२. कोसियवग्ग ९. रूपियसंवोहार सिक्खापुच्छा

पुच्छा – रूपियसंवोहारं आवुसो समापज्जन्तस्स निस्सग्गियं पाचित्तियं भगवता कत्थ पञ्ञत्तं.

विस्सज्जना – सावत्थियं भन्ते पञ्ञत्तं.

पुच्छा – कं आवुसो आरब्भ किस्मिं वत्थुस्मिं पञ्ञत्तं.

विस्सज्जना – छब्बग्गिये भन्ते भिक्खू आरब्भ पञ्ञत्तं, छब्बग्गिया भन्ते भिक्खू नानप्पकारकं रूपियसंवोहारं समापज्जिंसु, तस्मिं भन्ते वत्थुस्मिं पञ्ञत्तं.

२. कोसियवग्ग, १०. कयविक्कय सिक्खापुच्छा

पुच्छा – नानप्पकारकं आवुसो कयविक्कयं आपज्जन्तस्स निस्सग्गियं पाचित्तियं भगवता कत्थ पञ्ञत्तं.

विस्सज्जना – सावत्थियं भन्ते पञ्ञत्तं.

पुच्छा – कं आवुसो आरब्भ किस्मिं वत्थुस्मिं पञ्ञत्तं.

विस्सज्जना – आयस्मन्तं भन्ते उपनन्दं सक्यपुत्तं आरब्भ पञ्ञत्तं, आयस्मा भन्ते उपनन्दो सक्यपुत्तो परिब्बाजकेन सद्धि कयविक्कयं समापज्जि, तस्मिं भन्ते वत्थुस्मिं पञ्ञत्तं.

पुच्छा – कथं आवुसो तत्थ पटिपज्जन्तो भिक्खु कयविक्कयं समापज्जतिनाम.

विस्सज्जना – इमिना इमं देहि इमिना इमं आहर इमिना इमं परिवत्तेहि इमिना इमं चेतामेहीति अज्झाचरति, एवं खो भन्ते पटिपज्जन्तो कयविक्कयं समापज्जतिनाम.

पुच्छा – कथं आवुसो तत्थ पटिपज्जन्तो भिक्खु न कयविक्कयं समापज्जतिनाम.

विस्सज्जना – यो भन्ते अग्घं पुच्छति, यो च भन्ते कप्पियकारकस्स आचिक्खति, यो च भन्ते अम्हाकञ्च इदं अत्थि अम्हाकञ्च इमिना च इमिना च अत्थोति भणति, एवं खो भन्ते पटिपज्जन्तो भिक्खु न कयविक्कयं समापज्जतिनाम.