. (१)

५०. दुक्खाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स सहजातपच्चयेन पच्चयो – दुक्खाय वेदनाय सम्पयुत्तो एको खन्धो द्विन्नं खन्धानं सहजातपच्चयेन पच्चयो. द्वे खन्धा एकस्स खन्धस्स सहजातपच्चयेन पच्चयो. (दुक्खाय वेदनाय सम्पयुत्तपटिसन्धि न लब्भति.) (१)

५१. अदुक्खमसुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स सहजातपच्चयेन पच्चयो – अदुक्खमसुखाय वेदनाय सम्पयुत्तो एको खन्धो द्विन्नं खन्धानं सहजातपच्चयेन पच्चयो. द्वे खन्धा एकस्स खन्धस्स सहजातपच्चयेन पच्चयो. पटिसन्धिक्खणे अदुक्खमसुखाय वेदनाय सम्पयुत्तो एको खन्धो द्विन्नं खन्धानं सहजातपच्चयेन पच्चयो. द्वे खन्धा एकस्स खन्धस्स सहजातपच्चयेन पच्चयो. (१)

अञ्ञमञ्ञ-निस्सयपच्चया

५२. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स अञ्ञमञ्ञपच्चयेन पच्चयो… निस्सयपच्चयेन पच्चयो (अञ्ञमञ्ञम्पि निस्सयम्पि सहजातपच्चयसदिसं).

उपनिस्सयपच्चयो

५३. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे….

पकतूपनिस्सयो – सुखाय वेदनाय सम्पयुत्तं सद्धं उपनिस्साय सुखाय वेदनाय सम्पयुत्तेन चित्तेन दानं देति, सीलं समादियति, उपोसथकम्मं करोति, सुखाय वेदनाय सम्पयुत्तं झानं उप्पादेति, विपस्सनं उप्पादेति, मग्गं उप्पादेति, समापत्तिं उप्पादेति, मानं जप्पेति, दिट्ठिं गण्हाति. सुखाय वेदनाय सम्पयुत्तं सीलं… सुतं… चागं… पञ्ञं… रागं… मोहं… मानं… दिट्ठिं… पत्थनं… सुखसहगतं कायविञ्ञाणं उपनिस्साय सुखाय वेदनाय सम्पयुत्तेन चित्तेन दानं देति…पे… समापत्तिं उप्पादेति (सद्धापञ्चमकेसु ‘‘मानं जप्पेति, दिट्ठिं गण्हाती’’ति कातब्बं, अवसेसेसु न कातब्बं). सुखाय वेदनाय सम्पयुत्तेन चित्तेन अदिन्नं आदियति, मुसा भणति, पिसुणं भणति, सम्फं पलपति, सन्धिं छिन्दति, निल्लोपं हरति, एकागारिकं करोति, परिपन्थे तिट्ठति, परदारं गच्छति, गामघातं करोति, निगमघातं करोति. सुखाय वेदनाय सम्पयुत्ता सद्धा… सीलं… सुतं… चागो… पञ्ञा… रागो… मोहो… मानो… दिट्ठि… पत्थना… सुखसहगतं कायविञ्ञाणं सुखाय वेदनाय सम्पयुत्ताय सद्धाय… सीलस्स… सुतस्स… चागस्स… पञ्ञाय… रागस्स… मोहस्स… मानस्स… दिट्ठिया… पत्थनाय… सुखसहगतस्स कायविञ्ञाणस्स… सुखाय वेदनाय सम्पयुत्तकानं खन्धानं उपनिस्सयपच्चयेन पच्चयो. (१)

सुखाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स उपनिस्सयपच्चयेन पच्चयो.

