१. वादयुत्तिपरिहानि

२३९. परिहायति अरहा अरहत्ताति? आमन्ता. सब्बत्थ अरहा अरहत्ता परिहायतीति? न हेवं वत्तब्बे…पे… सब्बत्थ अरहा अरहत्ता परिहायतीति? आमन्ता. सब्बत्थ अरहतो परिहानीति? न हेवं वत्तब्बे…पे….

परिहायति अरहा अरहत्ताति? आमन्ता. सब्बदा अरहा अरहत्ता परिहायतीति? न हेवं वत्तब्बे…पे… सब्बदा अरहा अरहत्ता परिहायतीति? आमन्ता. सब्बदा अरहतो परिहानीति? न हेवं वत्तब्बे…पे….

परिहायति अरहा अरहत्ताति? आमन्ता. सब्बेव अरहन्तो अरहत्ता परिहायन्तीति? न हेवं वत्तब्बे…पे… सब्बेव अरहन्तो अरहत्ता परिहायन्तीति? आमन्ता. सब्बेसंयेव अरहन्तानं परिहानीति? न हेवं वत्तब्बे…पे….

परिहायति अरहा अरहत्ताति? आमन्ता. अरहा अरहत्ता परिहायमानो चतूहि फलेहि परिहायतीति? न हेवं वत्तब्बे…पे….

चतूहि सतसहस्सेहि सेट्ठी सेट्ठित्तं कारेन्तो सतसहस्से परिहीने सेट्ठित्ता परिहीनो होतीति? आमन्ता. सब्बसापतेय्या परिहीनो होतीति? न हेवं वत्तब्बे…पे….

चतूहि सतसहस्सेहि सेट्ठी सेट्ठित्तं कारेन्तो सतसहस्से परिहीने भब्बो सब्बसापतेय्या परिहायितुन्ति? आमन्ता. अरहा अरहत्ता परिहायमानो भब्बो चतूहि फलेहि परिहायितुन्ति? न हेवं वत्तब्बे…पे….