१७. सत्तरसमवग्गो

(१७२) ७. न वत्तब्बं सङ्घो दक्खिणं विसोधेतीतिकथा

७९३. न वत्तब्बं – ‘‘सङ्घो दक्खिणं विसोधेती’’ति? आमन्ता. ननु सङ्घो आहुनेय्यो पाहुनेय्यो दक्खिणेय्यो अञ्जलिकरणीयो अनुत्तरं पुञ्ञक्खेत्तं लोकस्साति? आमन्ता. हञ्चि सङ्घो आहुनेय्यो…पे… अनुत्तरं पुञ्ञक्खेत्तं लोकस्स, तेन वत रे वत्तब्बे – ‘‘सङ्घो दक्खिणं विसोधेती’’ति.

न वत्तब्बं – ‘‘सङ्घो दक्खिणं विसोधेती’’ति? आमन्ता. ननु चत्तारो पुरिसयुगा अट्ठ पुरिसपुग्गला दक्खिणेय्या वुत्ता भगवताति? आमन्ता. हञ्चि चत्तारो पुरिसयुगा अट्ठ पुरिसपुग्गला दक्खिणेय्या वुत्ता भगवता, तेन वत रे वत्तब्बे – ‘‘सङ्घो दक्खिणं विसोधेती’’ति.

न वत्तब्बं – ‘‘सङ्घो दक्खिणं विसोधेती’’ति? आमन्ता. ननु अत्थि केचि सङ्घस्स दानं दत्वा दक्खिणं आराधेन्तीति? आमन्ता. हञ्चि अत्थि केचि सङ्घस्स दानं दत्वा दक्खिणं आराधेन्ति, तेन वत रे वत्तब्बे – ‘‘सङ्घो दक्खिणं विसोधेती’’ति.

ननु अत्थि केचि सङ्घस्स चीवरं दत्वा…पे… पिण्डपातं दत्वा…पे… सेनासनं दत्वा… गिलानपच्चयभेसज्जपरिक्खारं दत्वा… खादनीयं दत्वा… भोजनीयं दत्वा…पे… पानीयं दत्वा दक्खिणं आराधेन्तीति? आमन्ता. हञ्चि अत्थि केचि सङ्घस्स पानीयं दत्वा दक्खिणं आराधेन्ति, तेन वत रे वत्तब्बे – ‘‘सङ्घो दक्खिणं विसोधेती’’ति.

७९४. सङ्घो दक्खिणं विसोधेतीति? आमन्ता. मग्गो विसोधेति, फलं विसोधेतीति? न हेवं वत्तब्बे…पे….

न वत्तब्बं सङ्घो दक्खिणं विसोधेतीतिकथा निट्ठिता.