१५९. क्विस्स

क्रियत्था परस्स क्विस्स लोपो होति. सम्भवतीति सम्भू. एवं विभवतीति विभू, अभिभू, सयम्भू. तथा धु=कम्पने, सन्धुनातीति सन्धु. विभातीति विभा. पभातीति पभा. संगम्म भासन्ति एत्थाति सभा, ‘‘क्विम्हि लोपो+न्तब्यञ्जनस्सा’’ति अन्तब्यञ्जनस्स लोपो. भुजेन गच्छतीति भुजगो. एवं उरगो. तुरं=सीघं गच्छतीति तुरङ्गो. खेन गच्छतीति खगो. विहायसे गच्छतीति विहगो, तदमिनादिपाठा विहादेसो. न गच्छतीति नगो. एवं अगो, ‘‘नगो वा+प्पाणिनी’’ति विकप्पेन नञसमासे टादेसनिसेधो. जन=जनने, कम्मतो जातोति कम्मजो, अमादिसमासो, कम्मजो विपाको, कम्मजा पटिसन्धि, कम्मजं रूपं. एवं चित्तजं, उतुजं, आहारजं. अत्तजो पुत्तो, वारिम्हि जातो वारिजो. एवं थलजो. पङ्कजं. जलजं. अण्डजं. सरसिजं, उपपदसमासे बहुलंविधाना विभत्यलोपे ‘‘मनादीही’’तिआदिना सिआदेसो. द्विक्खत्तुं जातो द्विजो, ‘‘तदमिना’’ दिना क्खत्तुंलोपो. पच्छा जातो अनुजो. सञ्जानातीति सञ्ञा. पजानातीति पञ्ञा. एवं पतिट्ठातीति पतिट्ठा. झा=चिन्तायं, परसम्पत्तिं अभिज्झायतीति अभिज्झा. हितेसितं उपट्ठापेत्वा झायतीति उपज्झा. सो एव उपज्झायो, ‘‘सकत्थे’’ति यो. सम्मा झायन्ति एत्थाति संझा. क्विदन्ता धात्वत्थं न जहन्ति, लिङ्गत्थं पटिपादयन्ति.