८. अट्ठमवग्गो

(८२) १०. जीवितिन्द्रियकथा

५४०. नत्थि रूपजीवितिन्द्रियन्ति? आमन्ता. नत्थि रूपीनं धम्मानं आयु ठिति यपना यापना इरियना वत्तना पालनाति? न हेवं वत्तब्बे…पे… अत्थि रूपीनं धम्मानं आयु ठिति यपना यापना इरियना वत्तना पालनाति? आमन्ता. हञ्चि अत्थि रूपीनं धम्मानं आयु ठिति यपना यापना इरियना वत्तना पालना, नो च वत रे वत्तब्बे – ‘‘नत्थि रूपजीवितिन्द्रिय’’न्ति.

अत्थि अरूपीनं धम्मानं आयु ठिति यपना यापना इरियना वत्तना पालना, अत्थि अरूपजीवितिन्द्रियन्ति? आमन्ता. अत्थि रूपीनं धम्मानं आयु ठिति यपना यापना इरियना वत्तना पालना, अत्थि रूपजीवितिन्द्रियन्ति? न हेवं वत्तब्बे…पे… अत्थि रूपीनं धम्मानं आयु ठिति यपना यापना इरियना वत्तना पालना, नत्थि रूपजीवितिन्द्रियन्ति? आमन्ता. अत्थि अरूपीनं धम्मानं आयु ठिति यपना यापना इरियना वत्तना पालना, नत्थि अरूपजीवितिन्द्रियन्ति? न हेवं वत्तब्बे…पे….

अरूपीनं धम्मानं आयु अरूपजीवितिन्द्रियन्ति? आमन्ता. रूपीनं धम्मानं आयु रूपजीवितिन्द्रियन्ति? न हेवं वत्तब्बे…पे… रूपीनं धम्मानं आयु न वत्तब्बं – ‘‘रूपजीवितिन्द्रिय’’न्ति? आमन्ता. अरूपीनं धम्मानं आयु न वत्तब्बं – ‘‘अरूपजीवितिन्द्रिय’’न्ति? न हेवं वत्तब्बे…पे….

५४१. रूपीनं धम्मानं आयु अरूपजीवितिन्द्रियन्ति? आमन्ता. अरूपीनं धम्मानं आयु रूपजीवितिन्द्रियन्ति? न हेवं वत्तब्बे…पे….

अरूपीनं धम्मानं आयु न वत्तब्बं – ‘‘रूपजीवितिन्द्रिय’’न्ति? आमन्ता. रूपीनं धम्मानं आयु न वत्तब्बं – ‘‘अरूपजीवितिन्द्रिय’’न्ति? न हेवं वत्तब्बे…पे….

रूपीनञ्च अरूपीनञ्च धम्मानं आयु अरूपजीवितिन्द्रियन्ति? आमन्ता. रूपीनञ्च अरूपीनञ्च धम्मानं आयु रूपजीवितिन्द्रियन्ति? न हेवं वत्तब्बे…पे….

रूपीनञ्च अरूपीनञ्च धम्मानं आयु न वत्तब्बं – ‘‘रूपजीवितिन्द्रिय’’न्ति? आमन्ता. रूपीनञ्च अरूपीनञ्च धम्मानं आयु न वत्तब्बं – ‘‘अरूपजीवितिन्द्रिय’’न्ति? न हेवं वत्तब्बे…पे… नत्थि रूपजीवितिन्द्रियन्ति? आमन्ता. निरोधं समापन्नस्स नत्थि जीवितिन्द्रियन्ति? न हेवं वत्तब्बे…पे….

५४२. निरोधं समापन्नस्स अत्थि जीवितिन्द्रियन्ति? आमन्ता. हञ्चि निरोधं समापन्नस्स अत्थि जीवितिन्द्रियं, नो च वत रे वत्तब्बे – ‘‘नत्थि रूपजीवितिन्द्रिय’’न्ति.

निरोधं समापन्नस्स अत्थि जीवितिन्द्रियन्ति? आमन्ता. कतमक्खन्धपरियापन्नन्ति? सङ्खारक्खन्धपरियापन्नन्ति. निरोधं समापन्नस्स अत्थि सङ्खारक्खन्धोति? न हेवं वत्तब्बे…पे….

निरोधं समापन्नस्स अत्थि सङ्खारक्खन्धोति? आमन्ता. निरोधं समापन्नस्स अत्थि वेदनाक्खन्धो…पे… सञ्ञाक्खन्धो…पे… विञ्ञाणक्खन्धोति? न हेवं वत्तब्बे…पे….

निरोधं समापन्नस्स अत्थि वेदनाक्खन्धो…पे… सञ्ञाक्खन्धो…पे… विञ्ञाणक्खन्धोति? आमन्ता. न निरोधं समापन्नोति? न हेवं वत्तब्बे…पे….

५४३. नत्थि रूपजीवितिन्द्रियन्ति? आमन्ता. असञ्ञसत्तानं नत्थि जीवितिन्द्रियन्ति? न हेवं वत्तब्बे…पे….

असञ्ञसत्तानं अत्थि जीवितिन्द्रियन्ति? आमन्ता. हञ्चि असञ्ञसत्तानं अत्थि जीवितिन्द्रियं, नो च वत रे वत्तब्बे – ‘‘नत्थि रूपजीवितिन्द्रिय’’न्ति. असञ्ञसत्तानं अत्थि जीवितिन्द्रियन्ति? आमन्ता. कतमक्खन्धपरियापन्नन्ति? सङ्खारक्खन्धपरियापन्नन्ति. असञ्ञसत्तानं अत्थि सङ्खारक्खन्धोति? न हेवं वत्तब्बे…पे….

असञ्ञसत्तानं अत्थि सङ्खारक्खन्धोति? आमन्ता. असञ्ञसत्तानं अत्थि वेदनाक्खन्धो…पे… सञ्ञाक्खन्धो…पे… विञ्ञाणक्खन्धोति? न हेवं वत्तब्बे…पे….

असञ्ञसत्तानं अत्थि वेदनाक्खन्धो…पे… सञ्ञाक्खन्धो…पे… विञ्ञाणक्खन्धोति? आमन्ता. पञ्चवोकारभवोति? न हेवं वत्तब्बे…पे….

५४४. उपपत्तेसियेन चित्तेन समुट्ठितं जीवितिन्द्रियं उपपत्तेसिये चित्ते भिज्जमाने एकदेसं भिज्जतीति? आमन्ता. उपपत्तेसियेन चित्तेन समुट्ठितो फस्सो उपपत्तेसिये चित्ते भिज्जमाने एकदेसो भिज्जतीति? न हेवं वत्तब्बे…पे….

उपपत्तेसियेन चित्तेन समुट्ठितो फस्सो उपपत्तेसिये चित्ते भिज्जमाने अनवसेसो भिज्जतीति? आमन्ता. उपपत्तेसियेन चित्तेन समुट्ठितं जीवितिन्द्रियं उपपत्तेसिये चित्ते भिज्जमाने अनवसेसं भिज्जतीति? न हेवं वत्तब्बे…पे….

५४५. द्वे जीवितिन्द्रियानीति? आमन्ता. द्वीहि जीवितेहि जीवति, द्वीहि मरणेहि मीयतीति? आमन्ता [न हेवं वत्तब्बे (स्या. कं. पी.)].

जीवितिन्द्रियकथा निट्ठिता.