१०. भिक्खुनिक्खन्धक

पुच्छा – अट्ठहि आवुसो गरुधम्मेहि उपसम्पदा भगवता कत्थ अनुञ्ञाता, कस्स अनुञ्ञाता, किस्मिञ्च वत्थुस्मिं अनुञ्ञाता.

विस्सज्जना – वेसालियं भन्ते महापजापतिया गोतमिया अनुञ्ञाता, महापजापति भन्ते गोतमी सूनेहि पादेहि रजोकिण्णेन गत्तेन दुक्खी दुम्मना अस्सुमुखी रुदमाना बहिद्वारकोट्ठके अट्ठासि, अथ खो भन्ते आयस्मा आनन्दो महापजापतिं गोतमिं तं कारणं पुच्छित्वा भगवन्तं चतुक्खत्तुं याचि मातुगामस्स तथागतप्पवेदिते धम्मविनये आगारस्मा अनागारियं पब्बज्जं, तस्मिं भन्ते वत्थुस्मिं अनुञ्ञाता.

पुच्छा – भिक्खूहि आवुसो भिक्खुनियो उपसम्पादेतुं भगवता कत्थ अनुञ्ञातं, कं आरब्भ किस्मिं वत्थुस्मिं अनुञ्ञातं.

विस्सज्जना – वेसालियं भन्ते महापजापतिं गोतमिं आरब्भ अनुञ्ञातं, महापजापति भन्ते गोतमी भगवन्तं एतदवोच ‘‘कथाहं भन्ते इमासु साकियानीसु पटिपज्जामी’’ति, तस्मिं भन्ते वत्थुस्मिं अनुञ्ञातं.

पुच्छा – एकतो उपसम्पन्नाय आवुसो भिक्खुनिसङ्घे विसुद्धाय भिक्खुसङ्घे उपसम्पादेतुं भगवता कत्थ अनुञ्ञातं, कं आरब्भ किस्मिं वत्थुस्मिं अनुञ्ञातं.

विस्सज्जना – सावत्थियं भन्ते सम्बहुले भिक्खू आरब्भ अनुञ्ञातं, सम्बहुला भन्ते भिक्खू भिक्खुनीनं अन्तरायिके धम्मे पुच्छिंसु, उपसम्पदापेक्खायो वित्थायिंसु, मङ्कू अहेसुं, न सक्खिंसु विस्सज्जेतुं, तस्मिं भन्ते वत्थुस्मिं अनुञ्ञातं.

पुच्छा – भिक्खुनिक्खन्धकं पुच्छिस्सं, सनिदानं सनिद्देसं. समुक्कट्ठपदानं आवुसो कति आपत्तियो.

विस्सज्जना – भिक्खुनिक्खन्धकं विस्सज्जिस्सं, सनिदानं सनिद्देसं. समुक्कट्ठपदानं भन्ते द्वे आपत्तियो.