१२. द्वादसमवग्गो

(१२०) ५. सत्तक्खत्तुपरमकथा

६४१. सत्तक्खत्तुपरमो पुग्गलो सत्तक्खत्तुपरमतानियतोति? आमन्ता. माता जीविता वोरोपिता… पिता जीविता वोरोपितो… अरहा जीविता वोरोपितो… दुट्ठेन चित्तेन तथागतस्स लोहितं उप्पादितं… सङ्घो भिन्नोति? न हेवं वत्तब्बे…पे….

सत्तक्खत्तुपरमो पुग्गलो सत्तक्खत्तुपरमतानियतोति? आमन्ता. अभब्बो अन्तरा धम्मं अभिसमेतुन्ति? न हेवं वत्तब्बे…पे…. अभब्बो अन्तरा धम्मं अभिसमेतुन्ति? आमन्ता. माता जीविता वोरोपिता… पिता जीविता वोरोपितो… अरहा जीविता वोरोपितो… दुट्ठेन चित्तेन तथागतस्स लोहितं उप्पादितं… सङ्घो भिन्नोति? न हेवं वत्तब्बे…पे….

६४२. सत्तक्खत्तुपरमो पुग्गलो सत्तक्खत्तुपरमतानियतोति? आमन्ता. अत्थि सो नियमो येन नियमेन सत्तक्खत्तुपरमो पुग्गलो सत्तक्खत्तुपरमतानियतोति? न हेवं वत्तब्बे…पे… अत्थि ते सतिपट्ठाना…पे… सम्मप्पधाना… इद्धिपादा… इन्द्रिया… बला… बोज्झङ्गा येहि बोज्झङ्गेहि सत्तक्खत्तुपरमो पुग्गलो सत्तक्खत्तुपरमतानियतोति? न हेवं वत्तब्बे…पे….

६४३. नत्थि सो नियमो येन नियमेन सत्तक्खत्तुपरमो पुग्गलो सत्तक्खत्तुपरमतानियतोति? आमन्ता. हञ्चि नत्थि सो नियमो येन नियमेन सत्तक्खत्तुपरमो पुग्गलो सत्तक्खत्तुपरमतानियतो, नो च वत रे वत्तब्बे – ‘‘सत्तक्खत्तुपरमो पुग्गलो सत्तक्खत्तुपरमतानियतो’’ति.

नत्थि ते सतिपट्ठाना… बोज्झङ्गा येहि बोज्झङ्गेहि सत्तक्खत्तुपरमो पुग्गलो सत्तक्खत्तुपरमतानियतोति? आमन्ता. हञ्चि नत्थि ते बोज्झङ्गा येहि बोज्झङ्गेहि सत्तक्खत्तुपरमो पुग्गलो सत्तक्खत्तुपरमतानियतो, नो च वत रे वत्तब्बे – ‘‘सत्तक्खत्तुपरमो पुग्गलो सत्तक्खत्तुपरमतानियतो’’ति.

६४४. सत्तक्खत्तुपरमो पुग्गलो सत्तक्खत्तुपरमतानियतोति? आमन्ता. सकदागामिनियमेनाति? न हेवं वत्तब्बे…पे… अनागामिनियमेनाति? न हेवं वत्तब्बे…पे… अरहत्तनियमेनाति? न हेवं वत्तब्बे…पे….

कतमेन नियमेनाति? सोतापत्तिनियमेनाति. सत्तक्खत्तुपरमो पुग्गलो सत्तक्खत्तुपरमतानियतोति? आमन्ता. ये केचि सोतापत्तिनियामं ओक्कमन्ति, सब्बे ते सत्तक्खत्तुपरमतानियताति? न हेवं वत्तब्बे…पे….

६४५. न वत्तब्बं – ‘‘सत्तक्खत्तुपरमो पुग्गलो सत्तक्खत्तुपरमतानियतो’’ति? आमन्ता. ननु सो सत्तक्खत्तुपरमोति? आमन्ता. हञ्चि सो सत्तक्खत्तुपरमो, तेन वत रे वत्तब्बे – ‘‘सत्तक्खत्तुपरमो पुग्गलो सत्तक्खत्तुपरमतानियतो’’ति.

सत्तक्खत्तुपरमकथा निट्ठिता.