(६३) १. सङ्गहितकथा

४७१. नत्थि केचि धम्मा केहिचि धम्मेहि सङ्गहिताति [सङ्गहीताति (पी.)]? आमन्ता. ननु अत्थि केचि धम्मा केहिचि धम्मेहि गणनं गच्छन्ति उद्देसं गच्छन्ति परियापन्नाति? आमन्ता. हञ्चि अत्थि केचि धम्मा केहिचि धम्मेहि गणनं गच्छन्ति उद्देसं गच्छन्ति परियापन्ना, नो च वत रे वत्तब्बे – ‘‘नत्थि केचि धम्मा केहिचि धम्मेहि सङ्गहिता’’ति.

चक्खायतनं कतमक्खन्धगणनं [कतमं खन्धगणनं (सी. पी. क.)] गच्छतीति? रूपक्खन्धगणनं गच्छतीति. हञ्चि चक्खायतनं रूपक्खन्धगणनं गच्छति, तेन वत रे वत्तब्बे – ‘‘चक्खायतनं रूपक्खन्धेन सङ्गहित’’न्ति. सोतायतनं…पे… घानायतनं…पे… जिव्हायतनं…पे… कायायतनं कतमक्खन्धगणनं गच्छतीति? रूपक्खन्धगणनं गच्छतीति. हञ्चि कायायतनं रूपक्खन्धगणनं गच्छति, तेन वत रे वत्तब्बे – ‘‘कायायतनं रूपक्खन्धेन सङ्गहित’’न्ति.

रूपायतनं…पे… सद्दायतनं…पे… गन्धायतनं…पे… रसायतनं…पे… फोट्ठब्बायतनं कतमक्खन्धगणनं गच्छतीति? रूपक्खन्धगणनं गच्छतीति. हञ्चि फोट्ठब्बायतनं रूपक्खन्धगणनं गच्छति, तेन वत रे वत्तब्बे – ‘‘फोट्ठब्बायतनं रूपक्खन्धेन सङ्गहित’’न्ति.

सुखा वेदना कतमक्खन्धगणनं गच्छतीति? वेदनाक्खन्धगणनं गच्छतीति. हञ्चि सुखा वेदना वेदनाक्खन्धगणनं गच्छति, तेन वत रे वत्तब्बे – ‘‘सुखा वेदना वेदनाक्खन्धेन सङ्गहिता’’ति. दुक्खा वेदना…पे… अदुक्खमसुखा वेदना कतमक्खन्धगणनं गच्छतीति? वेदनाक्खन्धगणनं गच्छतीति. हञ्चि अदुक्खमसुखा वेदना वेदनाक्खन्धगणनं गच्छति, तेन वत रे वत्तब्बे – ‘‘अदुक्खमसुखा वेदना वेदनाक्खन्धेन सङ्गहिता’’ति.

चक्खुसम्फस्सजा सञ्ञा कतमक्खन्धगणनं गच्छतीति? सञ्ञाक्खन्धगणनं गच्छतीति. हञ्चि चक्खुसम्फस्सजा सञ्ञा सञ्ञाक्खन्धगणनं गच्छति, तेन वत रे वत्तब्बे – ‘‘चक्खुसम्फस्सजा सञ्ञा सञ्ञाक्खन्धेन सङ्गहिता’’ति. सोतसम्फस्सजा सञ्ञा…पे… मनोसम्फस्सजा सञ्ञा कतमक्खन्धगणनं गच्छतीति? सञ्ञाक्खन्धगणनं गच्छतीति. हञ्चि मनोसम्फस्सजा सञ्ञा सञ्ञाक्खन्धगणनं गच्छति, तेन वत रे वत्तब्बे – ‘‘मनोसम्फस्सजा सञ्ञा सञ्ञाक्खन्धेन सङ्गहिता’’ति.

चक्खुसम्फस्सजा चेतना…पे… मनोसम्फस्सजा चेतना कतमक्खन्धगणनं गच्छतीति? सङ्खारक्खन्धगणनं गच्छतीति. हञ्चि मनोसम्फस्सजा चेतना सङ्खारक्खन्धगणनं गच्छति, तेन वत रे वत्तब्बे – ‘‘मनोसम्फस्सजा चेतना सङ्खारक्खन्धेन सङ्गहिता’’ति.

चक्खुविञ्ञाणं …पे… मनोविञ्ञाणं कतमक्खन्धगणनं गच्छतीति? विञ्ञाणक्खन्धगणनं गच्छतीति. हञ्चि मनोविञ्ञाणं विञ्ञाणक्खन्धगणनं गच्छति, तेन वत रे वत्तब्बे – ‘‘मनोविञ्ञाणं विञ्ञाणक्खन्धेन सङ्गहित’’न्ति.

४७२. यथा दामेन वा योत्तेन वा द्वे बलिबद्दा सङ्गहिता, सिक्काय पिण्डपातो सङ्गहितो, सा गद्दुलेन सङ्गहितो; एवमेव ते धम्मा तेहि धम्मेहि सङ्गहिताति [सकवादिवचनं (अट्ठकथा पस्सितब्बा)]? हञ्चि दामेन वा योत्तेन वा द्वे बलीबद्दा सङ्गहिता, सिक्काय पिण्डपातो सङ्गहितो, सा गद्दुलेन सङ्गहितो, तेन वत रे वत्तब्बे – ‘‘अत्थि केचि धम्मा केहिचि धम्मेहि सङ्गहिता’’ति [सकवादिवचनं (अट्ठकथा पस्सितब्बा)].

सङ्गहितकथा निट्ठिता.