(१०६-१०८) १-३. तिस्सोपि अनुसयकथा

६०५. अनुसया अब्याकताति? आमन्ता. विपाकाब्याकता किरियाब्याकता रूपं निब्बानं चक्खायतनं…पे… फोट्ठब्बायतनन्ति? न हेवं वत्तब्बे…पे….

कामरागानुसयो अब्याकतोति? आमन्ता. कामरागो कामरागपरियुट्ठानं कामरागसंयोजनं कामोघो कामयोगो कामच्छन्दनीवरणं अब्याकतन्ति? न हेवं वत्तब्बे…पे… कामरागो कामरागपरियुट्ठानं…पे… कामच्छन्दनीवरणं अकुसलन्ति? आमन्ता. कामरागानुसयो अकुसलोति? न हेवं वत्तब्बे…पे….

पटिघानुसयो अब्याकतोति? आमन्ता. पटिघं पटिघपरियुट्ठानं पटिघसंयोजनं अब्याकतन्ति? न हेवं वत्तब्बे…पे… पटिघं पटिघपरियुट्ठानं पटिघसंयोजनं अकुसलन्ति? आमन्ता. पटिघानुसयो अकुसलोति? न हेवं वत्तब्बे…पे….

मानानुसयो अब्याकतोति? आमन्ता. मानो मानपरियुट्ठानं मानसंयोजनं अब्याकतन्ति? न हेवं वत्तब्बे …पे… मानो मानपरियुट्ठानं मानसंयोजनं अकुसलन्ति? आमन्ता. मानानुसयो अकुसलोति? न हेवं वत्तब्बे …पे….

दिट्ठानुसयो अब्याकतोति? आमन्ता. दिट्ठि दिट्ठोघो दिट्ठियोगो दिट्ठिपरियुट्ठानं दिट्ठिसंयोजनं अब्याकतन्ति? न हेवं वत्तब्बे…पे… दिट्ठि दिट्ठोघो दिट्ठियोगो दिट्ठिपरियुट्ठानं दिट्ठिसंयोजनं अकुसलन्ति? आमन्ता. दिट्ठानुसयो अकुसलोति? न हेवं वत्तब्बे…पे….

विचिकिच्छानुसयो अब्याकतोति? आमन्ता. विचिकिच्छा विचिकिच्छापरियुट्ठानं विचिकिच्छासंयोजनं विचिकिच्छानीवरणं अब्याकतन्ति? न हेवं वत्तब्बे…पे… विचिकिच्छा विचिकिच्छापरियुट्ठानं विचिकिच्छासंयोजनं विचिकिच्छानीवरणं अकुसलन्ति? आमन्ता. विचिकिच्छानुसयो अकुसलोति? न हेवं वत्तब्बे…पे….

भवरागानुसयो अब्याकतोति? आमन्ता. भवरागो भवरागपरियुट्ठानं भवरागसंयोजनं अब्याकतन्ति? न हेवं वत्तब्बे…पे… भवरागो भवरागपरियुट्ठानं भवरागसंयोजनं अकुसलन्ति? आमन्ता. भवरागानुसयो अकुसलोति? न हेवं वत्तब्बे…पे….

अविज्जानुसयो अब्याकतोति? आमन्ता. अविज्जा अविज्जोघो अविज्जायोगो अविज्जापरियुट्ठानं अविज्जासंयोजनं अविज्जानीवरणं अब्याकतन्ति? न हेवं वत्तब्बे…पे… अविज्जा अविज्जोघो अविज्जायोगो अविज्जापरियुट्ठानं अविज्जासंयोजनं अविज्जानीवरणं अकुसलन्ति? आमन्ता. अविज्जानुसयो अकुसलोति? न हेवं वत्तब्बे…पे….

