(१६०) ५. रूपं हेतूतिकथा

७५४. रूपं हेतूति? आमन्ता. अलोभो हेतूति? न हेवं वत्तब्बे…पे… अदोसो हेतु…पे… अमोहो हेतु… लोभो हेतु… दोसो हेतु… मोहो हेतूति? न हेवं वत्तब्बे…पे….

रूपं हेतूति? आमन्ता. सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे… ननु अनारम्मणं, नत्थि तस्स आवट्टना…पे… पणिधीति? आमन्ता. हञ्चि अनारम्मणं, नत्थि तस्स आवट्टना…पे… पणिधि, नो च वत रे वत्तब्बे – ‘‘रूपं हेतू’’ति.

७५५. अलोभो हेतु सारम्मणो, अत्थि तस्स आवट्टना…पे… पणिधीति? आमन्ता. रूपं हेतु सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे… अदोसो हेतु… अमोहो हेतु… लोभो हेतु… दोसो हेतु… मोहो हेतु सारम्मणो, अत्थि तस्स आवट्टना…पे… पणिधीति? आमन्ता. रूपं हेतु सारम्मणं, अत्थि तस्स आवट्टना…पे… पणिधीति? न हेवं वत्तब्बे…पे….

रूपं हेतु अनारम्मणं, नत्थि तस्स आवट्टना…पे… पणिधीति? आमन्ता. अलोभो हेतु अनारम्मणो, नत्थि तस्स आवट्टना…पे… पणिधीति? न हेवं वत्तब्बे…पे… रूपं हेतु अनारम्मणं, नत्थि तस्स आवट्टना…पे… पणिधीति? आमन्ता. अदोसो हेतु… अमोहो हेतु… लोभो हेतु… दोसो हेतु… मोहो हेतु अनारम्मणो, नत्थि तस्स आवट्टना…पे… पणिधीति? न हेवं वत्तब्बे…पे….

७५६. न वत्तब्बं – ‘‘रूपं हेतू’’ति? आमन्ता. ननु महाभूता उपादायरूपानं [उपादारूपानं (सी. पी. क.)] उपादायहेतूति? आमन्ता. हञ्चि महाभूता उपादायरूपानं उपादायहेतु, तेन वत रे वत्तब्बे – ‘‘रूपं हेतू’’ति.

रूपं हेतूतिकथा निट्ठिता.