भिक्खुनीविभङ्ग

५. पञ्चम पाराजिक सिक्खापुच्छा

पुच्छा – भिक्खुनीनं आवुसो पञ्चम पाराजिकं कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते सुन्दरीनन्दं भिक्खुनिं आरब्भ पञ्ञत्तं, सुन्दरीनन्दा भन्ते भिक्खुनी अवस्सुता अवस्सुतस्स पुरिसपुग्गलस्स कायसंसग्गं सादियि, तस्मिं भन्ते वत्थुस्मिं पञ्ञत्तं.

भिक्खुनीविभङ्ग, सङ्घादिसेस सिक्खापुच्छा

पुच्छा – उस्सयवादिकाय आवुसो भिक्खुनिया अड्डं करोन्तिया सङ्घादिसेसो कत्थ पञ्ञत्तो, कं आरब्भ किस्मिं वत्थुस्मिं पञ्ञत्तो.

विस्सज्जना – सावत्थियं भन्ते तुल्लनन्दं भिक्खुनिं आरब्भ पञ्ञत्तो, थुल्लनन्दा भन्ते भिक्खुनी उस्सयवादिका विहरि, तस्मिं भन्ते वत्थुस्मिं पञ्ञत्तो.

पुच्छा – चोरिं आवुसो वुट्ठापेन्तिया सङ्घादिसेसो कत्थ पञ्ञत्तो, कं आरब्भ किस्मिं वत्थुस्मिं पञ्ञत्तो.

विस्सज्जना – सावत्थियं भन्ते थुल्लनन्दं भिक्खुनिं आरब्भ पञ्ञत्तो, थुल्लनन्दा भन्ते भिक्खुनी चोरिं वुट्ठापेसि, तस्मिं भन्ते वत्थुस्मिं पञ्ञत्तो.

पुच्छा – एकाय आवुसो गामन्तरं गच्छन्तिया सङ्घादिसेसो कत्थ पञ्ञत्तो, कं आरब्भ किस्मिं वत्थुस्मिं पञ्ञत्तो.

विस्सज्जना – सावत्थियं भन्ते अञ्ञतरं भिक्खुनिं आरब्भ पञ्ञत्तो, अञ्ञतरा भन्ते भिक्खुनी एका गामन्तरं गच्छि, तस्मिं भन्ते वत्थुस्मिं पञ्ञत्तो.

पुच्छा – अवस्सुताय आवुसो भिक्खुनिया अवस्सुतस्स पुरिसपुग्गलस्स हत्थतो खादनीयंवा भोजनीयंवा सहत्था पटिग्गहेत्वा भुञ्जन्तस्स सङ्घादिसेसो कत्थ पञ्ञत्तो, कं आरब्भ किस्मिं वत्थुस्मिं पञ्ञत्तो.

विस्सज्जना – सावत्थियं भन्ते सुन्दरीनन्दं भिक्खुनिं आरब्भ पञ्ञत्तो, सुन्दरीनन्दा भन्ते भिक्खुनी अवस्सुता अवस्सुतस्स पुरिसपुग्गलस्स हत्थतो आमिसं पटिग्गहेसि तस्मिं भन्ते वत्थुस्मिं पञ्ञत्तो.

पुच्छा – कुपिताय आवुसो अनत्तमनाय भिक्खुनिया यावततियं समनुभासन्तिया न पटिनिसज्जन्तिया सङ्घादिसेसो कत्थ पञ्ञत्तो, कं आरब्भ किस्मिं वत्थुस्मिं पञ्ञत्तो.

विस्सज्जना – सावत्थियं भन्ते चण्डकाळिं भिक्खुनिं आरब्भ पञ्ञत्तो, चण्डकाळी भन्ते भिक्खुनी कुपिता अनत्तमना एवं अभणि, बुद्धं पच्चाचिक्खामि, धम्मं पच्चाचिक्खामि, सङ्घं पच्चाचिक्खामि, सिक्खं पच्चाचिक्खामि, किन्नुमाव समणियो या समणियो सक्यधीतरो, सन्तञ्ञापि समणियो लज्जिनियो कुक्कुच्चिका सिक्खाकामा, तासाहं सन्तिके ब्रह्मचरियं चरिस्सामीति, तस्मिं भन्ते वत्थुस्मिं पञ्ञत्तो.

पुच्छा – कस्स आवुसो वचनं.

विस्सज्जना – भगवतो भन्ते वचनं अरहतो सम्मासम्बुद्धस्स.

पुच्छा – केनावुसो आभतं.

विस्सज्जना – परम्पराय भन्ते आभतं.

पुच्छा – अत्थि नुखो आवुसो एत्थ कोचिपि विरद्धदोसो.

विस्सज्जना – नत्थि भन्ते.