१. पच्चयानुलोमं

१. विभङ्गवारो

हेतुपच्चयो

१. संकिलिट्ठसंकिलेसिकं धम्मं पटिच्च संकिलिट्ठसंकिलेसिको धम्मो उप्पज्जति हेतुपच्चया – संकिलिट्ठसंकिलेसिकं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

संकिलिट्ठसंकिलेसिकं धम्मं पटिच्च असंकिलिट्ठसंकिलेसिको धम्मो उप्पज्जति हेतुपच्चया – संकिलिट्ठसंकिलेसिके खन्धे पटिच्च चित्तसमुट्ठानं रूपं. (२)

संकिलिट्ठसंकिलेसिकं धम्मं पटिच्च संकिलिट्ठसंकिलेसिको च असंकिलिट्ठसंकिलेसिको च धम्मा उप्पज्जन्ति हेतुपच्चया – संकिलिट्ठसंकिलेसिकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं. (३)

असंकिलिट्ठसंकिलेसिकं धम्मं पटिच्च असंकिलिट्ठसंकिलेसिको धम्मो उप्पज्जति हेतुपच्चया – असंकिलिट्ठसंकिलेसिकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं; पटिसन्धिक्खणे असंकिलिट्ठसंकिलेसिकं एकं खन्धं पटिच्च तयो खन्धा कटत्ता च रूपं…पे… द्वे खन्धे पटिच्च द्वे खन्धा कटत्ता च रूपं; खन्धे पटिच्च वत्थु, वत्थुं पटिच्च खन्धा; एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

२. असंकिलिट्ठअसंकिलेसिकं धम्मं पटिच्च असंकिलिट्ठअसंकिलेसिको धम्मो उप्पज्जति हेतुपच्चया – असंकिलिट्ठअसंकिलेसिकं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

असंकिलिट्ठअसंकिलेसिकं धम्मं पटिच्च असंकिलिट्ठसंकिलेसिको धम्मो उप्पज्जति हेतुपच्चया – असंकिलिट्ठअसंकिलेसिके खन्धे पटिच्च चित्तसमुट्ठानं रूपं. (२)

असंकिलिट्ठअसंकिलेसिकं धम्मं पटिच्च असंकिलिट्ठसंकिलेसिको च असंकिलिट्ठअसंकिलेसिको च धम्मा उप्पज्जन्ति हेतुपच्चया – असंकिलिट्ठअसंकिलेसिकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं. (३)

असंकिलिट्ठसंकिलेसिकञ्च असंकिलिट्ठअसंकिलेसिकञ्च धम्मं पटिच्च असंकिलिट्ठसंकिलेसिको धम्मो उप्पज्जति हेतुपच्चया – असंकिलिट्ठअसंकिलेसिके खन्धे च महाभूते च पटिच्च चित्तसमुट्ठानं रूपं. (१)

संकिलिट्ठसंकिलेसिकञ्च असंकिलिट्ठसंकिलेसिकञ्च धम्मं पटिच्च असंकिलिट्ठसंकिलेसिको धम्मो उप्पज्जति हेतुपच्चया – संकिलिट्ठसंकिलेसिके खन्धे च महाभूते च पटिच्च चित्तसमुट्ठानं रूपं (संखित्तं). (१)