१. वादयुत्ति

२८२. सब्बमत्थीति? आमन्ता. सब्बत्थ सब्बमत्थीति? न हेवं वत्तब्बे. सब्बमत्थीति? आमन्ता. सब्बदा सब्बमत्थीति? न हेवं वत्तब्बे. सब्बमत्थीति? आमन्ता. सब्बेन सब्बं सब्बमत्थीति? न हेवं वत्तब्बे. सब्बमत्थीति? आमन्ता. सब्बेसु सब्बमत्थीति? न हेवं वत्तब्बे. सब्बमत्थीति? आमन्ता. अयोगन्ति कत्वा सब्बमत्थीति? न हेवं वत्तब्बे. सब्बमत्थीति? आमन्ता. यम्पि नत्थि, तम्पत्थीति? न हेवं वत्तब्बे. सब्बमत्थीति? आमन्ता. सब्बमत्थीति या दिट्ठि सा दिट्ठि मिच्छादिट्ठीति, या दिट्ठि सा दिट्ठि सम्मादिट्ठीति, हेवमत्थीति? न हेवं वत्तब्बे. (संखित्तं). वादयुत्ति.