१४. चुद्दसमवग्गो

(१४१) ६. परियुट्ठानं चित्तविप्पयुत्तन्तिकथा

७०२. परियुट्ठानं चित्तविप्पयुत्तन्ति? आमन्ता. रूपं निब्बानं चक्खायतनं…पे… फोट्ठब्बायतनन्ति? न हेवं वत्तब्बे…पे… परियुट्ठानं चित्तविप्पयुत्तन्ति? आमन्ता. नत्थि सरागं चित्तं सदोसं चित्तं समोहं चित्तं…पे… अकुसलं चित्तं संकिलिट्ठं चित्तन्ति? न हेवं वत्तब्बे…पे… ननु अत्थि सरागं चित्तं सदोसं चित्तं समोहं चित्तं…पे… अकुसलं चित्तं संकिलिट्ठं चित्तन्ति? आमन्ता. हञ्चि अत्थि सरागं चित्तं सदोसं चित्तं समोहं चित्तं…पे… अकुसलं चित्तं संकिलिट्ठं चित्तं, नो च वत रे वत्तब्बे – ‘‘परियुट्ठानं चित्तविप्पयुत्त’’न्ति.

परियुट्ठानं चित्तविप्पयुत्तन्तिकथा निट्ठिता.