पकतूपनिस्सयो – सुखाय वेदनाय सम्पयुत्तं सद्धं उपनिस्साय अत्तानं आतापेति परितापेति, परियिट्ठिमूलकं दुक्खं पच्चनुभोति. सुखाय वेदनाय सम्पयुत्तं सीलं… सुतं… चागं… पञ्ञं उपनिस्साय अत्तानं आतापेति परितापेति, परियिट्ठिमूलकं दुक्खं पच्चनुभोति. सुखाय वेदनाय सम्पयुत्तं रागं… मोहं… मानं… दिट्ठिं… पत्थनं… सुखसहगतं कायविञ्ञाणं उपनिस्साय पाणं हनति. दुक्खाय वेदनाय सम्पयुत्तेन चित्तेन अदिन्नं आदियति, मुसा भणति, पिसुणं भणति, फरुसं भणति, सम्फं पलपति, सन्धिं छिन्दति, निल्लोपं हरति, एकागारिकं करोति, परिपन्थे तिट्ठति, परदारं गच्छति, गामघातं करोति, निगमघातं करोति, मातरं जीविता वोरोपेति, पितरं जीविता वोरोपेति, अरहन्तं जीविता वोरोपेति, दुट्ठेन चित्तेन तथागतस्स लोहितं उप्पादेति, सङ्घं भिन्दति. सुखाय वेदनाय सम्पयुत्ता सद्धा… सीलं… सुतं… चागो… पञ्ञा… रागो… मोहो… मानो… दिट्ठि… पत्थना… सुखसहगतं कायविञ्ञाणं दोसस्स… मोहस्स… दुक्खसहगतस्स कायविञ्ञाणस्स… दुक्खाय वेदनाय सम्पयुत्तकानं खन्धानं उपनिस्सयपच्चयेन पच्चयो. (२)

सुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे….

पकतूपनिस्सयो – सुखाय वेदनाय सम्पयुत्तं सद्धं उपनिस्साय अदुक्खमसुखाय वेदनाय सम्पयुत्तेन चित्तेन दानं देति, सीलं समादियति, उपोसथकम्मं करोति, अदुक्खमसुखाय वेदनाय सम्पयुत्तं झानं उप्पादेति, विपस्सनं उप्पादेति, मग्गं उप्पादेति, अभिञ्ञं उप्पादेति, समापत्तिं उप्पादेति, मानं जप्पेति, दिट्ठिं गण्हाति. सुखाय वेदनाय सम्पयुत्तं सीलं… सुतं… चागं… पञ्ञं… रागं… मोहं… मानं… दिट्ठिं… पत्थनं… सुखसहगतं कायविञ्ञाणं उपनिस्साय अदुक्खमसुखाय वेदनाय सम्पयुत्तेन चित्तेन दानं देति…पे… समापत्तिं उप्पादेति. अदुक्खमसुखाय वेदनाय सम्पयुत्तेन चित्तेन अदिन्नं आदियति, मुसा भणति, पिसुणं भणति, सम्फं पलपति [फरुसं भणति, सम्फं पलपति (सी. स्या.)], सन्धिं छिन्दति, निल्लोपं हरति, एकागारिकं करोति, परिपन्थे तिट्ठति, परदारं गच्छति, गामघातं करोति, निगमघातं करोति. सुखाय वेदनाय सम्पयुत्ता सद्धा… सीलं… सुतं… चागो… पञ्ञा… रागो… मोहो… मानो… दिट्ठि… पत्थना… सुखसहगतं कायविञ्ञाणं अदुक्खमसुखाय वेदनाय सम्पयुत्ताय सद्धाय… सीलस्स… सुतस्स… चागस्स… पञ्ञाय… रागस्स… मोहस्स… मानस्स… दिट्ठिया… पत्थनाय… अदुक्खमसुखाय वेदनाय सम्पयुत्तकानं खन्धानं उपनिस्सयपच्चयेन पच्चयो. (३)

५४. दुक्खाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे….

पकतूपनिस्सयो – दोसं उपनिस्साय पाणं हनति, दुक्खाय वेदनाय सम्पयुत्तेन चित्तेन अदिन्नं आदियति…पे… सङ्घं भिन्दति. मोहं, दुक्खसहगतं कायविञ्ञाणं उपनिस्साय पाणं हनति, दुक्खाय वेदनाय सम्पयुत्तेन चित्तेन अदिन्नं आदियति…पे… सङ्घं भिन्दति. दोसो… मोहो… दुक्खसहगतं कायविञ्ञाणं दोसस्स… मोहस्स… दुक्खसहगतस्स कायविञ्ञाणस्स… दुक्खाय वेदनाय सम्पयुत्तकानं खन्धानं उपनिस्सयपच्चयेन पच्चयो. (१)

दुक्खाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स उपनिस्सयपच्चयेन पच्चयो.

