(५९) ७. आकासो सनिदस्सनोतिकथा

४६३. आकासो सनिदस्सनोति? आमन्ता. रूपं रूपायतनं रूपधातु नीलं पीतकं लोहितकं ओदातं चक्खुविञ्ञेय्यं चक्खुस्मिं पटिहञ्ञति चक्खुस्स आपाथं आगच्छतीति? न हेवं वत्तब्बे…पे….

आकासो सनिदस्सनोति? आमन्ता. चक्खुञ्च पटिच्च आकासञ्च उप्पज्जति चक्खुविञ्ञाणन्ति? न हेवं वत्तब्बे …पे….

चक्खुञ्च पटिच्च आकासञ्च उप्पज्जति चक्खुविञ्ञाणन्ति? आमन्ता. ‘‘चक्खुञ्च पटिच्च आकासञ्च उप्पज्जति चक्खुविञ्ञाण’’न्ति – अत्थेव [अत्थि (?)] सुत्तन्तोति? नत्थि. ‘‘चक्खुञ्च पटिच्च रूपे च उप्पज्जति चक्खुविञ्ञाण’’न्ति [म. नि. १.४००; ३.४२१; सं. नि. ४.६०] – अत्थेव सुत्तन्तोति? आमन्ता. हञ्चि ‘‘चक्खुञ्च पटिच्च रूपे च उप्पज्जति चक्खुविञ्ञाण’’न्ति – अत्थेव सुत्तन्तो, नो च वत रे वत्तब्बे – ‘‘चक्खुञ्च पटिच्च आकासञ्च उप्पज्जति चक्खुविञ्ञाण’’न्ति.

४६४. न वत्तब्बं – ‘‘आकासो सनिदस्सनो’’ति? आमन्ता. ननु पस्सति द्विन्नं रुक्खानं अन्तरं, द्विन्नं थम्भानं अन्तरं, ताळच्छिद्दं वातपानच्छिद्दन्ति? आमन्ता. हञ्चि पस्सति द्विन्नं रुक्खानं अन्तरं, द्विन्नं थम्भानं अन्तरं, ताळच्छिद्दं वातपानच्छिद्दं, तेन वत रे वत्तब्बे – ‘‘आकासो सनिदस्सनो’’ति.

आकासो सनिदस्सनोतिकथा निट्ठिता.