(१२३) ८. जीविता वोरोपनकथा

६४८. दिट्ठिसम्पन्नो पुग्गलो सञ्चिच्च पाणं जीविता वोरोपेय्याति? आमन्ता. दिट्ठिसम्पन्नो पुग्गलो सञ्चिच्च मातरं जीविता वोरोपेय्य…पे… पितरं जीविता वोरोपेय्य …पे… अरहन्तं जीविता वोरोपेय्य…पे… दुट्ठेन चित्तेन तथागतस्स लोहितं उप्पादेय्य…पे… सङ्घं भिन्देय्याति? न हेवं वत्तब्बे…पे….

दिट्ठिसम्पन्नो पुग्गलो सञ्चिच्च पाणं जीविता वोरोपेय्याति? आमन्ता. दिट्ठिसम्पन्नो पुग्गलो सत्थरि अगारवोति? न हेवं वत्तब्बे…पे… धम्मे…पे… सङ्घे…पे… सिक्खाय अगारवोति? न हेवं वत्तब्बे…पे….

ननु दिट्ठिसम्पन्नो पुग्गलो सत्थरि सगारवोति? आमन्ता. हञ्चि दिट्ठिसम्पन्नो पुग्गलो सत्थरि सगारवो, नो च वत रे वत्तब्बे – ‘‘दिट्ठिसम्पन्नो पुग्गलो सञ्चिच्च पाणं जीविता वोरोपेय्या’’ति. ननु दिट्ठिसम्पन्नो पुग्गलो धम्मे…पे… सङ्घे…पे… सिक्खाय सगारवोति? आमन्ता. हञ्चि दिट्ठिसम्पन्नो पुग्गलो सिक्खाय सगारवो, नो च वत रे वत्तब्बे – ‘‘दिट्ठिसम्पन्नो पुग्गलो सञ्चिच्च पाणं जीविता वोरोपेय्या’’ति.

६४९. दिट्ठिसम्पन्नो पुग्गलो सत्थरि अगारवोति? आमन्ता. दिट्ठिसम्पन्नो पुग्गलो बुद्धथूपे ओहदेय्य ओमुत्तेय्य निट्ठुभेय्य बुद्धथूपे अपब्यामतो [असब्याकतो (सी. क.)] करेय्याति? न हेवं वत्तब्बे…पे….

दिट्ठिसम्पन्नो पुग्गलो सञ्चिच्च पाणं जीविता वोरोपेय्याति? आमन्ता. ननु वुत्तं भगवता – ‘‘सेय्यथापि, भिक्खवे, महासमुद्दो ठितधम्मो वेलं नातिवत्तति; एवमेव खो, भिक्खवे, यं मया सावकानं सिक्खापदं पञ्ञत्तं तं मम सावका जीवितहेतुपि नातिक्कमन्ती’’ति [चूळव. ३८५; अ. नि. ८.२०; उदा. ४५]! अत्थेव सुत्तन्तोति? आमन्ता. तेन हि न वत्तब्बं – ‘‘दिट्ठिसम्पन्नो पुग्गलो सञ्चिच्च पाणं जीविता वोरोपेय्या’’ति.

जीविता वोरोपनकथा निट्ठिता.