६०६. न वत्तब्बं – ‘‘अनुसया अब्याकता’’ति? आमन्ता. पुथुज्जनो कुसलाब्याकते चित्ते वत्तमाने ‘‘सानुसयो’’ति वत्तब्बोति? आमन्ता. कुसलाकुसला धम्मा सम्मुखीभावं आगच्छन्तीति? न हेवं वत्तब्बे…पे… तेन हि अनुसया अब्याकताति. पुथुज्जनो कुसलाब्याकते चित्ते वत्तमाने ‘‘सरागो’’ति वत्तब्बोति? आमन्ता. कुसलाकुसला धम्मा सम्मुखीभावं आगच्छन्तीति? न हेवं वत्तब्बे…पे… तेन हि रागो अब्याकतोति.

६०७. अनुसया अहेतुकाति? आमन्ता. रूपं निब्बानं चक्खायतनं…पे… फोट्ठब्बायतनन्ति? न हेवं वत्तब्बे…पे….

कामरागानुसयो अहेतुकोति? आमन्ता. कामरागो कामरागपरियुट्ठानं कामरागसंयोजनं कामच्छन्दनीवरणं अहेतुकन्ति? न हेवं वत्तब्बे…पे… कामरागो कामरागपरियुट्ठानं…पे… कामच्छन्दनीवरणं सहेतुकन्ति? आमन्ता. कामरागानुसयो सहेतुकोति? न हेवं वत्तब्बे…पे… पटिघानुसयो…पे… मानानुसयो… दिट्ठानुसयो… विचिकिच्छानुसयो… भवरागानुसयो… अविज्जानुसयो अहेतुकोति? आमन्ता. अविज्जा अविज्जोघो अविज्जायोगो अविज्जापरियुट्ठानं अविज्जासंयोजनं अविज्जानीवरणं अहेतुकन्ति? न हेवं वत्तब्बे …पे… अविज्जा अविज्जोघो…पे… अविज्जानीवरणं सहेतुकन्ति? आमन्ता. अविज्जानुसयो सहेतुकोति? न हेवं वत्तब्बे…पे….

६०८. न वत्तब्बं – ‘‘अनुसया अहेतुका’’ति? आमन्ता. पुथुज्जनो कुसलाब्याकते चित्ते वत्तमाने ‘‘सानुसयो’’ति वत्तब्बोति? आमन्ता. अनुसया तेन हेतुना सहेतुकाति? न हेवं वत्तब्बे…पे… तेन हि अनुसया अहेतुकाति. पुथुज्जनो कुसलाब्याकते चित्ते वत्तमाने ‘‘सरागो’’ति वत्तब्बोति? आमन्ता. रागो तेन हेतुना सहेतुकोति? न हेवं वत्तब्बे…पे… तेन हि रागो अहेतुकोति.

६०९. अनुसया चित्तविप्पयुत्ताति? आमन्ता. रूपं निब्बानं चक्खायतनं…पे… फोट्ठब्बायतनन्ति? न हेवं वत्तब्बे…पे….

कामरागानुसयो चित्तविप्पयुत्तोति? आमन्ता. कामरागो कामरागपरियुट्ठानं कामरागसंयोजनं कामोघो कामयोगो कामच्छन्दनीवरणं चित्तविप्पयुत्तन्ति? न हेवं वत्तब्बे…पे… कामरागो कामरागपरियुट्ठानं…पे… कामच्छन्दनीवरणं चित्तसम्पयुत्तन्ति? आमन्ता. कामरागानुसयो चित्तसम्पयुत्तोति? न हेवं वत्तब्बे…पे….

६१०. कामरागानुसयो चित्तविप्पयुत्तोति? आमन्ता. कतमक्खन्धपरियापन्नोति? सङ्खारक्खन्धपरियापन्नोति. सङ्खारक्खन्धो चित्तविप्पयुत्तोति? न हेवं वत्तब्बे. सङ्खारक्खन्धो चित्तविप्पयुत्तोति? आमन्ता. वेदनाक्खन्धो सञ्ञाक्खन्धो चित्तविप्पयुत्तोति? न हेवं वत्तब्बे…पे….

