२. नीवरणप्पहानवग्ग

पुच्छा – दुतियो पन आवुसो नीवरणप्पहानवग्गो भगवता कत्थ कथञ्च भासितो.

विस्सज्जना – सावत्थियं भन्ते ‘‘नाहं भिक्खवे अञ्ञं एकधम्मम्पि समनुपस्सामि, येन अनुप्पन्नो वा कामच्छन्दो उप्पज्जति, उप्पन्नो वा कामच्छन्दो भिय्योभावाय वेपुल्लाय संवत्तति, यथयिदं भिक्खवे सुभनिमित्तं, सुभनिमित्तं भिक्खवे अयोनिसो मनसिकरोतो अनुप्पन्नोचेव कामच्छन्दो उप्पज्जति, उप्पन्नो च कामच्छन्दो भिय्योभावाय वेपुल्लाय संवत्तती’’ति एवमादिना भगवता भासितो.

पुच्छा – इमस्मिं पन आवुसो दुतिये नीवरणप्पहानवग्गे भगवता किं कथितं.

विस्सज्जना – इमस्मिं पन भन्ते दुतिये नीवरणप्पहानवग्गे भगवता वट्टम्पि विवट्टम्पि कथितं.