११. भेदानुवत्तक सिक्खापुच्छा

पुच्छा – यं तेन आवुसो भगवता…पे… सम्मासम्बुद्धेन भेदानुवत्तकानं भिक्खूनं यावततियं समनुभासनाय अप्पटिनिस्सज्जन्तानं सङ्घादिसेसो कत्थ पञ्ञत्तो.

विस्सज्जना – राजगहे भन्ते पञ्ञत्तो.

पुच्छा – कं आवुसो आरब्भ किस्मिं वत्थुस्मिं पञ्ञत्तो.

विस्सज्जना – सम्बहुले भन्ते भिक्खू आरब्भ पञ्ञत्तो, सम्बहुला भन्ते भिक्खू देवदत्तस्स सङ्घाभेदाय परक्कमन्तस्स अनुवत्तका अहेसुं वग्गवादका, तस्मिं भन्ते वत्थुस्मिं पञ्ञत्तो.