(११७) २. कम्मकथा

६३३. सब्बं कम्मं सविपाकन्ति? आमन्ता. सब्बा चेतना सविपाकाति? न हेवं वत्तब्बे…पे… सब्बा चेतना सविपाकाति? आमन्ता. विपाकाब्याकता चेतना सविपाकाति? न हेवं वत्तब्बे…पे… सब्बा चेतना सविपाकाति? आमन्ता. किरियाब्याकता चेतना सविपाकाति? न हेवं वत्तब्बे…पे….

सब्बा चेतना सविपाकाति? आमन्ता. कामावचरा विपाकाब्याकता चेतना सविपाकाति? न हेवं वत्तब्बे…पे… सब्बा चेतना सविपाकाति? आमन्ता. रूपावचरा अरूपावचरा अपरियापन्ना विपाकाब्याकता चेतना सविपाकाति? न हेवं वत्तब्बे…पे….

सब्बा चेतना सविपाकाति? आमन्ता. कामावचरा किरियाब्याकता चेतना सविपाकाति? न हेवं वत्तब्बे…पे… सब्बा चेतना सविपाकाति? आमन्ता. रूपावचरा अरूपावचरा किरियाब्याकता चेतना सविपाकाति? न हेवं वत्तब्बे…पे….

६३४. विपाकाब्याकता चेतना अविपाकाति? आमन्ता. हञ्चि विपाकाब्याकता चेतना अविपाका, नो च वत रे वत्तब्बे – ‘‘सब्बा चेतना सविपाका’’ति.

किरियाब्याकता चेतना अविपाकाति? आमन्ता. हञ्चि किरियाब्याकता चेतना अविपाका, नो च वत रे वत्तब्बे – ‘‘सब्बा चेतना सविपाका’’ति.

कामावचरा रूपावचरा अरूपावचरा अपरियापन्ना विपाकाब्याकता चेतना अविपाकाति? आमन्ता. हञ्चि अपरियापन्ना विपाकाब्याकता चेतना अविपाका, नो च वत रे वत्तब्बे – ‘‘सब्बा चेतना सविपाका’’ति.

कामावचरा रूपावचरा अरूपावचरा किरियाब्याकता चेतना अविपाकाति? आमन्ता. हञ्चि अरूपावचरा किरियाब्याकता चेतना अविपाका, नो च वत रे वत्तब्बे – ‘‘सब्बा चेतना सविपाका’’ति.

६३५. न वत्तब्बं – ‘‘सब्बं कम्मं सविपाक’’न्ति? आमन्ता. ननु वुत्तं भगवता – ‘‘नाहं, भिक्खवे, सञ्चेतनिकानं कम्मानं कतानं उपचितानं अप्पटिसंविदित्वा ब्यन्तिभावं वदामि, तञ्च खो दिट्ठेव धम्मे उपपज्जे [उपपज्जं (अ. नि. १०.१७)] वा अपरे वा परियाये’’ति [अ. नि. १०.२१७]! अत्थेव सुत्तन्तोति? आमन्ता. तेन हि सब्बं कम्मं सविपाकन्ति.

कम्मकथा निट्ठिता.