४. पवारणाक्खन्धक

पुच्छा – वस्सं वुट्ठानं आवुसो भिक्खूनं तीहि ठानेहि पवारितुं भगवता कत्थ पञ्ञत्तं, कं आरब्भ किस्मिं वत्थुस्मिं पञ्ञत्तं.

विस्सज्जना – सावत्थियं भन्ते सम्बहुले भिक्खू आरब्भ अनुञ्ञातं, सम्बहुला भन्ते भिक्खू सन्दिट्ठा सम्भत्ता अन्तोवस्सं नेव आलपिंसु न सल्लपिंसु, तस्मिं भन्ते वत्थुस्मिं अनुञ्ञातं.

अनुजानामि भिक्खवे वस्सं वुट्ठानं भिक्खूनं तीहि ठानेहि पवारेतुं, दिट्ठेव वा सुतेन वा परिसङ्काय वा.

पुच्छा – कति आवुसो पवारणा दिवसवसेन च पुग्गलवसेन च कातब्बाकारवसेन च.

विस्सज्जना – दिवसवसेन भन्ते तिस्सो पवारणा, तथा पुग्गलवसेन कातब्बाकारवसेनच.

पुच्छा – कतीनं आवुसो सङ्घे पवारेतुं भगवता अनुञ्ञातं, कतीनं पनावुसो अञ्ञमञ्ञं पवारेतुं भगवता अनुञ्ञातं.

विस्सज्जना – पञ्चन्नं भन्ते भिक्खूनं सङ्घे पवारेतुं भगवता अनुञ्ञातं, चतुन्नं वा भन्ते तिण्णं वा द्विन्नं वा अञ्ञमञ्ञं पवारेतुं अनुञ्ञातं.

पुच्छा – एकेन पनावुसो वस्संवुट्ठेन भिक्खुना कथं पटिपज्जितब्बन्ति भगवता अनुञ्ञातं.

विस्सज्जना – एकेन पन भन्ते भिक्खुना ‘‘अज्ज मे पवारणा’’ति अधिट्ठातब्बन्ति भगवता अनुञ्ञातं.

पुच्छा – पवारणं पुच्छिस्सं, सनिदानं सनिद्देसं. समुक्कट्ठपदानं आवुसो कति आपत्तियो.

विस्सज्जना – पवारणं विस्सज्जिस्सं, सनिदानं सनिद्देसं. समुक्कट्ठपदानं भन्ते तिस्सो आपत्तियो.