(२०८) १. परिनिब्बानकथा

८९२. अत्थि किञ्चि संयोजनं अप्पहाय परिनिब्बानन्ति? आमन्ता. अत्थि किञ्चि सक्कायदिट्ठिं अप्पहाय…पे… अनोत्तप्पं अप्पहाय परिनिब्बानन्ति? न हेवं वत्तब्बे…पे….

अत्थि किञ्चि संयोजनं अप्पहाय परिनिब्बानन्ति? आमन्ता. अरहा सरागो…पे… सकिलेसोति? न हेवं वत्तब्बे…पे… ननु अरहा निरागो…पे… निक्किलेसोति? आमन्ता. हञ्चि अरहा निरागो…पे… निक्किलेसो, नो च वत रे वत्तब्बे – ‘‘अत्थि किञ्चि संयोजनं अप्पहाय परिनिब्बान’’न्ति.

८९३. न वत्तब्बं – ‘‘अत्थि किञ्चि संयोजनं अप्पहाय परिनिब्बान’’न्ति? आमन्ता. अरहा सब्बं बुद्धविसयं जानातीति? न हेवं वत्तब्बे. तेन हि अत्थि किञ्चि संयोजनं अप्पहाय परिनिब्बानन्ति.

परिनिब्बानकथा निट्ठिता.