(११५) १०. अनिच्चताकथा

६२८. अनिच्चता परिनिप्फन्नाति? आमन्ता. ताय अनिच्चताय अनिच्चता परिनिप्फन्नाति? न हेवं वत्तब्बे…पे… ताय अनिच्चताय अनिच्चता परिनिप्फन्नाति? आमन्ता. ताय तायेव नत्थि दुक्खस्सन्तकिरिया, नत्थि वट्टुपच्छेदो, नत्थि अनुपादापरिनिब्बानन्ति? न हेवं वत्तब्बे.

जरा परिनिप्फन्नाति? आमन्ता. ताय जराय जरा परिनिप्फन्नाति? न हेवं वत्तब्बे…पे… ताय जराय जरा परिनिप्फन्नाति? आमन्ता. ताय तायेव नत्थि दुक्खस्सन्तकिरिया, नत्थि वट्टुपच्छेदो, नत्थि अनुपादापरिनिब्बानन्ति? न हेवं वत्तब्बे…पे….

मरणं परिनिप्फन्नन्ति? आमन्ता. तस्स मरणस्स मरणं परिनिप्फन्नन्ति? न हेवं वत्तब्बे. तस्स मरणस्स मरणं परिनिप्फन्नन्ति? आमन्ता. तस्स तस्सेव नत्थि दुक्खस्सन्तकिरिया, नत्थि वट्टुपच्छेदो, नत्थि अनुपादापरिनिब्बानन्ति? न हेवं वत्तब्बे…पे….

६२९. रूपं परिनिप्फन्नं, रूपस्स अनिच्चता अत्थीति? आमन्ता. अनिच्चता परिनिप्फन्ना, अनिच्चताय अनिच्चता अत्थीति? न हेवं वत्तब्बे…पे… रूपं परिनिप्फन्नं, रूपस्स जरा अत्थीति? आमन्ता. जरा परिनिप्फन्ना, जराय जरा अत्थीति? न हेवं वत्तब्बे…पे….

रूपं परिनिप्फन्नं, रूपस्स भेदो अत्थि, अन्तरधानं अत्थीति? आमन्ता. मरणं परिनिप्फन्नं, मरणस्स भेदो अत्थि, अन्तरधानं अत्थीति? न हेवं वत्तब्बे…पे….

वेदना …पे… सञ्ञा… सङ्खारा…पे… विञ्ञाणं परिनिप्फन्नं, विञ्ञाणस्स अनिच्चता अत्थीति? आमन्ता. अनिच्चता परिनिप्फन्ना, अनिच्चताय अनिच्चता अत्थीति? न हेवं वत्तब्बे …पे… विञ्ञाणं परिनिप्फन्नं, विञ्ञाणस्स जरा अत्थीति? आमन्ता. जरा परिनिप्फन्ना, जराय जरा अत्थीति? न हेवं वत्तब्बे…पे….

विञ्ञाणं परिनिप्फन्नं, विञ्ञाणस्स भेदो अत्थि, अन्तरधानं अत्थीति? आमन्ता. मरणं परिनिप्फन्नं, मरणस्स भेदो अत्थि, अन्तरधानं अत्थीति? न हेवं वत्तब्बे…पे….

अनिच्चताकथा निट्ठिता.

एकादसमवग्गो.

तस्सुद्दानं –

अनुसया अब्याकता, अहेतुका, चित्तविप्पयुत्ता, अञ्ञाणे विगते ञाणी, ञाणं चित्तविप्पयुत्तं, यत्थ सद्दे [यत्थ सद्दो (सी.), यथासद्दं (?)] ञाणं पवत्तति, इद्धिबलेन समन्नागतो कप्पं तिट्ठेय्य, चित्तसन्तति समाधि, धम्मट्ठितता, अनिच्चताति.