१. रूपादिवग्ग

पुच्छा – एककनिपातेपि आवुसो रूपादिवग्गो नीवरणप्पहानवग्गो अकम्मनियवग्गोतिआदिना वग्गभेदवसेन बहुविधा. तत्थ कतरं वग्गं पठमं संगायिंसु.

विस्सज्जना – एककनिपाते भन्ते रूपादिवग्गो नीवरणप्पहानवग्गोतिआदिना वीसतिया वग्गेसु रूपादिवग्गं पठमं संगायिंसु.

पुच्छा – साधु साधु आवुसो, मयम्पि दानि आवुसो ततोयेव पट्ठाय संगाहनत्थाय संगीतिपुब्बङ्गमानि धम्मपुच्छनविस्सज्जनकिच्चानि आवहितुं समारभाम. तेनावुसो भगवता जानता पस्सता अरहता सम्मासम्बुद्धेन अङ्गुत्तरनिकाये एककनिपाते रूपादिवग्गे पुरिमानि पञ्च सुत्तानि कत्थ कं आरब्भ कथञ्च भासितानि.

विस्सज्जना – सावत्थियं भन्ते सम्बहुले भिक्खू आरब्भ रूपादिगरुकानं पञ्चन्नं पुरिसानं अज्झासयवसेन ‘‘नाहं भिक्खवे अञ्ञं एकरूपम्पि समनुपस्सामि, यं एवं पुरिसस्स चित्तं परियादाय तिट्ठति, यथयिदं भिक्खवे इत्थिरूपं, इत्थिरूपं भिक्खवे पुरिसस्स चित्तं परियादाय तिट्ठती’’ति एवमादिना भगवता भासितानि.

नाहं भिक्खवे अञ्ञं एकरूपम्पि समनुपस्सामि, यं एवं पुरिसस्स चित्तं परियादाय तिट्ठति, यथयिदं भिक्खवे इत्थिरूपं, इत्थिरूपं भिक्खवे पुरिसस्स चित्तं परियादाय तिट्ठति.

पुच्छा – तत्थेव आवुसो पच्छिमानि पञ्च सुत्तानि भगवता कत्थ कं आरब्भ कथञ्च भासितानि.

विस्सज्जना – तस्मिंयेव भन्ते सावत्थियं सम्बहुले भिक्खू आरब्भ रूपादिगरुकानं पञ्चन्नं इत्थीनं अज्झासयवसेन ‘‘नाहं भिक्खवे अञ्ञं एकरूपम्पि समनुपस्सामि, यं एवं इत्थिया चित्तं परियादाय तिट्ठति, यथयिदं भिक्खवे पुरिसरूपं, पुरिसरूपं भिक्खवे इत्थिया चित्तं परियादाय तिट्ठती’’ति एवमादिना भगवता भासितानि.

नाहं भिक्खवे अञ्ञं एकरूपम्पि समनुपस्सामि, यं एवं इत्थिया चित्तं परियादाय तिट्ठति, यथयिदं भिक्खवे पुरिसरूपं, पुरिसरूपं भिक्खवे इत्थिया चित्तं परियादाय तिट्ठति.

नीतत्थवसेन, नेय्यत्थवसेन

पुच्छा – इमस्मिं आवुसो रूपादिवग्गे भगवता नीतत्थवसेन किं कथितं, नेय्यत्थवसेन पन किं ञापितं.

विस्सज्जना – इमस्मिं भन्ते रूपादिवग्गे भगवता नीतत्थवसेन वट्टं कथितं. नेय्यत्थवसेन पन विवट्टम्पि ञापितं.