पकतूपनिस्सयो – दोसं उपनिस्साय सुखाय वेदनाय सम्पयुत्तेन चित्तेन दानं देति…पे… समापत्तिं उप्पादेति. सुखाय वेदनाय सम्पयुत्तेन चित्तेन अदिन्नं आदियति…पे… निगमघातं करोति. मोहं, दुक्खसहगतं कायविञ्ञाणं उपनिस्साय सुखाय वेदनाय सम्पयुत्तेन चित्तेन दानं देति…पे… निगमघातं करोति. दोसो… मोहो… दुक्खसहगतं कायविञ्ञाणं सुखाय वेदनाय सम्पयुत्ताय सद्धाय…पे… सुखसहगतस्स कायविञ्ञाणस्स सुखाय वेदनाय सम्पयुत्तकानं खन्धानं उपनिस्सयपच्चयेन पच्चयो. (२)

दुक्खाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे….

पकतूपनिस्सयो – दोसं उपनिस्साय अदुक्खमसुखाय वेदनाय सम्पयुत्तेन चित्तेन दानं देति…पे… निगमघातं करोति. मोहं, दुक्खसहगतं कायविञ्ञाणं उपनिस्साय अदुक्खमसुखाय वेदनाय सम्पयुत्तेन चित्तेन दानं देति…पे… निगमघातं करोति. दोसो… मोहो… दुक्खसहगतं कायविञ्ञाणं अदुक्खमसुखाय वेदनाय सम्पयुत्ताय सद्धाय…पे… पत्थनाय… अदुक्खमसुखाय वेदनाय सम्पयुत्तकानं खन्धानं उपनिस्सयपच्चयेन पच्चयो. (३)

५५. अदुक्खमसुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे….

पकतूपनिस्सयो – अदुक्खमसुखाय वेदनाय सम्पयुत्तं सद्धं उपनिस्साय अदुक्खमसुखाय वेदनाय सम्पयुत्तेन चित्तेन दानं देति…पे… दिट्ठिं गण्हाति. अदुक्खमसुखाय वेदनाय सम्पयुत्तं सीलं… सुतं… चागं… पञ्ञं… रागं… मोहं… मानं… दिट्ठिं… पत्थनं उपनिस्साय अदुक्खमसुखाय वेदनाय सम्पयुत्तेन चित्तेन दानं देति…पे… समापत्तिं उप्पादेति. अदुक्खमसुखाय वेदनाय सम्पयुत्तेन चित्तेन अदिन्नं आदियति…पे… निगमघातं करोति. अदुक्खमसुखाय वेदनाय सम्पयुत्ता सद्धा… सीलं… सुतं… चागो… पञ्ञा… रागो… मोहो… मानो… दिट्ठि… पत्थना… अदुक्खमसुखाय वेदनाय सम्पयुत्ताय सद्धाय…पे… पत्थनाय अदुक्खमसुखाय वेदनाय सम्पयुत्तकानं खन्धानं उपनिस्सयपच्चयेन पच्चयो. (१)

अदुक्खमसुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे….

पकतूपनिस्सयो – अदुक्खमसुखाय वेदनाय सम्पयुत्तं सद्धं उपनिस्साय सुखाय वेदनाय सम्पयुत्तेन चित्तेन दानं देति…पे… दिट्ठिं गण्हाति. अदुक्खमसुखाय वेदनाय सम्पयुत्तं सीलं…पे… पत्थनं उपनिस्साय सुखाय वेदनाय सम्पयुत्तेन चित्तेन दानं देति…पे… समापत्तिं उप्पादेति. सुखाय वेदनाय सम्पयुत्तेन चित्तेन अदिन्नं आदियति…पे… निगमघातं करोति. अदुक्खमसुखाय वेदनाय सम्पयुत्ता सद्धा…पे… पत्थना सुखाय वेदनाय सम्पयुत्ताय सद्धाय…पे… पत्थनाय… सुखसहगतस्स कायविञ्ञाणस्स सुखाय वेदनाय सम्पयुत्तकानं खन्धानं उपनिस्सयपच्चयेन पच्चयो. (२)

अदुक्खमसुखाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे….

