(८३) ११. कम्महेतुकथा

५४६. कम्महेतु अरहा अरहत्ता परिहायतीति? आमन्ता. कम्महेतु सोतापन्नो सोतापत्तिफला परिहायतीति? न हेवं वत्तब्बे…पे… कम्महेतु अरहा अरहत्ता परिहायतीति? आमन्ता. कम्महेतु सकदागामी…पे… अनागामी अनागामिफला परिहायतीति? न हेवं वत्तब्बे…पे….

कम्महेतु सोतापन्नो सोतापत्तिफला न परिहायतीति? आमन्ता. कम्महेतु अरहा अरहत्ता न परिहायतीति? न हेवं वत्तब्बे …पे… कम्महेतु सकदागामी…पे… अनागामी अनागामिफला न परिहायतीति? आमन्ता. कम्महेतु अरहा अरहत्ता न परिहायतीति? न हेवं वत्तब्बे…पे….

कम्महेतु अरहा अरहत्ता परिहायतीति? आमन्ता. पाणातिपातकम्मस्स हेतूति? न हेवं वत्तब्बे…पे… अदिन्नादानकम्मस्स हेतु…पे… कामेसुमिच्छाचारकम्मस्स हेतु… मुसावादकम्मस्स हेतु… पिसुणवाचाकम्मस्स हेतु… फरुसवाचाकम्मस्स हेतु… सम्फप्पलापकम्मस्स हेतु… मातुघातकम्मस्स [मातुघातककम्मस्स (स्या.), मातुघातिकम्मस्स (क.) तथा पितुघातअरहन्तघातकम्मस्सातिपदेसु] हेतु… पितुघातकम्मस्स हेतु… अरहन्तघातकम्मस्स हेतु… रुहिरुप्पादकम्मस्स हेतु…पे… सङ्घभेदकम्मस्स हेतूति? न हेवं वत्तब्बे…पे….

कतमस्स कम्मस्स हेतूति? हन्द हि अरहन्तानं अब्भाचिक्खतीति. अरहन्तानं अब्भाचिक्खनकम्मस्स हेतु अरहा अरहत्ता परिहायतीति? आमन्ता. ये केचि अरहन्तानं अब्भाचिक्खन्ति, सब्बे ते अरहत्तं सच्छिकरोन्तीति? न हेवं वत्तब्बे…पे….

कम्महेतुकथा निट्ठिता.

अट्ठमवग्गो.

तस्सुद्दानं –

छ गतियो, अन्तराभवो, पञ्चेव कामगुणा कामधातु, पञ्चेव आयतना कामा, रूपिनो धम्मा रूपधातु, अरूपिनो धम्मा अरूपधातु, सळायतनिको अत्तभावो रूपधातुया, अत्थि रूपं अरूपेसु, रूपं कम्मं, रूपं जीवितं, कम्महेतुका परिहायतीति.