(१२६) १. कप्पट्ठकथा

६५४. कप्पट्ठो कप्पं तिट्ठेय्याति? आमन्ता. कप्पो च सण्ठाति बुद्धो च लोके उप्पज्जतीति? न हेवं वत्तब्बे…पे…. कप्पट्ठो कप्पं तिट्ठेय्याति? आमन्ता. कप्पो च सण्ठाति सङ्घो च भिज्जतीति? न हेवं वत्तब्बे…पे… कप्पट्ठो कप्पं तिट्ठेय्याति? आमन्ता. कप्पो च सण्ठाति कप्पट्ठो च कप्पट्ठियं कम्मं करोतीति? न हेवं वत्तब्बे…पे… कप्पट्ठो कप्पं तिट्ठेय्याति? आमन्ता. कप्पो च सण्ठाति कप्पट्ठो च पुग्गलो कालं करोतीति? न हेवं वत्तब्बे…पे….

६५५. कप्पट्ठो कप्पं तिट्ठेय्याति? आमन्ता. अतीतं कप्पं तिट्ठेय्य, अनागतं कप्पं तिट्ठेय्याति? न हेवं वत्तब्बे…पे… कप्पट्ठो कप्पं तिट्ठेय्याति? आमन्ता. द्वे कप्पे तिट्ठेय्य… तयो कप्पे तिट्ठेय्य… चत्तारो कप्पे तिट्ठेय्याति? न हेवं वत्तब्बे…पे….

६५६. कप्पट्ठो कप्पं तिट्ठेय्याति? आमन्ता. कप्पट्ठो कप्पे डय्हन्ते कत्थ गच्छतीति? अञ्ञं लोकधातुं गच्छतीति. मतो गच्छति, वेहासं गच्छतीति? मतो गच्छतीति. कप्पट्ठियं कम्मं अपरापरियवेपक्कन्ति? न हेवं वत्तब्बे…पे… [वेहासं गच्छतीति (?) अयं हि परवादिस्स पटिञ्ञायेव, कथा. ६२१-६२३ नवमपन्तियं विय] वेहासं गच्छतीति? आमन्ता [वेहासं गच्छतीति (?) अयं हि परवादिस्स पटिञ्ञायेव, कथा. ६२१-६२३ नवमपन्तियं विय]. कप्पट्ठो इद्धिमाति? न हेवं वत्तब्बे…पे… कप्पट्ठो इद्धिमाति? आमन्ता. कप्पट्ठेन छन्दिद्धिपादो भावितो वीरियिद्धिपादो भावितो चित्तिद्धिपादो भावितो वीमंसिद्धिपादो भावितोति? न हेवं वत्तब्बे…पे….

६५७. न वत्तब्बं – ‘‘कप्पट्ठो कप्पं तिट्ठेय्या’’ति? आमन्ता. ननु वुत्तं भगवता –

‘‘आपायिको नेरयिको, कप्पट्ठो सङ्घभेदको;

वग्गरतो अधम्मट्ठो, योगक्खेमा पधंसति;

सङ्घं समग्गं भेत्वान [भिन्दित्वा (सी. क.)], कप्पं निरयम्हि पच्चती’’ति [चूळव. ३५४; अ. नि. १०.३९; इतिवु. १८].

अत्थेव सुत्तन्तोति? आमन्ता. तेन हि कप्पट्ठो कप्पं तिट्ठेय्याति.

कप्पट्ठकथा निट्ठिता.