पयोगसिद्धि निगमनं

१. ये नन्ततन्तरतनाकरमन्थनेन,

मन्थाचलोल्लसितञाणवरेन लद्धा;

सारामता+तिसुखिता सुखयन्ति च+ञ्ञे,

ते मे जयन्ति गुरवो गुरवो गुणेहि.

२. यस्स साधुगुणुब्भूत-कित्ति सब्बत्त पत्थटा;

मोग्गल्लानो महापञ्ञो, जयती सो ह सब्बदा.

३. परमप्पिच्छता+नेक-सन्तोसूपसमेसिनं;

सुचिसलेखवुत्तीनं, सदा+रञ्ञनिवासिनं.

४. सासनुजोतकारीन+माचेरत्त+मुपागतं;

उदुम्बरगिरीख्याता+यतनं यतिपुङ्गवं.

५. मेधङ्करोति आख्यात-नामधेय्यं तपोधनं;

थेरं थिरदया मेधा-निधानं साधु पूजितं.

६. सिस्सं सहाय+मागम्म, कल्याणमित्त+मत्तनो;

सोधेतुं सासनं सत्थु, परक्कम+मकासि यो.

७. सङ्घरक्खितनामेन, महाथेरेन धीमता;

निवासभूतेना+नेक-गुणान+प्पिच्छतादिनं.

८. मोग्गल्लानब्याकरण-पयोगक्कमसाधका;

एत्तावता कता एसा, पयोगसिद्धि निट्ठिता.

९. तेनेव रचिता साधु, सासनोदयकारिना;

खुद्दसिक्खाय टीका च, तथा सम्बन्धचिन्तना.

१०. सुसद्दसिद्धिं यो योग-निच्छयं सब्भि वण्णितं;

अका सुबोधालङ्कारं, तथा सम्बन्धचिन्तनं.

११. सत्थसञ्चितपुञ्ञेन, निब्बानसाधकं हितं;

साधेन्तो लोकनाथस्स, सद्धम्मो तिट्ठतं चिरन्ति.

इति सङ्घरक्खितमहासामिथेरपादविरचिता

पयोगसिद्धि निट्ठिता.

(विसेसलक्खणं). यथावुत्तानं पन पयोगसिद्धिनिगमन गाथानं एकादसन्नं पुब्बेयेव वक्खमाना इमा गाथायो दिस्सन्ति पोराणे सीहळमूलपयोगसिद्धिपाठे. ता च गाथायो पच्छा सीहळमूलपयोगसिद्धिसंसोधकेन मेधङ्करोति गरूहि गहितनामधेय्येन थेरेन पक्खित्ताति वेदितब्बा, तस्मा मयं ता गाथायो सब्बपच्छायेव इमस्मिं-ठाने ठपेम. ता पन गाथायो कतमाति चे –

१. चागविक्कमसद्धानु-सम्पन्नगुणसामिनो;

परक्कमनरिन्दस्स, सीहळिन्दस्स धीमतो.

२. अत्रजेना+नुजातेन, भूपालकुलकेतुना;

दिसन्तपत्थटोदार-विक्कमेन यसस्सिना.

३. भुवनेकभुजव्हेन, महाराजेन धीमता;

चतुपच्चयदानेन, सततं समुपट्ठितो.

४. ‘‘जम्बुदोणी’’ति विख्याता –

वासे निवसतो सतो;

सुमङ्गलमहत्थेर –

सामिनो सुचिवुत्तिनो.

५. वंसे विसुद्धे संजातो,

पन्थसेनासने रतो;

परियत्तिमहासिन्धु –

निय्यामकधुरन्धरो.

५. अप्पिच्छादिगुणूपेतो, जिनसासनमामको;

वनेरतमहत्थेरो, मेधङ्करसमव्हयो.

६. पाटवत्थाय भिक्खूनं, विनये सुविसारदो;

पयोगसिद्धिं सोधयि, सदा सप्पञ्ञगोचरं.

७. इमं लिखितपुञ्ञेन, मेत्तेक्यं उपसंकमि;

पतिट्ठहित्वा सरणे, सुप्पतिट्ठामि सासनेति.

पयोगसिद्धिसिद्धं.