(१७५) १०. न वत्तब्बं बुद्धस्सदिन्नं महप्फलन्तिकथा

७९९. न वत्तब्बं – ‘‘बुद्धस्स दिन्नं महप्फल’’न्ति? आमन्ता. ननु भगवा द्विपदानं अग्गो, द्विपदानं सेट्ठो, द्विपदानं पमोक्खो, द्विपदानं उत्तमो, द्विपदानं पवरो असमो असमसमो अप्पटिसमो अप्पटिभागो अप्पटिपुग्गलोति? आमन्ता. हञ्चि भगवा द्विपदानं अग्गो, द्विपदानं सेट्ठो, द्विपदानं पमोक्खो, द्विपदानं उत्तमो, द्विपदानं पवरो असमो असमसमो अप्पटिसमो अप्पटिभागो अप्पटिपुग्गलो, तेन वत रे वत्तब्बे – ‘‘बुद्धस्स दिन्नं महप्फल’’न्ति.

न वत्तब्बं – ‘‘बुद्धस्स दिन्नं महप्फल’’न्ति? आमन्ता. अत्थि कोचि बुद्धेन समसमो – सीलेन समाधिना पञ्ञायाति? नत्थि. हञ्चि नत्थि कोचि बुद्धेन समसमो – सीलेन समाधिना पञ्ञाय, तेन वत रे वत्तब्बे – ‘‘बुद्धस्स दिन्नं महप्फल’’न्ति.

न वत्तब्बं – ‘‘बुद्धस्स दिन्नं महप्फल’’न्ति? आमन्ता. ननु वुत्तं भगवता –

‘‘नयिमस्मिं वा लोके परस्मिं वा पन,

बुद्धेन सेट्ठो च समो च विज्जति;

यमाहुनेय्यानं अग्गतं गतो,

पुञ्ञत्थिकानं विपुलप्फलेसिन’’न्ति [वि. व. १०४७].

अत्थेव सुत्तन्तोति? आमन्ता. तेन हि बुद्धस्स दिन्नं महप्फलन्ति.

न वत्तब्बं बुद्धस्स दिन्नं महप्फलन्तिकथा निट्ठिता.