५. चम्मक्खन्धक

सोणमथेर वत्थु

पुच्छा – उपाहनं आवुसो भगवता कत्थ अनुञ्ञातं, कं आरब्भ किस्मिं वत्थुस्मिं अनुञ्ञातं.

विस्सज्जना – राजगहे भन्ते आयस्मन्तं सोणं आरब्भ अनुञ्ञातं, आयस्मतो भन्ते सोणस्स अच्चारद्धवीरियस्स चङ्कमतो पादा भिज्जिंसु, चङ्कमो लोहितेन फुटो अहोसि, तस्मिं भन्ते वत्थुस्मिं अनुञ्ञातं.

पुच्छा – सब्बनीलिका वा आवुसो सब्बपीतिका वा सब्बलोहितिका वा सब्बमञ्जिट्ठिका वा सब्बकण्हा वा सब्बमहारङ्गरत्ता वा सब्बमहानामरत्ता वा उपाहनायो धारेन्तस्स दुक्कटं भगवता कत्थ कं आरब्भ किस्मिं वत्थुस्मिं पञ्ञत्तं.

विस्सज्जना – राजगहे भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू सब्बनीलिकायो उपाहनायो धारेसुं, सब्बपीतिकायो सब्बलोहितिकायो सब्बमञ्जिट्ठिकायो सब्बकण्हायो सब्बमहारङ्गरत्ता सब्बमहानामरत्तायोपि उपाहनायो धारेसुं, तस्मिं भन्ते वत्थुस्मिं पञ्ञत्तं.

पुच्छा – खल्लकबन्धा वा आवुसो पुटबन्धा वा पालिगुण्ठिमा वा तूलपुण्णिका वा तित्तिरपत्तिका वा मेण्डविसाणवद्धिका वा अजविसाणवद्धिका वा विच्छिकाळिका वा मोरपिञ्छ परिसिब्बिका वा चित्रा वा उपाहनायो धारेन्तस्स दुक्कटं भगवता कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – राजगहे भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू खल्लकबन्धा उपाहनायोपि धारेसुं, पुटबन्धा उपाहनायोपि धारेसुं, पालिगुण्ठिमा उपाहनायोपि धारेसुं, तूलपुण्णिका उपाहनायोपि धारेसुं, तित्तिरपत्तिका उपाहनायोपि धारेसुं, मेण्डविसाणवद्धिका उपाहनायोपि धारेसुं, अजविसाणवद्धिका उपाहनायोपि धारेसुं, विच्छिकाळिका उपाहनायोपि धारेसुं, मोरपिञ्छ परिसिब्बिता उपाहनायो धारेसुं, चित्रा उपाहनायोपि धारेसुं, तस्मिं भन्ते वत्थुस्मिं पञ्ञत्तं.

पुच्छा – कट्ठपादुकायो आवुसो धारेन्तस्स दुक्कटं भगवता कत्थ कं आरब्भ किस्मिं वत्थुस्मिं पञ्ञत्तं.

विस्सज्जना – राजगहे भन्ते छब्बग्गीयेव भिक्खू आरब्भ पञ्ञत्तं, छब्बग्गिया भन्ते भिक्खू रत्तिया पच्चूससमयं पच्चुट्ठाय कट्ठपादुकायो अभिरुहित्वा अज्झोकासे चङ्कमन्ति उच्चासद्दा महासद्दा खटखटसद्दा अनेकविहितं तिरच्छानकथं कथेन्ता, तस्मिं भन्ते वत्थुस्मिं पञ्ञत्तं.

पुच्छा – यानेन आवुसो यायन्तस्स दुक्कटं भगवता कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू यानेन यायिंसु, तस्मिं भन्ते वत्थुस्मिं पञ्ञत्तं.

पुच्छा – गिलानस्स आवुसो यानं भगवता कत्थ अनुञ्ञातं, कं आरब्भ किस्मिं वत्थुस्मिं अनुञ्ञातं.

विस्सज्जना – सावत्थियं भन्ते अञ्ञतरं गिलानं भिक्खुं आरब्भ अनुञ्ञातं, अञ्ञतरो भन्ते भिक्खु कोसलेसु जनपदे सावत्थिं गच्छन्तो भगवन्तं दस्सनाय अन्तरामग्गे गिलानो कुक्कुच्चायन्तो यानं नाभिरुहि, तस्मिं भन्ते वत्थुस्मिं अनुञ्ञातं.

पुच्छा – उच्चासयनमहासयनानि आवुसो धारेन्तस्स दुक्कटं भगवता कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते छब्बग्गिये भिक्खू आरब्भ पञ्ञत्तं, छब्बग्गिया भन्ते भिक्खू उच्चासयनमहासयनानि धारेसुं, तस्मिं भन्ते वत्थुस्मिं पञ्ञत्तं.

पुच्छा – गोचम्मानि आवुसो धारेन्तस्स दुक्कटं भगवता कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते अञ्ञतरं पापभिक्खुं आरब्भ पञ्ञत्तं, अञ्ञतरो भन्ते भिक्खु पाणातिपाते समादपेसि, तस्मिं भन्ते वत्थुस्मिं पञ्ञत्तं.

पुच्छा – पच्चन्तिमेसु आवुसो जनपदेसु विनयधरपञ्चमेन गणेन उपसम्पदा च गुणङ्गुणूपहनञ्च धुवनहानञ्च चम्मानि अत्थरणानि च निस्सीमगतानं चीवरदानञ्चाति इमानि पञ्च भगवता कत्थ अनुञ्ञातानि, कं आरब्भ किस्मिं वत्थुस्मिं अनुञ्ञातानि.

विस्सज्जना – सावत्थियं भन्ते आयस्मन्तं सोणं कुटिकण्णं आरब्भ अनुञ्ञाता, आयस्मा भन्ते सोणो कुटिकण्णो एतानि पञ्चवत्थूनि आयस्मतो महाकच्चानस्स वचनेन भगवन्तं याचि, तस्मिं भन्ते वत्थुस्मिं अनुञ्ञाता.

पुच्छा – चम्मसञ्ञुत्तं पुच्छिस्सं, सनिदानं सनिद्देसं. समुक्कट्ठपदानं आवुसो कति आपत्तियो.

विस्सज्जना – चम्मसञ्ञुत्तं विस्सज्जिस्सं, सनिदानं सनिद्देसं. समुक्कट्ठपदानं भन्ते तिस्सो आपत्तियो.