(८०) ८. अरूपे रूपकथा

५२४. अत्थि रूपं अरूपेसूति? आमन्ता. रूपभवो रूपगति रूपसत्तावासो रूपसंसारो रूपयोनि रूपत्तभावपटिलाभोति? न हेवं वत्तब्बे…पे… ननु अरूपभवो अरूपगति अरूपसत्तावासो अरूपसंसारो अरूपयोनि अरूपत्तभावपटिलाभोति? आमन्ता. हञ्चि अरूपभवो…पे… अरूपत्तभावपटिलाभो, नो च वत रे वत्तब्बे – ‘‘अत्थि रूपं अरूपेसू’’ति.

अत्थि रूपं अरूपेसूति? आमन्ता. पञ्चवोकारभवो गति सत्तावासो संसारो योनि विञ्ञाणट्ठिति अत्तभावपटिलाभोति? न हेवं वत्तब्बे…पे… ननु चतुवोकारभवो…पे… अत्तभावपटिलाभोति? आमन्ता. हञ्चि चतुवोकारभवो गति…पे… अत्तभावपटिलाभो, नो च वत रे वत्तब्बे – ‘‘अत्थि रूपं अरूपेसू’’ति.

५२५. अत्थि रूपं रूपधातुया, सो च रूपभवो रूपगति रूपसत्तावासो रूपसंसारो रूपयोनि रूपत्तभावपटिलाभोति? आमन्ता. अत्थि रूपं अरूपेसु, सो च रूपभवो रूपगति…पे… रूपत्तभावपटिलाभोति? न हेवं वत्तब्बे…पे… अत्थि रूपं रूपधातुया, सो च पञ्चवोकारभवो गति…पे… अत्तभावपटिलाभोति? आमन्ता. अत्थि रूपं अरूपेसु, सो च पञ्चवोकारभवो गति…पे… अत्तभावपटिलाभोति? न हेवं वत्तब्बे…पे…. अत्थि रूपं अरूपेसु, सो च अरूपभवो अरूपगति अरूपसत्तावासो अरूपसंसारो अरूपयोनि अरूपत्तभावपटिलाभोति? आमन्ता. अत्थि रूपं रूपधातुया [अरूपधातुया (सब्बत्थ)], सो च अरूपभवो अरूपगति…पे… अरूपत्तभावपटिलाभोति? न हेवं वत्तब्बे…पे… अत्थि रूपं अरूपेसु, सो च चतुवोकारभवो गति…पे… अत्तभावपटिलाभोति? आमन्ता. अत्थि रूपं रूपधातुया [अरूपधातुया (सब्बत्थ)], सो च चतुवोकारभवो गति…पे… अत्तभावपटिलाभोति? न हेवं वत्तब्बे…पे….

५२६. अत्थि रूपं अरूपेसूति? आमन्ता. ननु रूपानं निस्सरणं अरूपं [इतिवु. ७२; अ. नि. ५.२००; दी. नि. ३.३२१] वुत्तं भगवताति? आमन्ता. हञ्चि रूपानं निस्सरणं अरूपं [इतिवु. ७२; अ. नि. ५.२००; दी. नि. ३.३२१] वुत्तं भगवता, नो च वत रे वत्तब्बे – ‘‘अत्थि रूपं अरूपेसू’’ति.

रूपानं निस्सरणं अरूपं वुत्तं भगवता, अत्थि रूपं अरूपेसूति? आमन्ता. कामानं निस्सरणं नेक्खम्मं वुत्तं भगवता, अत्थि नेक्खम्मेसु कामा, अत्थि अनासवेसु आसवा, अत्थि अपरियापन्नेसु परियापन्नाति? न हेवं वत्तब्बे…पे….

अरूपे रूपकथा निट्ठिता.