(१४५) १. पच्चयताकथा

७११. पच्चयता ववत्थिताति? आमन्ता. ननु वीमंसा हेतु, सो च अधिपतीति? आमन्ता. हञ्चि वीमंसा हेतु, सो च अधिपति, तेन वत रे वत्तब्बे – ‘‘हेतुपच्चयेन पच्चयो, अधिपतिपच्चयेन पच्चयो’’ति.

ननु छन्दाधिपति सहजातानं धम्मानं अधिपतीति? आमन्ता. हञ्चि छन्दाधिपति सहजातानं धम्मानं अधिपति, तेन वत रे वत्तब्बे – ‘‘अधिपतिपच्चयेन पच्चयो, सहजातपच्चयेन पच्चयो’’ति.

७१२. ननु वीरियाधिपति सहजातानं धम्मानं अधिपतीति? आमन्ता. हञ्चि वीरियाधिपति सहजातानं धम्मानं अधिपति, तेन वत रे वत्तब्बे – ‘‘अधिपतिपच्चयेन पच्चयो, सहजातपच्चयेन पच्चयो’’ति.

ननु वीरियाधिपति सहजातानं धम्मानं अधिपति, तञ्च इन्द्रियन्ति? आमन्ता. हञ्चि वीरियाधिपति सहजातानं धम्मानं अधिपति, तञ्च इन्द्रियं, तेन वत रे वत्तब्बे – ‘‘अधिपतिपच्चयेन पच्चयो, इन्द्रियपच्चयेन पच्चयो’’ति.

ननु वीरियाधिपति सहजातानं धम्मानं अधिपति, तञ्च मग्गङ्गन्ति? आमन्ता. हञ्चि वीरियाधिपति सहजातानं धम्मानं अधिपति, तञ्च मग्गङ्गं, तेन वत रे वत्तब्बे – ‘‘अधिपतिपच्चयेन पच्चयो, मग्गपच्चयेन पच्चयो’’ति.

७१३. ननु चित्ताधिपति सहजातानं धम्मानं अधिपतीति? आमन्ता. हञ्चि चित्ताधिपति सहजातानं धम्मानं अधिपति, तेन वत रे वत्तब्बे – ‘‘अधिपतिपच्चयेन पच्चयो, सहजातपच्चयेन पच्चयो’’ति.

ननु चित्ताधिपति सहजातानं धम्मानं अधिपति, सो च आहारोति? आमन्ता. हञ्चि चित्ताधिपति सहजातानं धम्मानं अधिपति, सो च आहारो, तेन वत रे वत्तब्बे – ‘‘अधिपतिपच्चयेन पच्चयो, आहारपच्चयेन पच्चयो’’ति.

ननु चित्ताधिपति सहजातानं धम्मानं अधिपति, तञ्च इन्द्रियन्ति? आमन्ता. हञ्चि चित्ताधिपति सहजातानं धम्मानं अधिपति, तञ्च इन्द्रियं, तेन वत रे वत्तब्बे – ‘‘अधिपतिपच्चयेन पच्चयो, इन्द्रियपच्चयेन पच्चयो’’ति.

७१४. ननु वीमंसाधिपति सहजातानं धम्मानं अधिपतीति? आमन्ता. हञ्चि वीमंसाधिपति सहजातानं धम्मानं अधिपति, तेन वत रे वत्तब्बे – ‘‘अधिपतिपच्चयेन पच्चयो, सहजातपच्चयेन पच्चयो’’ति.

ननु वीमंसाधिपति सहजातानं धम्मानं अधिपति, तञ्च इन्द्रियन्ति? आमन्ता. हञ्चि वीमंसाधिपति सहजातानं धम्मानं अधिपति, तञ्च इन्द्रियं, तेन वत रे वत्तब्बे – ‘‘अधिपतिपच्चयेन पच्चयो, इन्द्रियपच्चयेन पच्चयो’’ति.

ननु वीमंसाधिपति सहजातानं धम्मानं अधिपति, तञ्च मग्गङ्गन्ति? आमन्ता. हञ्चि वीमंसाधिपति सहजातानं धम्मानं अधिपति, तञ्च मग्गङ्गं, तेन वत रे वत्तब्बे – ‘‘अधिपतिपच्चयेन पच्चयो, मग्गपच्चयेन पच्चयो’’ति.

७१५. ननु अरियं धम्मं गरुं कत्वा उप्पज्जति पच्चवेक्खणा, तञ्चारम्मणन्ति? आमन्ता. हञ्चि अरियं धम्मं गरुं कत्वा उप्पज्जति पच्चवेक्खणा, तञ्चारम्मणं, तेन वत रे वत्तब्बे – ‘‘अधिपतिपच्चयेन पच्चयो, आरम्मणपच्चयेन पच्चयो’’ति.

७१६. ननु पुरिमा पुरिमा कुसला धम्मा पच्छिमानं पच्छिमानं कुसलानं धम्मानं अनन्तरपच्चयेन पच्चयो, सा च आसेवनाति? आमन्ता. हञ्चि पुरिमा पुरिमा कुसला धम्मा पच्छिमानं पच्छिमानं कुसलानं धम्मानं अनन्तरपच्चयेन पच्चयो, सा च आसेवना, तेन वत रे वत्तब्बे – ‘‘अनन्तरपच्चयेन पच्चयो, आसेवनपच्चयेन पच्चयो’’ति.

ननु पुरिमा पुरिमा अकुसला धम्मा पच्छिमानं पच्छिमानं अकुसलानं धम्मानं अनन्तरपच्चयेन पच्चयो, सा च आसेवनाति? आमन्ता. हञ्चि पुरिमा पुरिमा अकुसला धम्मा पच्छिमानं पच्छिमानं अकुसलानं धम्मानं अनन्तरपच्चयेन पच्चयो, सा च आसेवना, तेन वत रे वत्तब्बे – ‘‘अनन्तरपच्चयेन पच्चयो, आसेवनपच्चयेन पच्चयो’’ति.

ननु पुरिमा पुरिमा किरियाब्याकता धम्मा पच्छिमानं पच्छिमानं किरियाब्याकतानं धम्मानं अनन्तरपच्चयेन पच्चयो, सा च आसेवनाति? आमन्ता. हञ्चि पुरिमा पुरिमा किरियाब्याकता धम्मा पच्छिमानं पच्छिमानं किरियाब्याकतानं धम्मानं अनन्तरपच्चयेन पच्चयो, सा च आसेवना, तेन वत रे वत्तब्बे – ‘‘अनन्तरपच्चयेन पच्चयो, आसेवनपच्चयेन पच्चयो’’ति.

७१७. न वत्तब्बं – ‘‘पच्चयता ववत्थिता’’ति? आमन्ता. हेतुपच्चयेन पच्चयो होति, आरम्मणपच्चयेन पच्चयो होति, अनन्तरपच्चयेन पच्चयो होति, समनन्तरपच्चयेन पच्चयो होतीति? न हेवं वत्तब्बे. तेन हि पच्चयता ववत्थिताति.

पच्चयताकथा निट्ठिता.