२१. एकवीसतिमवग्गो

(२०२) ३. संयोजनकथा

८८१. अत्थि किञ्चि संयोजनं अप्पहाय अरहत्तप्पत्तीति? आमन्ता. अत्थि किञ्चि सक्कायदिट्ठिं अप्पहाय…पे… विचिकिच्छं अप्पहाय…पे… सीलब्बतपरामासं अप्पहाय… रागं अप्पहाय… दोसं अप्पहाय… मोहं अप्पहाय… अनोत्तप्पं अप्पहाय अरहत्तप्पत्तीति? न हेवं वत्तब्बे…पे….

अत्थि किञ्चि संयोजनं अप्पहाय अरहत्तप्पत्तीति? आमन्ता. अरहा सरागो सदोसो समोहो समानो समक्खो सपळासो सउपायासो सकिलेसोति? न हेवं वत्तब्बे…पे… ननु अरहा निरागो निद्दोसो निम्मोहो निम्मानो निम्मक्खो निप्पळासो निरुपायासो निक्किलेसोति? आमन्ता. हञ्चि अरहा निरागो…पे… निक्किलेसो, नो च वत रे वत्तब्बे – ‘‘अत्थि किञ्चि संयोजनं अप्पहाय अरहत्तप्पत्ती’’ति.

८८२. न वत्तब्बं – ‘‘अत्थि किञ्चि संयोजनं अप्पहाय अरहत्तप्पत्ती’’ति? आमन्ता. अरहा सब्बं बुद्धविसयं जानातीति? न हेवं वत्तब्बे. तेन हि अत्थि किञ्चि संयोजनं अप्पहाय अरहत्तप्पत्तीति.

संयोजनकथा निट्ठिता.