३. ततियपाटिदेसनी सिक्खापुच्छा

पुच्छा – सेक्खसम्मतेसु आवुसो कुलेसु खादनीयं वा भोजनीयं वा सहत्था पटिग्गहेत्वा भुञ्जन्तस्स पाटिदेसनीयं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते सम्बहुले भिक्खू आरब्भ पञ्ञत्तं, सम्बहुला भन्ते भिक्खू नमत्तं जानित्वा पटिग्गहेसुं, तस्मिं भन्ते वत्थुस्मिं पञ्ञत्तं.

सेखियकण्ड

पुच्छा – अनादरियं आवुसो पटिच्च पुरतो वा पच्छतो वा ओलम्बेन्तेन निवासेन्तस्सच पारुपन्तस्सच दुक्कटं कत्थ पञ्ञत्तं, कं आरब्भ किस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू पुरतो च पच्छतो च ओलम्बन्ता निवासेसुंचेव पारुपिंसुच, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च कायं विवरित्वा अन्तरघरे गच्छन्तस्स च निसीदन्तस्स च दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गीये भिक्खू आरब्भ पञ्ञत्तं, छब्बग्गिया भन्ते भिक्खू कायं विवरित्वा अन्तरघरे गच्छिंसु चेव निसीदिंसुच, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च हत्थं वा पादं वा कीळापेन्तेन अन्तरघरे गच्छन्तस्स च निसीदन्तस्स च, तहं तहं ओलोकेन्तेन अन्तरघरे गच्छन्तस्स च निसीदन्तस्स च, उक्खित्तकाय अन्तरघरे गच्छन्तस्स च निसीदन्तस्स च दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू हत्थम्पि पादम्पि कीळापेन्ता तहं तहंपि ओलोकेन्ता अन्तरघरे गच्छिंसुचेव निसीदिंसु च, तेयेव भन्ते छब्बग्गिया भिक्खू उक्खित्तकाय अन्तरघरे गच्छिंसुचेव निसीदिंसुच, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च उज्जग्घिकाय वा उच्चासद्दं महासद्दं करोन्तेन वा अन्तरघरे गच्छन्तस्सच निसीदन्तस्सच दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू महाहसितं हसन्ता च उच्चासद्दं महासद्दं करोन्ता च अन्तरघरे गच्छिंसुचेव निसीदिंसुच, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च कायप्पचालकं वा बाहुप्प चालकं वा सीसप्पचालकं वा खम्भकतेन वा ओगुण्ठितेन वा अन्तरघरे गच्छन्तस्स च निसीदन्तस्स च उक्कुटिकाय किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू कायप्पचालकं बाहुप्पचालकं सीसप्पचालकं करोन्ता च खम्भीकता च ओगुण्ठिता च अन्तरघरे गच्छिंसुचेव निसीदिंसुच, उक्कुटिकायच अन्तरघरे गच्छिंसु, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च पल्लत्थिकाय अन्तरघरे निसिन्नस्स दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू पल्लत्थिकाय अन्तरघरे निसीदिंसु, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च असक्कच्चं पिण्डपातं पटिग्गण्हन्तस्स च तहं तहं ओलोकेन्तेन पिण्डपातं पटिग्गण्हन्तस्सच सूपञ्ञेव बहुं पटिग्गण्हन्तस्सच थूपीकतं पिण्डपातं पटिग्गण्हन्तस्सच दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू असक्कच्चं पिण्डपातं पटिग्गहेसुं, तहं तहं ओलोकेन्ता पिण्डपातं पटिग्गहेसुं, सूपञ्ञेव बहुं पटिग्गहेसुं, थूपीकतं पिण्डपातं पटिग्गहेसुं, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च आसक्कच्चं पिण्डपातं भुञ्जन्तस्सच तहं तहं ओलोकेन्तन पिण्डपातं भुञ्जन्तस्स च तहं तहं ओमसित्वा पिण्डपातं भुञ्जन्तस्स च सूपञ्ञेव बहुं भुञ्जन्तस्स च थूपकतो ओमद्दित्वा पिण्डपातं भुञ्जन्तस्स च सूपं वा ब्यञ्जनं वा ओदनेन पटिच्छादेन्तस्स च दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू असक्कच्चं पिण्डपातं भुञ्जिंसु, तहं तहं ओलोकेन्ता पिण्डपातं भुञ्जिंसु, तेयेव भन्ते छब्बग्गिया भिक्खू तहं तहं ओमसित्वा पिण्डपातं भुञ्जिंसु, तेयेव भन्ते छब्बग्गिया भिक्खू बहुं सूपं भुञ्जिंसु, तेयेव भन्ते छब्बग्गिया भिक्खू थूपकतो ओमद्दित्वा पिण्डपातं भुञ्जिंसु, तेयेव भन्ते छब्बग्गिया भिक्खू सूपम्पि ब्यञ्जनम्पि ओदनेन पटिच्छादेसुं, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च सूपंवा ओदनंवा अगिलानेन अत्तनो अत्थाय विञ्ञापेत्वा भुञ्जन्तस्स दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू सूपम्पि ओदनम्पि अत्तनो अत्थाय विञ्ञापेत्वा भुञ्जिंसु, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च उज्झानसञ्ञिना परेसं पत्तं ओलोकेन्तस्स च अतिमहन्तं कबळं करोन्तस्स च दीघं आलोपं करोन्तस्स च दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू उज्झानसञ्ञिनो परेसं पत्तं ओलोकेसुं, तेयेव भन्ते छब्बग्गिया भिक्खू अतिमहन्तं कबळं करिंसु, तेयेव भन्ते छब्बग्गिया भिक्खू दीघं आलोपं करिंसु, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च अनाहटे कबळे मुखद्वारं विवरन्तस्स च भुञ्जमाने सब्बं हत्थं मुखे पक्खिपन्तस्स च सकबळेन मुखेन ब्याहरन्तस्स च पिण्डुक्खेपकं पिण्डपातं भुञ्जन्तस्स च कबळावच्छेदकं पिण्डपातं भुञ्जन्तस्स च अवगण्डकारकं पिण्डपातं भुञ्जन्तस्स च हत्थनिद्धुनकं सित्थावकारकं जिव्हानिच्छारकं चपुचपुकारकं पिण्डपातं भुञ्जन्तस्स च दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू अनाहटे कबळे मुखद्वारं विवरिंसु, भुञ्जमाना सब्बं हत्थं मुखे पक्खिपिंसु, सकबळेन मुखेन ब्याहरिंसु, पिण्डुक्खेपकं भुञ्जिंसु, कबळावच्छेदकं भुञ्जिंसु, अवगण्डकारकं भुञ्जिंसु, हत्थनिद्धुनकं सित्थावकारकं जिव्हानिच्छारकं चपुचपुकारकं भुञ्जिंसु, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च सुरुसुरुकारकं भुञ्जन्तस्सच हत्थनिल्लेहकंवा पत्तनिल्लेहकं वा ओट्ठनिल्लेहकं वा भुञ्जन्तस्स च सामिसेन हत्थेन पानीयथालकं पटिग्गण्हन्तस्स च ससित्थकं पत्तधोवनं अन्तरघरे चड्डेन्तस्स च दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सुरु सुरुकारकं भन्ते भुञ्जन्तस्स दुक्कटं कोसम्बियं पञ्ञत्तं, सम्बहुले भन्ते भिक्खू आरब्भ पञ्ञत्तं, सम्बहुला भन्ते भिक्खू सुरुसुरुकारकं खीरं पिविंसु, तस्मिं भन्ते वत्थुस्मिं पञ्ञत्तं. हत्थनिल्लेहकं भुञ्जन्तस्स च पत्तनिल्लेहकं भुञ्जन्तस्स च ओट्ठनिल्लेहकं भुञ्जन्तस्स दुक्कटं सावत्थियं पञ्ञत्तं, छब्बग्गिये भन्ते भिक्खू आरब्भ पञ्ञत्तं, छब्बग्गिया भन्ते भिक्खू हत्थनिल्लेहकं भुञ्जिंसु, पत्तनिल्लेहकं भुञ्जिंसु, ओट्ठनिल्लेहकं भुञ्जिंसु, तस्मिं भन्ते वत्थुस्मिं पञ्ञत्तं.

