२. पच्चयपच्चनीयं

नहेतुपच्चयो

४. संकिलिट्ठसंकिलेसिकं धम्मं पटिच्च संकिलिट्ठसंकिलेसिको धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

असंकिलिट्ठसंकिलेसिकं धम्मं पटिच्च असंकिलिट्ठसंकिलेसिको धम्मो उप्पज्जति नहेतुपच्चया – अहेतुकं असंकिलिट्ठसंकिलेसिकं एकं खन्धं पटिच्च तयो खन्धा चित्तसमुट्ठानञ्च रूपं…पे… अहेतुकपटिसन्धिक्खणे…पे… असञ्ञसत्तानं एकं महाभूतं. (संखित्तं.) (१)

(यथा कुसलत्तिके विभत्तं, एवं विभजितब्बं.)

सुद्धं

५. नहेतुया द्वे, नआरम्मणे पञ्च, नअधिपतिया छ, नअनन्तरे पञ्च…पे… नउपनिस्सये पञ्च, नपुरेजाते सत्त, नपच्छाजाते नव, नआसेवने नव, नकम्मे तीणि, नविपाके नव, नआहारे एकं…पे… नमग्गे एकं, नसम्पयुत्ते पञ्च, नविप्पयुत्ते तीणि, नोनत्थिया पञ्च, नोविगते पञ्च. (संखित्तं.)