(९५) १. निरोधकथा

५७१. उपपत्तेसिये पञ्चक्खन्धे अनिरुद्धे किरिया पञ्चक्खन्धा उप्पज्जन्तीति? आमन्ता. दसन्नं खन्धानं समोधानं होति, दस खन्धा सम्मुखीभावं आगच्छन्तीति? न हेवं वत्तब्बे…पे… दसन्नं खन्धानं समोधानं होति, दस खन्धा सम्मुखीभावं आगच्छन्तीति? आमन्ता. द्विन्नं फस्सानं…पे… द्विन्नं चित्तानं समोधानं होतीति? न हेवं वत्तब्बे…पे….

उपपत्तेसिये पञ्चक्खन्धे अनिरुद्धे किरिया चत्तारो खन्धा उप्पज्जन्तीति? आमन्ता. नवन्नं खन्धानं समोधानं होति, नव खन्धा सम्मुखीभावं आगच्छन्तीति? न हेवं वत्तब्बे…पे… नवन्नं खन्धानं समोधानं होति, नव खन्धा सम्मुखीभावं आगच्छन्तीति? आमन्ता. द्विन्नं फस्सानं…पे… द्विन्नं चित्तानं समोधानं होतीति? न हेवं वत्तब्बे…पे….

उपपत्तेसिये पञ्चक्खन्धे अनिरुद्धे किरियाञाणं उप्पज्जतीति? आमन्ता. छन्नं खन्धानं समोधानं होति, छ खन्धा सम्मुखीभावं आगच्छन्तीति? न हेवं वत्तब्बे…पे… छन्नं खन्धानं समोधानं होति, छ खन्धा सम्मुखीभावं आगच्छन्तीति? आमन्ता. द्विन्नं फस्सानं…पे… द्विन्नं चित्तानं समोधानं होतीति? न हेवं वत्तब्बे…पे….

५७२. उपपत्तेसिये पञ्चक्खन्धे निरुद्धे मग्गो उप्पज्जतीति? आमन्ता. मतो मग्गं भावेति, कालङ्कतो मग्गं भावेतीति? न हेवं वत्तब्बे…पे….

निरोधकथा निट्ठिता.