(६४) २. सम्पयुत्तकथा

४७३. नत्थि केचि धम्मा केहिचि धम्मेहि सम्पयुत्ताति? आमन्ता. ननु अत्थि केचि धम्मा केहिचि धम्मेहि सहगता सहजाता संसट्ठा एकुप्पादा एकनिरोधा एकवत्थुका एकारम्मणाति? आमन्ता. हञ्चि अत्थि केचि धम्मा केहिचि धम्मेहि सहगता सहजाता संसट्ठा एकुप्पादा एकनिरोधा एकवत्थुका एकारम्मणा, नो च वत रे वत्तब्बे – ‘‘नत्थि केचि धम्मा केहिचि धम्मेहि सम्पयुत्ता’’ति.

वेदनाक्खन्धो सञ्ञाक्खन्धेन सहजातोति? आमन्ता. हञ्चि वेदनाक्खन्धो सञ्ञाक्खन्धेन सहजातो, तेन वत रे वत्तब्बे – ‘‘वेदनाक्खन्धो सञ्ञाक्खन्धेन सम्पयुत्तो’’ति.

वेदनाक्खन्धो सङ्खारक्खन्धेन… विञ्ञाणक्खन्धेन सहजातोति? आमन्ता. हञ्चि वेदनाक्खन्धो विञ्ञाणक्खन्धेन सहजातो, तेन वत रे वत्तब्बे – ‘‘वेदनाक्खन्धो विञ्ञाणक्खन्धेन सम्पयुत्तो’’ति.

सञ्ञाक्खन्धो … सङ्खारक्खन्धो… विञ्ञाणक्खन्धो वेदनाखन्धेन… सञ्ञाक्खन्धेन… सङ्खारक्खन्धेन सहजातोति? आमन्ता. हञ्चि विञ्ञाणक्खन्धो सङ्खारक्खन्धेन सहजातो, तेन वत रे वत्तब्बे – ‘‘विञ्ञाणक्खन्धो सङ्खारक्खन्धेन सम्पयुत्तो’’ति.

४७४. यथा तिलम्हि तेलं अनुगतं अनुपविट्ठं, उच्छुम्हि रसो अनुगतो अनुपविट्ठो; एवमेव ते धम्मा तेहि धम्मेहि अनुगता अनुपविट्ठाति? न हेवं वत्तब्बे…पे….

सम्पयुत्तकथा निट्ठिता.