पकतूपनिस्सयो – अदुक्खमसुखाय वेदनाय सम्पयुत्तं सद्धं उपनिस्साय अत्तानं आतापेति परितापेति, परियिट्ठिमूलकं दुक्खं पच्चनुभोति. अदुक्खमसुखाय वेदनाय सम्पयुत्तं सीलं…पे… पत्थनं उपनिस्साय पाणं हनति. दुक्खाय वेदनाय सम्पयुत्तेन चित्तेन अदिन्नं आदियति…पे… सङ्घं भिन्दति. अदुक्खमसुखाय वेदनाय सम्पयुत्ता सद्धा…पे… पत्थना… दोसस्स… मोहस्स… दुक्खसहगतस्स कायविञ्ञाणस्स… दुक्खाय वेदनाय सम्पयुत्तकानं खन्धानं उपनिस्सयपच्चयेन पच्चयो. (३)

आसेवनपच्चयो

५६. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स आसेवनपच्चयेन पच्चयो – पुरिमा पुरिमा सुखाय वेदनाय सम्पयुत्ता खन्धा पच्छिमानं पच्छिमानं सुखाय वेदनाय सम्पयुत्तकानं खन्धानं आसेवनपच्चयेन पच्चयो. सुखाय वेदनाय सम्पयुत्तं अनुलोमं गोत्रभुस्स… अनुलोमं वोदानस्स… गोत्रभु मग्गस्स… वोदानं मग्गस्स आसेवनपच्चयेन पच्चयो. (१)

दुक्खाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स आसेवनपच्चयेन पच्चयो – पुरिमा पुरिमा दुक्खाय वेदनाय सम्पयुत्ता खन्धा पच्छिमानं पच्छिमानं दुक्खाय वेदनाय सम्पयुत्तकानं खन्धानं आसेवनपच्चयेन पच्चयो. (१)

अदुक्खमसुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स आसेवनपच्चयेन पच्चयो – पुरिमा पुरिमा अदुक्खमसुखाय वेदनाय सम्पयुत्ता खन्धा पच्छिमानं पच्छिमानं अदुक्खमसुखाय वेदनाय सम्पयुत्तकानं खन्धानं आसेवनपच्चयेन पच्चयो. अदुक्खमसुखाय वेदनाय सम्पयुत्तं अनुलोमं गोत्रभुस्स… अनुलोमं वोदानस्स… गोत्रभु मग्गस्स… वोदानं मग्गस्स आसेवनपच्चयेन पच्चयो. (१)

कम्मपच्चयो

५७. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स कम्मपच्चयेन पच्चयो – सहजाता, नानाक्खणिका [नानाखणिका (क.)]. सहजाता – सुखाय वेदनाय सम्पयुत्ता चेतना सम्पयुत्तकानं खन्धानं कम्मपच्चयेन पच्चयो. पटिसन्धिक्खणे…पे…. नानाक्खणिका – सुखाय वेदनाय सम्पयुत्ता चेतना विपाकानं सुखाय वेदनाय सम्पयुत्तकानं खन्धानं कम्मपच्चयेन पच्चयो. (१)

सुखाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स कम्मपच्चयेन पच्चयो. नानाक्खणिका – सुखाय वेदनाय सम्पयुत्ता चेतना विपाकानं दुक्खाय वेदनाय सम्पयुत्तकानं खन्धानं कम्मपच्चयेन पच्चयो. (२)

सुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स कम्मपच्चयेन पच्चयो. नानाक्खणिका – सुखाय वेदनाय सम्पयुत्ता चेतना विपाकानं अदुक्खमसुखाय वेदनाय सम्पयुत्तकानं खन्धानं कम्मपच्चयेन पच्चयो. (३)

