२. कोसियवग्ग ४. छब्बस्स सिक्खापुच्छा

पुच्छा – यं तेन आवुसो भगवता…पे… सम्मासम्बुद्धेन अनुवस्सं कारापेन्तस्स निस्सग्गियं पाचित्तियं कत्थ पञ्ञत्तं.

विस्सज्जना – सावत्थियं भन्ते पञ्ञत्तं.

पुच्छा – कं आवुसो आरब्भ किस्मिं वत्थुस्मिं पञ्ञत्तं.

विस्सज्जना – सम्बहुले भन्ते भिक्खू आरब्भ पञ्ञत्तं, सम्बहुला भन्ते भिक्खू अनुवस्सं सन्थतं कारापेसुं, तस्मिं भन्ते वत्थुस्मिं पञ्ञत्तं.

पुच्छा – कस्स आवुसो वचनं.

विस्सज्जना – भगवतो भन्ते वचनं अरहतो सम्मासम्बुद्धस्स.

पुच्छा – केनावुसो आभतं.

विस्सज्जना – परम्पराय भन्ते आभतं.

पुच्छा – अत्थि नुखो आवुसो एत्थ कोचि विरद्धदोसो.

विस्सज्जना – नत्थि भन्ते.

संगायनत्थाय सङ्घस्स ञापनं

सुणातु मे भन्ते सङ्घो, अहं आयस्मन्तं विचित्तसाराभिवंसं तिपिटकधर धम्मभण्डागारिकं इमेसं निस्सग्गियपाचित्तियसिक्खापदानं याव छब्बस्ससिक्खापदं निदानादीनि पुच्छितब्बानि अनेकानि ठानानि पुच्छिं, पुट्ठोपुट्ठो च सो आयस्मा विचित्तसाराभिवंसो विस्सज्जेसि, इतिहिदं भन्ते इमानि सिक्खापदानि निम्मलानि सुपरिसुद्धानी तस्सेव भगवतो वचनानि अरहतो सम्मासम्बुद्धस्स, तस्मा यथापुरे महाकस्सपादयो महाथेरवरा पोराणसंगीतिकारा ब्रह्मचरियस्स चिरट्ठितिया बहुजनहिताय बहुजनसुखाय लोकानुकम्पाय अत्थाय हिताय सुखाय देवमनुस्सानं धम्मविनयं संगायिंसु चेव अनुसंगायिंसु च, एवमेव मयम्पि दानि सब्बेव छट्ठसंगीति महाधम्मसभा परियापन्ना छब्बस्स निस्सग्गिय सिक्खापदतो पट्ठाय इमानि निस्सग्गियसिक्खापदानि एकतो गणसज्झायं कत्वा संहायेय्याम.