कामरागानुसयो सङ्खारक्खन्धपरियापन्नो चित्तविप्पयुत्तोति? आमन्ता. कामरागो सङ्खारक्खन्धपरियापन्नो चित्तविप्पयुत्तोति? न हेवं वत्तब्बे…पे… कामरागो सङ्खारक्खन्धपरियापन्नो चित्तसम्पयुत्तोति? आमन्ता. कामरागानुसयो सङ्खारक्खन्धपरियापन्नो चित्तसम्पयुत्तोति? न हेवं वत्तब्बे…पे….

कामरागानुसयो सङ्खारक्खन्धपरियापन्नो चित्तविप्पयुत्तो, कामरागो सङ्खारक्खन्धपरियापन्नो चित्तसम्पयुत्तोति? आमन्ता. सङ्खारक्खन्धो एकदेसो चित्तसम्पयुत्तो एकदेसो चित्तविप्पयुत्तोति? न हेवं वत्तब्बे…पे….

सङ्खारक्खन्धो एकदेसो चित्तसम्पयुत्तो एकदेसो चित्तविप्पयुत्तोति? आमन्ता. वेदनाक्खन्धो सञ्ञाक्खन्धो एकदेसो चित्तसम्पयुत्तो एकदेसो चित्तविप्पयुत्तोति? न हेवं वत्तब्बे…पे….

६११. पटिघानुसयो मानानुसयो दिट्ठानुसयो विचिकिच्छानुसयो भवरागानुसयो अविज्जानुसयो चित्तविप्पयुत्तोति? आमन्ता. अविज्जा अविज्जोघो अविज्जायोगो अविज्जानीवरणं चित्तविप्पयुत्तन्ति? न हेवं वत्तब्बे…पे… अविज्जा अविज्जोघो अविज्जायोगो अविज्जानीवरणं चित्तसम्पयुत्तन्ति? आमन्ता. अविज्जानुसयो चित्तसम्पयुत्तोति? न हेवं वत्तब्बे…पे….

६१२. अविज्जानुसयो चित्तविप्पयुत्तोति? आमन्ता. कतमक्खन्धपरियापन्नोति? सङ्खारक्खन्धपरियापन्नोति. सङ्खारक्खन्धो चित्तविप्पयुत्तोति? न हेवं वत्तब्बे. सङ्खारक्खन्धो चित्तविप्पयुत्तोति? आमन्ता. वेदनाक्खन्धो सञ्ञाक्खन्धो चित्तविप्पयुत्तोति? न हेवं वत्तब्बे…पे….

अविज्जानुसयो सङ्खारक्खन्धपरियापन्नो चित्तविप्पयुत्तोति? आमन्ता. अविज्जा सङ्खारक्खन्धपरियापन्ना चित्तविप्पयुत्ताति? न हेवं वत्तब्बे…पे… अविज्जा सङ्खारक्खन्धपरियापन्ना चित्तसम्पयुत्ताति? आमन्ता. अविज्जानुसयो सङ्खारक्खन्धपरियापन्नो चित्तसम्पयुत्तोति? न हेवं वत्तब्बे…पे….

अविज्जानुसयो सङ्खारक्खन्धपरियापन्नो चित्तविप्पयुत्तो, अविज्जासङ्खारक्खन्धपरियापन्ना चित्तसम्पयुत्ताति? आमन्ता. सङ्खारक्खन्धो एकदेसो चित्तसम्पयुत्तो एकदेसो चित्तविप्पयुत्तोति? न हेवं वत्तब्बे.

६१३. न वत्तब्बं – ‘‘अनुसया चित्तविप्पयुत्ता’’ति? आमन्ता. पुथुज्जनो कुसलाब्याकते चित्ते वत्तमाने ‘‘सानुसयो’’ति वत्तब्बोति? आमन्ता. अनुसया तेन चित्तेन सम्पयुत्ताति? न हेवं वत्तब्बे. तेन हि अनुसया चित्तविप्पयुत्ताति. पुथुज्जनो कुसलाब्याकते चित्ते वत्तमाने ‘‘सरागो’’ति वत्तब्बोति? आमन्ता. रागो तेन चित्तेन सम्पयुत्तोति? न हेवं वत्तब्बे. तेन हि रागो चित्तविप्पयुत्तोति.

तिस्सोपि अनुसयकथा निट्ठिता.