सामिसेन हत्थेन पानीयथालकं पटिग्गण्हन्तस्स च ससित्थकं पत्तधोवनं अन्तरघरे छड्डेन्तस्स च दुक्कटं भग्गेसु पञ्ञत्तं, सम्बहुले भिक्खू आरब्भ पञ्ञत्तं, सम्बहुला भिक्खू सामिसेन हत्थेन पानीयथालकं पटिग्गहेसुं, तेयेव भन्ते सम्बहुला भिक्खू ससित्थकं पत्तधोवनं अन्तरघरे छड्डेसुं, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च छत्तपाणिस्स धम्मं देसेन्तस्स च दण्डपाणिस्स वा सत्थपाणिस्स वा आवुधपाणिस्स वा धम्मं देसेन्तस्स च दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू छत्तपाणिस्स दण्डपाणिस्स सत्थपाणिस्स आवुधपाणिस्स धम्मं देसेसुं, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च पादुकारुळ्हस्स च उपहनारुळ्हस्स च यानगतस्स च सयनगतस्स च धम्मं देसेन्तस्स दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू पादुकारुळ्हस्स उपहनारुळ्हस्स यानगतस्स सयनगतस्स धम्मं देसेसुं, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च पल्लत्थिकाय निसिन्नस्स च वेठितसीसस्स च ओगुण्ठितसीसस्स च छमायं निसीदित्वा आसने निसिन्नस्स च नीचे आसने निसीदित्वा उच्चे आसने निसिन्नस्स च ठितेन निसिन्नस्स च पच्छतो गच्छन्तेन पुरतो गच्छन्तस्स च उप्पथेन गच्छन्तेन पथेन गच्छन्तस्स च धम्मं देसेन्तस्स दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गियेव भिक्खू आरब्भ पञ्ञत्तं, छब्बग्गिया भन्ते भिक्खू पल्लत्थिकाय निसिन्नस्स च वेठितसीसस्स च ओगुण्ठितसीसस्स च छमायं निसीदित्वा आसने निसिन्नस्स च नीचे आसने निसीदित्वा उच्चे आसने निसिन्नस्स च ठितानिसिन्नस्स च पच्छतो गच्छन्ता पुरतो गच्छन्तस्स च उप्पथेन गच्छन्ता पथेन गच्छन्तस्स च धम्मं देसेसुं, तस्मिं भन्ते वत्थुस्मिं पञ्ञत्तं.

पुच्छा – अनादरियं आवुसो पटिच्च ठितेन उच्चारं वा पस्सावं वा करोन्तस्स च हरिते वा उदके वा उच्चारं वा पस्सावं वा खेळं वा करोन्तस्स च दुक्कटं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गियेव भिक्खू आरब्भ पञ्ञत्तं, छब्बग्गिया भन्ते भिक्खू ठिता उच्चारम्पि पस्सावम्पि अकंसु, तेयेव भन्ते छब्बग्गिया भिक्खू हरितेपि उदकेपि उच्चारम्पि पस्सावम्पि खेळम्पि अकंसु, तस्मिं भन्ते वत्थुस्मिं पञ्ञत्तं.