२. कोसियवग्ग ७. एळकलोमधोवापन सिक्खापुच्छा

पुच्छा – अञ्ञातिकाय आवुसो भिक्खुनिया एळकलोमानि धोवापेन्तस्स निस्सग्गियं पाचित्तियं कत्थ पञ्ञत्तं.

विस्सज्जना – सक्केसु भन्ते पञ्ञत्तं.

पुच्छा – कं आवुसो आरब्भ किस्मिं वत्थुस्मिं पञ्ञत्तं.

विस्सज्जना – छब्बग्गिये भन्ते भिक्खू आरब्भ पञ्ञत्तं, छब्बग्गिया भन्ते भिक्खू अञ्ञातिकाहि भिक्खूनीहि एळकलोमानि धोवापेसुं, तस्मिं भन्ते वत्थुस्मिं पञ्ञत्तं.