२. कोसियवग्ग ८. रूपिय सिक्खापुच्छा

पुच्छा – रूपियं आवुसो पटिग्गण्हन्तस्स निस्सग्गियं पाचित्तियं भगवता कत्थ पञ्ञत्तं.

विस्सज्जना – राजगहे भन्ते पञ्ञत्तं.

पुच्छा – कं आवुसो आरब्भ किस्मिं वत्थुस्मिं पञ्ञत्तं.

विस्सज्जना – आयस्मन्तं भन्ते उपनन्दं सक्यपुत्तं आरब्भ पञ्ञत्तं, आयस्मा भन्ते उपनन्दो सक्यपुत्तो रूपियं पटिग्गहेसि, तस्मिं भन्ते वत्थुस्मिं पञ्ञत्तं.

पुच्छा – कथं आवुसो तत्थ पटिपज्जन्तो रूपियं पटिग्गण्हाति नाम.

विस्सज्जना – सयं भन्ते गण्हाति, अञ्ञं वा गण्हापेसि, इदं अय्यस्स होतूति उपनिक्खित्तं सादियति, एवं खो भन्ते पटिपज्जन्तो भिक्खु रूपियं पटिग्गण्हाति नाम.

पुच्छा – कथं आवुसो तत्थ पटिपज्जन्तो भिक्खु रूपियं न पटिग्गण्हाति नाम.

विस्सज्जना – यथा भन्ते राजसिक्खापदे यथा च भन्ते मेण्डकसिक्खापदे आगच्छति, तथा भन्ते पटिपज्जन्तो भिक्खु रूपियं न पटिग्गण्हातिनाम.