२. दुतियवग्गो

(१५) ६. दुक्खाहारकथा

३३४. दुक्खाहारो मग्गङ्गं मग्गपरियापन्नन्ति? आमन्ता. ये केचि दुक्खन्ति वाचं भासन्ति, सब्बे ते मग्गं भावेन्तीति? न हेवं वत्तब्बे.

ये केचि दुक्खन्ति वाचं भासन्ति, सब्बे ते मग्गं भावेन्तीति? आमन्ता. बालपुथुज्जना दुक्खन्ति वाचं भासन्ति, बालपुथुज्जना मग्गं भावेन्तीति? न हेवं वत्तब्बे. मातुघातको… पितुघातको… अरहन्तघातको… रुहिरुप्पादको [लोहितुप्पादको (सी. क.) अञ्ञट्ठानेसु पन रुहिरुप्पादकोत्वेव दिस्सति] … सङ्घभेदको दुक्खन्ति वाचं भासति, सङ्घभेदको मग्गं भावेतीति? न हेवं वत्तब्बे…पे….

दुक्खाहारकथा निट्ठिता.