१३. तेरसमवग्गो

(१२८) ३. अनन्तरापयुत्तकथा

६६०. अनन्तरापयुत्तो पुग्गलो सम्मत्तनियामं ओक्कमेय्याति? आमन्ता. मिच्छत्तनियामञ्च सम्मत्तनियामञ्च उभो ओक्कमेय्याति? न हेवं वत्तब्बे…पे… अनन्तरापयुत्तो पुग्गलो सम्मत्तनियामं ओक्कमेय्याति? आमन्ता. ननु तं कम्मं पयुत्तं कुक्कुच्चं उप्पादितं विप्पटिसारियं जनितन्ति? आमन्ता. हञ्चि तं कम्मं पयुत्तं कुक्कुच्चं उप्पादितं विप्पटिसारियं जनितं, नो च वत रे वत्तब्बे – ‘‘अनन्तरापयुत्तो पुग्गलो सम्मत्तनियामं ओक्कमेय्या’’ति.

६६१. अनन्तरापयुत्तो पुग्गलो अभब्बो सम्मत्तनियामं ओक्कमितुन्ति? आमन्ता. माता जीविता वोरोपिता… पिता जीविता वोरोपितो… अरहा जीविता वोरोपितो… दुट्ठेन चित्तेन तथागतस्स लोहितं उप्पादितं… सङ्घो भिन्नोति? न हेवं वत्तब्बे…पे….

अनन्तरापयुत्तो पुग्गलो तं कम्मं पटिसंहरित्वा कुक्कुच्चं पटिविनोदेत्वा विप्पटिसारियं पटिविनेत्वा [पटिविनोदेत्वा (सी. पी. क.)] अभब्बो सम्मत्तनियामं ओक्कमितुन्ति? आमन्ता. माता जीविता वोरोपिता… पिता जीविता वोरोपितो…पे… सङ्घो भिन्नोति? न हेवं वत्तब्बे…पे….

अनन्तरापयुत्तो पुग्गलो तं कम्मं पटिसंहरित्वा कुक्कुच्चं पटिविनोदेत्वा विप्पटिसारियं पटिविनेत्वा अभब्बो सम्मत्तनियामं ओक्कमितुन्ति? आमन्ता. ननु तं कम्मं पटिसंहटं कुक्कुच्चं पटिविनोदितं विप्पटिसारियं पटिविनीतन्ति? आमन्ता. हञ्चि तं कम्मं पटिसंहटं कुक्कुच्चं पटिविनोदितं विप्पटिसारियं पटिविनीतं, नो च वत रे वत्तब्बे – ‘‘अनन्तरापयुत्तो पुग्गलो तं कम्मं पटिसंहरित्वा कुक्कुच्चं पटिविनोदेत्वा विप्पटिसारियं पटिविनेत्वा अभब्बो सम्मत्तनियामं ओक्कमितु’’न्ति.

६६२. अनन्तरापयुत्तो पुग्गलो सम्मत्तनियामं ओक्कमेय्याति? आमन्ता. ननु तं कम्मं पयुत्तो आसीति? आमन्ता. हञ्चि तं कम्मं पयुत्तो आसि, नो च वत रे वत्तब्बे – ‘‘अनन्तरापयुत्तो पुग्गलो सम्मत्तनियामं ओक्कमेय्या’’ति.

अनन्तरापयुत्तकथा निट्ठिता.