५८. दुक्खाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – दुक्खाय वेदनाय सम्पयुत्ता चेतना सम्पयुत्तकानं खन्धानं कम्मपच्चयेन पच्चयो. नानाक्खणिका – दुक्खाय वेदनाय सम्पयुत्ता चेतना विपाकानं दुक्खाय वेदनाय सम्पयुत्तकानं खन्धानं कम्मपच्चयेन पच्चयो. (१)

दुक्खाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स कम्मपच्चयेन पच्चयो. नानाक्खणिका – दुक्खाय वेदनाय सम्पयुत्ता चेतना विपाकानं अदुक्खमसुखाय वेदनाय सम्पयुत्तकानं खन्धानं कम्मपच्चयेन पच्चयो. (२)

५९. अदुक्खमसुखाय वेदनाय सम्पयुत्तो धम्मो अदुक्खमसुखाय वेदनाय सम्पयुत्तस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – अदुक्खमसुखाय वेदनाय सम्पयुत्ता चेतना सम्पयुत्तकानं खन्धानं कम्मपच्चयेन पच्चयो. पटिसन्धिक्खणे…पे…. नानाक्खणिका – अदुक्खमसुखाय वेदनाय सम्पयुत्ता चेतना विपाकानं अदुक्खमसुखाय वेदनाय सम्पयुत्तकानं खन्धानं कम्मपच्चयेन पच्चयो. (१)

अदुक्खमसुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स कम्मपच्चयेन पच्चयो. नानाक्खणिका – अदुक्खमसुखाय वेदनाय सम्पयुत्ता चेतना विपाकानं सुखाय वेदनाय सम्पयुत्तकानं खन्धानं कम्मपच्चयेन पच्चयो. (२)

अदुक्खमसुखाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स कम्मपच्चयेन पच्चयो. नानाक्खणिका – अदुक्खमसुखाय वेदनाय सम्पयुत्ता चेतना विपाकानं दुक्खाय वेदनाय सम्पयुत्तकानं खन्धानं कम्मपच्चयेन पच्चयो. (३)

विपाकपच्चयो

६०. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स विपाकपच्चयेन पच्चयो – विपाको सुखाय वेदनाय सम्पयुत्तो एको खन्धो द्विन्नं खन्धानं विपाकपच्चयेन पच्चयो. द्वे खन्धा एकस्स खन्धस्स विपाकपच्चयेन पच्चयो. पटिसन्धिक्खणे सुखाय वेदनाय सम्पयुत्तो एको खन्धो द्विन्नं खन्धानं विपाकपच्चयेन पच्चयो. द्वे खन्धा एकस्स खन्धस्स…पे…. (१)

दुक्खाय वेदनाय सम्पयुत्तो धम्मो दुक्खाय वेदनाय सम्पयुत्तस्स धम्मस्स विपाकपच्चयेन पच्चयो – विपाको दुक्खाय वेदनाय सम्पयुत्तो एको खन्धो द्विन्नं खन्धानं विपाकपच्चयेन पच्चयो …पे…. (१)

अदुक्खमसुखाय वेदनाय…पे… विपाको अदुक्खमसुखाय वेदनाय सम्पयुत्तो एको खन्धो द्विन्नं खन्धानं…पे… पटिसन्धिक्खणे…पे…. (१)

आहारपच्चयादि

६१. सुखाय वेदनाय सम्पयुत्तो धम्मो सुखाय वेदनाय सम्पयुत्तस्स धम्मस्स आहारपच्चयेन पच्चयो…पे… इन्द्रियपच्चयेन पच्चयो…पे… झानपच्चयेन पच्चयो…पे… मग्गपच्चयेन पच्चयो…पे… सम्पयुत्तपच्चयेन पच्चयो…पे… अत्थिपच्चयेन पच्चयो…पे… नत्थिपच्चयेन पच्चयो…पे… विगतपच्चयेन पच्चयो…पे… अविगतपच्चयेन पच्चयो…पे….