११. एकादसमवग्गो

(११०) ५. ञाणं चित्तविप्पयुत्तन्तिकथा

६१६. ञाणं चित्तविप्पयुत्तन्ति? आमन्ता. रूपं निब्बानं चक्खायतनं…पे… फोट्ठब्बायतनन्ति? न हेवं वत्तब्बे…पे… ञाणं चित्तविप्पयुत्तन्ति? आमन्ता. पञ्ञा पञ्ञिन्द्रियं पञ्ञाबलं सम्मादिट्ठि धम्मविचयसम्बोज्झङ्गो चित्तविप्पयुत्तोति? न हेवं वत्तब्बे…पे… पञ्ञा पञ्ञिन्द्रियं पञ्ञाबलं सम्मादिट्ठि धम्मविचयसम्बोज्झङ्गो चित्तसम्पयुत्तोति? आमन्ता. ञाणं चित्तसम्पयुत्तन्ति? न हेवं वत्तब्बे…पे….

ञाणं चित्तविप्पयुत्तन्ति? आमन्ता. कतमक्खन्धपरियापन्नन्ति? सङ्खारक्खन्धपरियापन्नन्ति. सङ्खारक्खन्धो चित्तविप्पयुत्तोति? न हेवं वत्तब्बे…पे… सङ्खारक्खन्धो चित्तविप्पयुत्तोति? आमन्ता. वेदनाक्खन्धो सञ्ञाक्खन्धो चित्तविप्पयुत्तोति? न हेवं वत्तब्बे…पे… ञाणं सङ्खारक्खन्धपरियापन्नं चित्तविप्पयुत्तन्ति? आमन्ता. पञ्ञा सङ्खारक्खन्धपरियापन्ना चित्तविप्पयुत्ताति? न हेवं वत्तब्बे…पे… पञ्ञा सङ्खारक्खन्धपरियापन्ना चित्तसम्पयुत्ताति? आमन्ता. ञाणं सङ्खारक्खन्धपरियापन्नं चित्तसम्पयुत्तन्ति? न हेवं वत्तब्बे…पे… ञाणं सङ्खारक्खन्धपरियापन्नं चित्तविप्पयुत्तं, पञ्ञा सङ्खारक्खन्धपरियापन्ना चित्तसम्पयुत्ताति? आमन्ता. सङ्खारक्खन्धो एकदेसो चित्तसम्पयुत्तो एकदेसो चित्तविप्पयुत्तोति? न हेवं वत्तब्बे…पे… सङ्खारक्खन्धो एकदेसो चित्तसम्पयुत्तो एकदेसो चित्तविप्पयुत्तोति? आमन्ता. वेदनाक्खन्धो सञ्ञाक्खन्धो एकदेसो चित्तसम्पयुत्तो एकदेसो चित्तविप्पयुत्तोति? न हेवं वत्तब्बे…पे….

६१७. न वत्तब्बं – ‘‘ञाणं चित्तविप्पयुत्त’’न्ति? आमन्ता. अरहा चक्खुविञ्ञाणसमङ्गी ‘‘ञाणी’’ति वत्तब्बोति? आमन्ता. ञाणं तेन चित्तेन सम्पयुत्तन्ति? न हेवं वत्तब्बे. तेन हि ञाणं चित्तविप्पयुत्तन्ति.

अरहा चक्खुविञ्ञाणसमङ्गी ‘‘पञ्ञवा’’ति वत्तब्बोति [सकवादीपुच्छा विय दिस्सति]? आमन्ता. पञ्ञा तेन चित्तेन सम्पयुत्ताति? न हेवं वत्तब्बे. तेन हि पञ्ञा चित्तविप्पयुत्ताति.

ञाणं चित्तविप्पयुत्तन्तिकथा निट्ठिता.